INYISHU Z’IBIBAZO BISHINGIYE KURI BIBILIYA

Kubera iki bigoye cane kuronka amahoro kw’isi?

Bibiliya iratanga imvo zibiri nyamukuru. Iya mbere: Naho abantu bashitse ku bintu bidasanzwe, ntibaremanywe ubushobozi bwo kuyobora intambuko zabo. Iya kabiri: Imigambi y’abantu nta co ishikako kubera ko “isi yose iri mu bubasha bwa wa mubisha” Shetani. Ni co gituma abantu batarashobora kuzana amahoro kw’isi.​—Soma Yeremiya 10:23; 1 Yohani 5:19.

Ubwikunzi bw’abantu be n’agatima ko guhahamira ubukuru na vyo nyene vyaratumye bigora kuronka amahoro kw’isi. Intwaro ishoboye kwigisha abantu gukunda ibigororotse no kwitwararikana ni yo yonyene izozana amahoro kw’isi.​—Soma Yesaya 32:17; 48:18, 22.

Ni nde azozana amahoro kw’isi?

Imana Mushoboravyose yarasezeranye ko izoshinga intwaro imwe rudende izotegeka abantu bose. Iyo ntwaro izosubirira intwaro z’abantu. (Daniyeli 2:44) Yezu Umwana w’Imana azotegeka ari Umuganwa w’amahoro. Azokuraho ububisha kw’isi yose maze yigishe abantu kuba abanyamahoro.​—Soma Yesaya 9:6, 7; 11:4, 9.

Biciye ku buyobozi Yezu atanga, abantu amamiliyoni hirya no hino kw’isi bariko barakoresha Ijambo ry’Imana Bibiliya mu kwigisha abantu kubana amahoro n’abandi. Vuba hagiye kuboneka amahoro kw’isi.​—Soma Yesaya 2:3, 4; 54:13.