Niwifashe wongere ufashe abandi biciye kw’Ijambo ry’Imana

1. Ni kubera iki dutegerezwa kwizigira Ijambo ry’Imana duherejeko?

IGIHE abakurambere bihweza nimba umutohoji wa Bibiliya akwije ibisabwa vyo kugira uruhara mu busuku bwo mu ndimiro, baribaza bati: ‘Ivyo uwo muntu avuga vyoba vyerekana ko yemera yuko Bibiliya ari Ijambo ry’Imana ryahumetswe?’a Ku wipfuza kuba umwamamaji w’Ubwami, eka mbere ku basavyi b’Imana bose, inyishu itegerezwa kuba ego itomoye. Kubera iki? Kuba twizigira Ijambo ry’Imana no kuba dushoboye kurikoresha mu busuku bizodufasha gufasha abandi kumenya Yehova no gushikira ubukiriro.

2. Ni kubera iki dukwiye ‘kuguma mu vyo twize’?

² Intumwa Paulo yarashimitse ku kuntu Ijambo ry’Imana rihambaye igihe yandikira Timoteyo ati: “Ugume mu vyo wize ukumvishwa ukavyemera.” ‘Ivyo bintu’ Paulo yavuze ni ukuri kwo muri Bibiliya kwavyuriye Timoteyo umutima wo kwizera inkuru nziza. Ukwo kuri kwaragize ikintu nk’ico kudukozeko muri iki gihe, kandi kurabandanya kudufasha kuguma turi “inkerebutsi ku bw’ubukiriro.” (2 Tim. 3:14, 15) Turakunze gukoresha amajambo Paulo yavuze ubukurikira mu kwereka abandi yuko Bibiliya yakomotse ku Mana, mugabo twebwe ubwacu twoshobora kugira ikindi kintu twungukiye kuri ayo majambo dusanga muri 2 Timoteyo 3:16. (Soma.) Nimuze twihweze uwo murongo ido n’ido. Ivyo biraza gutuma turushiriza kwizigira yuko inyigisho zose ziva kuri Yehova “[zi]gororotse.”​—Zab. 119:128.

“NI NGIRAKAMARO KU KWIGISHA”

3-5. (a) Isinzi ry’abantu ryakiriye gute insiguro Petero yashikirije kuri Pentekoti, kandi kubera iki? (b) Ni kubera iki abantu benshi b’i Tesalonika bemeye ukuri? (c) Ni igiki coshobora gutangaza abantu muri iki gihe ku bijanye n’ubusuku turangura?

³ Yezu yabwiye ihanga rya Isirayeli ati: “Ngira ndabatumeko abahanuzi n’abantu b’inkerebutsi be n’abigisha b’abantu.” (Mat. 23:34) Yezu yariko yerekeza ku bigishwa biwe, abo yigishije gukoresha Ivyanditswe mu busuku bwabo. Kuri Pentekoti yo mu 33 G.C., umwe muri abo “bigisha b’abantu,” akaba ari intumwa Petero, yarashikirije insiguro isinzi rinini ry’abantu i Yeruzalemu aho yasubiyemwo imirongo itari mike yo mu Vyanditswe vy’igiheburayo. Benshi mu bariko barumviriza, bumvise ukuntu Petero yerekanye iranguka ry’ayo majambo, baciye “basogotwa mu mitima.” Barigaye ibicumuro bari barakoze kera. Abantu ibihumbi nka bitatu muri bo bararondeye kubabarirwa n’Imana maze baraba abakirisu.—Ivyak. 2:37-41.

⁴ Uwundi mwigisha w’abantu, akaba ari intumwa Paulo, yaramamaje inkuru nziza kure cane ya Yeruzalemu. Nk’akarorero, mu gisagara ca Tesalonika co muri Makedoniya, yarabwiye ubutumwa abariko basengera mw’isinagogi. Paulo yamaze Amasabato atatu “azirikana hamwe na bo afatiye ku Vyanditswe, asigura yongera yemeza akoresheje ibintu vyanditswe yuko vyari nkenerwa ko Kristu acumukura hanyuma akazuka mu bapfuye.” None havuyemwo iki? “Bamwe muri bo [bakaba bari Abayuda baracitse] abemera,” cokimwe n’ “Abagiriki indiri n’indiri.”​—Ivyak. 17:1-4.

⁵ Uburyo abasavyi b’Imana bo muri iki gihe bakoresha Bibiliya buratangaza abantu benshi. Aho umunyamuhana umwe wo mu Buswise amariye kwumviriza umwe muri bashiki bacu asoma icanditswe, yamubajije ati: “Muserukira nde?” Uwo mushiki wacu yishuye ati: “Twe na mugenzanje turi Ivyabona vya Yehova.” Uwo munyamuhana yavuze ati: “Nogatangaye! Hari abandi atari Ivyabona vya Yehova boza iwanje gusoma Bibiliya?”

6, 7. (a) Abigisha ishengero bashobora gute gukoresha neza Bibiliya? (b) Dushobora gute gukoresha neza Ivyanditswe igihe tuyobora inyigisho za Bibiliya zo ku muhana?

⁶ Twoshobora gute gukoresha Bibiliya mu buryo bushitse mu kwigisha kwacu? Nimba ufise agateka ko kwigisha mw’ishengero, nukoreshe ivyanditswe vyo muri Bibiliya binaka. Aho kuvuga mu bundi buryo ivyanditswe nyamukuru canke kubisoma ku rupapuro wabicapuyeko kibure kubisomera ku cuma co mu buhinga bwa none, nuzingurure Bibiliya maze usome muri yo, wongere uremeshe abumviriza kubigenza gutyo nyene. Vyongeye, nufate umwanya werekane ukuntu iyo mirongo yoshirwa mu ngiro mu buryo bufasha abumviriza kurushiriza kwiyegereza Yehova. Aho gukoresha ibigereranyo bigoye be n’ivyabonywe vyo gutwenza abantu gusa, nukoreshe uwo mwanya mu gusigura Ijambo ry’Imana.

⁷ Ni igiki dukwiye kuguma twibuka igihe tuyobora inyigisho za Bibiliya zo ku muhana? Igihe dukoresha ibisohokayandikiro vyacu vya gikirisu, dutegerezwa kwiyubara kugira ntitwirengagize ivyanditswe. Dukwiye kuremesha umutohoji gusoma ivyanditswe vyatanzwe maze tukamufasha kubitahura. Gute? Mu kutamuha insobanuro ndende zituma ico cigwa gihinduka urukurikirane rw’insiguro, ahubwo tukaremesha uwo mutohoji kugira ico avuze. Aho kumubwira ivyo akwiye kwemera canke ukuntu akwiye gukora ibintu, turashobora kumubaza ibibazo twiyumviriye neza bizomufasha gushika ku vyiyumviro bibereye.b

“NI NGIRAKAMARO . . . KU GUKANGIRA”

8. Paulo yarwana urugamba uruhe imbere muri we?

⁸ Akenshi tubona ko ivyo “gukangira” ari ikintu kibwirizwa gukorwa n’abakurambere bakirisu. Nkako, abacungezi barafise ibanga ryo ‘gukangira abantu baza baracumura.’ (1 Tim. 5:20; Tito 1:13) Mugabo kwikangira na vyo nyene birahambaye. Paulo yari umukirisu w’intangakarorero yari afise ijwi ryo mu mutima ridahumanye. (2 Tim. 1:3) Naho vyari ukwo, yanditse ati: “Mbona mu bihimba vyanje irindi tegeko rirwanya itegeko ry’umuzirikanyi wanje rikanjana ndi imbohe kw’itegeko ry’igicumuro.” Dusuzumye amajambo akikije ico canditswe, turarushiriza gutahura urugamba Paulo yabwirizwa kurwana kugira ngo acungere impengamiro yiwe yo gukora igicumuro.​—Soma Abaroma 7:21-25.

9, 10. (a) Ni ubugoyagoye ubuhe Paulo ashobora kuba yaranyinyana na bwo? (b) Paulo ashobora kuba yarwanije gute igicumuro?

⁹ Ni ubugoyagoye ubuhe Paulo yihatira gutsinda? Naho atabutomoye, yandikiye Timoteyo yuko yahora ari “umuntu atisonera.” (1 Tim. 1:13) Imbere y’uko Paulo aba umukirisu, yararwanya abakirisu bimwe bikomeye. Ku bijanye n’ukuntu yabona abayoboke ba Kristu, yiyemereye ati: “Nari nasaze bimwe birengeje mu kubanka.” (Ivyak. 26:11) Naho Paulo yize gucungera ishavu ryiwe, bitegerezwa kuba vyarashika akarwana urugamba rwo gucungera inyiyumvo ziwe n’amajambo yiwe. (Ivyak. 15:36-39) Ni igiki none camufashije kuroranirwa?

¹⁰ Igihe Paulo yandikira abakirisu b’i Korinto, yaravuze uburyo yakoresheje mu kwikangira. (Soma 1 Abakorinto 9:26, 27.) Kamere yiwe yo kuba umunyagasembwa yarayikubita ibipfunsi mu buryo bw’impwemu adahusha. Birashoboka cane yuko yarondera impanuro zo mu Vyanditswe, agatakambira Yehova ngo amufashe kuzishira mu ngiro, agaca yihatira kugira ivyo aryohoye.c Turashobora kwungukira ku karorero yatanze kubera ko natwe nyene turwanya impengamiro zacu ziranga agasembwa.

11. Dushobora gute ‘kuguma twisuzuma’ kugira ngo turabe nimba turiko tugendera mu nzira y’ukuri?

¹¹ Ntidukwiye kwigera twijajara mu gusenga kwacu. Ahubwo turakeneye nyabuna ‘kuguma twisuzuma’ kugira ngo twiyemeze neza yuko turiko tugendera vy’ukuri mu nzira y’ukuri. (2 Kor. 13:5) Igihe turiko turasoma ivyanditswe nk’Abakolosayi 3:5-10, twoshobora kwibaza duti: ‘Noba ndiko nihatira kwica impengamiro zanje ziranga igicumuro canke ndiko ndagoyagoya mu vy’inyifato runtu? Mu bijanye no gukoresha Internet, igihe nubutse ku muhora w’ivy’ubuhumbu, noba nca ndawuvako canke ndarondera imihora itabereye?’ Gushira mu ngiro impanuro zo mw’Ijambo ry’Imana tuzirabishako muri ubwo buryo bizodufasha ‘kuguma turikanuye no kuzigama ubwenge bwacu.’​—1 Tes. 5:6-8.

“NI NGIRAKAMARO . . . KU KUGORORA IBINTU”

12, 13. (a) Dukwiye kuba dufise intumbero iyihe igihe ‘turiko turagorora ibintu,’ kandi dushobora gute kwigana akarorero ka Yezu muri ivyo? (b) Ni imvugo iyihe tudakwiye gukoresha igihe ‘turiko turagorora ibintu’ hagati yacu n’abandi?

¹² Imvugo y’ikigiriki yahinduwe ngo “kugorora ibintu” isobanura “kugira ikintu neza, gukosora, gutuma ikintu gisubira kuba ikibereye kandi kigororotse.” Rimwe na rimwe, dutegerezwa gutera intambwe yo kugorora ibintu hagati yacu n’abandi bantu baba badutahuye nabi canke batahuye nabi ivyo twakoze. Nk’akarorero, indongozi z’idini ry’Abayuda zidoze zivuga yuko Yezu yafatana ubuntu “abatozakori n’abacumuzi.” Yezu yishuye ati: “Abafise amagara meza ntibakenera umuganga, ahubwo abarwaye ni bo bamukenera. Nimugende rero mwige ico ibi bisobanura ngo: ‘Ico nshaka ni imbabazi, si ibimazi.’” (Mat. 9:11-13) Abigiranye ukwihangana n’ubuntu yarasigurira bose amajambo y’Imana. Ni co gituma abantu baciye bugufi bamenye ko Yehova ari “Imana y’inyembabazi n’inyempuhwe, iteba gushavura kandi igwije ubuntu bwuzuye urukundo be n’ukuri.” (Kuv. 34:6) Utwigoro Umwana w’Imana yagize two ‘kugorora ibintu’ twatumye abantu benshi bizera inkuru nziza.

¹³ Akarorero ka Yezu karatwigisha ukuntu dukwiye gufasha abandi. Umuntu afise akababaro yoshobora kuvuga akankama ati: ‘Nipfuza ko tugorora ibintu hagati yanje nawe.’ Mugabo kuvyifatamwo gutyo si yo ntumbero y’ibivugwa muri 2 Timoteyo 3:16. “Icanditswe cose” ntikiturekurira gukankamira abandi. Nka kurya kw’“ugusogota kw’inkota,” gukarira abandi akenshi bituma bababara cane kandi ni gake bivamwo ivyiza.—Imig. 12:18.

14-16. (a) Abakurambere bashobora gute ‘kugorora ibintu’ mu buryo bufasha abandi gutorera umuti ingorane zabo? (b) Ni kubera iki “kugorora ibintu” mu buryo bushingiye ku Vyanditswe bihambaye cane mu bijanye no kurera abana?

¹⁴ Dushobora gute none gukoresha ukwihangana n’ubuntu igihe ‘turiko turagorora ibintu’? Dufate yuko hari abubakanye bituye umukurambere mukirisu ngo abafashe gutorera umuti imihazuko ikunda kuba hagati yabo. None uwo mukurambere yokora iki? Atarinze kugira aho ahengamiye, arashobora gufasha uwo mugabo n’umugore kuzirikana ku ngingo ngenderwako zo muri Bibiliya, kumbure agakoresha iziri mu kigabane ca 3 c’igitabu Akabanga ko Kuronka Agahimbare mu Rugo. Uko uwo mukurambere ayobora ico kiyago, uwo mugabo n’uwo mugore boshobora kubona impanuro umwe wese akwiye kurushiriza gushira mu ngiro. Mu nyuma, uwo mukurambere hari aho yoshima kubaza ukuntu ibintu biriko biragenda muri urwo rugo akongera akabafasha nimba bikenewe.

¹⁵ Abavyeyi bashobora gute ‘kugorora ibintu’ mu buryo butuma abana babo bakomera mu vy’impwemu? Dufate ko wipfuza gufasha umukobwa wawe w’umuyabaga kwirinda abagenzi bateye amakenga. Ukwiye kubanza kuronka amakuru y’imvaho. Maze, nimba hari imvo yo guhagarika umutima, urashobora kuyaga na we, kumbure ugakoresha ivyiyumviro vyo mu gitabu Ibibazo urwaruka rwibaza—Inyishu ngirakamaro, Igitabu ca 2. Mu misi ikurikira, woshobora kumarana na we umwanya wiyongereye. Urashobora kandi kwihweza agatima afise igihe agira uruhara mu murimo wo mu ndimiro canke igihe umuryango uriko uriruhura. Ugaragaje ukwihangana n’ubuntu, umukobwa wawe azobona ko umwitwararikana urukundo. Birashoboka ko azovyurirwa umutima wo gushira mu ngiro impanuro wamuhaye akirinda gushikirwa n’ikintu kibabaje.

¹⁶ Muri ubwo buryo buranga ukwihangana n’ubuntu, turashobora kuremesha abahagaritswe umutima n’amagara yabo, abavunitse umutima kubera bakuwe mu kazi, canke abadatahura inyigisho zimwezimwe zo mu Vyanditswe. Gukoresha Ijambo ry’Imana mu ‘kugorora ibintu’ birazanira ivyiza vyinshi abasavyi ba Yehova.

“NI NGIRAKAMARO . . . KU GUTOZA INDERO MU BUGOROROTSI”

17. Ni kubera iki dukwiye kwemera gutozwa indero tubigiranye ugukenguruka?

¹⁷ “Nta gutozwa indero kuboneka uwo mwanya ko guteye umunezero, ahubwo kuboneka nk’uguteye intuntu; yamara mu nyuma, ku bamenyerejwe na kwo, kwama icamwa c’amahoro, ari co bugororotsi.” (Heb. 12:11) Benshi mu bakirisu bakuze baremera yuko indero bahawe n’abavyeyi babo bemera yabafashije. Vyongeye, kwemera gutozwa indero na Yehova, nk’uko itangwa n’abakurambere bakirisu, bituma tuguma muri ya nzira ijana mu buzima.—Imig. 4:13.

18, 19. (a) Ni kubera iki impanuro dusanga mu Migani 18:13 ihambaye cane mu bijanye no “gutoza indero mu bugororotsi”? (b) Igihe abakurambere bagaragaje ubwitonzi n’urukundo mu kuntu bafata abacumuzi, akenshi bivamwo iki?

¹⁸ Gutoza indero mu buryo buri n’ico buvamwo ni ubuhinga. Yehova yasavye abakirisu gutoza indero “mu bugororotsi.” (2 Tim. 3:16) Ku bw’ivyo, dukwiye kuyoborwa n’ingingo ngenderwako zo muri Bibiliya muri ivyo. Imwe muri izo ngingo ngenderwako tuyisanga mu Migani 18:13 ahagira hati: “Iyo umuntu yishuye ku kintu ataracumva, ivyo bimubera ubupfu n’agateterwe.” Igihe rero abakurambere bakeneye kuyaga n’umuntu yagirizwa igicumuro gikomeye, bategerezwa gutohoza ico kintu bavyitondeye kugira ngo baronke amakuru y’imvaho. (Gus. 13:14) Aho ni ho gusa bashobora gutoza indero “mu bugororotsi.”

¹⁹ Vyongeye, Ijambo ry’Imana ritegeka abakurambere bakirisu gukosora abandi “mu bwitonzi.” (Soma 2 Timoteyo 2:24-26.) Ego ni ko, umuntu yoshobora gusiga iceyi Yehova akongera akagirira nabi abantu b’intungane. Naho ari ukwo, umukurambere ashavura igihe ariko arahanura umuntu nk’uwo nta co amufasha. Ariko rero, igihe abakurambere biganye “ubuntu bw’Imana,” boshobora gutuma uwo muntu yakoze ikosa yigaya.—Rom. 2:4.

20. Ni ingingo ngenderwako izihe abavyeyi bakwiye gushira mu ngiro igihe batoza indero abana babo?

²⁰ Mu bijanye no kurera abana babo “mu kubatoza indero no mu kuyobora ivyiyumviro vyabo nk’uko Yehova yashinze,” abavyeyi bategerezwa gushira mu ngiro ingingo ngenderwako zo muri Bibiliya. (Ef. 6:4) Sebibondo arakwiye kwirinda guhana umuhungu wiwe afatiye gusa ku nyifato yiwe. Vyongeye, ishavu rirangwa n’ubukazi nta kibanza rifise mu rugo rw’abakirisu. “Yehova [ni] umunyakibabarwe cane n’umunyembabazi,” akaba ari co gituma abajejwe ibanga ryo gutoza indero abakiri bato bakwiye kwihatira kugaragaza kamere ziranga urukundo nk’izo.​—Yak. 5:11.

INGABIRANO NTANGERE YEHOVA YADUHAYE

21, 22. Ni amajambo ayahe dusanga muri Zaburi 119:97-104 adondora neza ukuntu ubona Ijambo rya Yehova?

²¹ Hari umugabo yatinya Imana yigeze kwerekana igituma akunda itegeko rya Yehova. (Soma Zaburi 119:97-104.) Biciye ku kuryiga, yararonse ubukerebutsi, ugutahura kwimbitse n’ugutegera. Gukurikiza impanuro zo muri ryo vyaramufashije kwirinda iminyuro y’ikinyoma yatuntuza abandi. Kwiga Ivyanditswe vyaramuhimbara bikongera bigatuma ahera akanyota. Yari yiyemeje kugamburukira Imana, ubuyobozi bwayo bukaba bwari bwaratumye yironkera ivyiza vyinshi cane mu buzima.

²² Woba uha agaciro “Icanditswe cose”? Biciye kuri co, urarushiriza kwizera yuko Imana izoshitsa umugambi wayo. Impanuro zahumetswe ziri muri co ziragukingira ingaruka zibabaje ziva ku kuza uracumura. Vyongeye, ugisiguye ubigiranye ubuhanga, urashobora gufasha abandi kuja muri ya nzira ijana mu buzima no kuyigumamwo. Nimuze dukoreshe bimwe bishitse “Icanditswe cose” uko dukorera Imana yacu nyene ubukerebutsi bwose kandi yuzuye urukundo, Yehova.