Porogarama y’Umusi w’iteraniro ridasanzwe ryimirije
Porogarama y’umusi w’iteraniro ridasanzwe ryo mu mwaka w’umurimo wa 2008 ifise umutwe-shimikiro uvuga ngo “Turi ibumba, Yehova na we ni Umubumvyi wacu”, ukaba ushingiye kuri Yesaya 64:8. Inkeburo tuzohabwa ishingiye ku Vyanditswe mu gihe c’iyo porogarama, izotuma turushiriza gukenguruka ubukerebutsi, ubutungane, ububasha be n’urukundo vya Yehova wa Mubumvyi Ahambaye.
Insiguro izoshikirizwa n’umucungezi w’umuzunguruko, iyizoba ivuga ngo “Dukore turi inzavya ziteye iteka mu busuku”, izokwerekana ukuntu abantu amasinzi bariko barironkera imihezagiro myinshi iva ku kumenya ukuri no ku kukubwira abandi. Insiguro ivuga ngo “Kuzirikana bizokurinda” izokwerekana ukuntu kuzirikana ata gufyina ku ngingo ngenderwako zigororotse za Yehova bidukingira. Umushikirizansiguro w’umushitsi azoshikiriza insiguro ifise umutwe uvuga ngo “ ‘Ntimushushanywe n’ivy’iki gihe’ ” be n’iyifise umutwe uvuga ngo “Nubumbabubwe na wa Mubumvyi Ahambaye”. Abavyeyi be n’abakiri bato bazoronka indemesho mu nsiguro ivuga ngo “Abakiri bato bafitiye akamaro Yehova” be n’iyivuga ngo “Uruhara ruhambaye abavyeyi bafise mu bijanye n’igikorwa co kubumbabumba”. Biciye ku myerekano no ku biganiro vyo kubaza ibibazo, tuzohimbarwa no kwiyumvira be no kumenya ivyo abavukanyi n’abavukanyikazi bacu bariko bararangura mu busuku. Abipfuza kugereranya ukwiyegurira Imana kwabo mu kubatizwa mu mazi barakwiye kubimenyesha abacungezi bahagarikizi vuba bishoboka. Uribuka kuzana Umunara w’Inderetsi wawe uzokwigwa mu ndwi izoberamwo iteraniro ridasanzwe ry’umusi umwe.
Ikintu cose wa Mubumvyi Ahambaye ategekanya kurangura arakirangura. Ariko umwe wese muri twebwe ni we aheza akihitiramwo ukuntu azokwemera ko Yehova amubumbabumba. Abagamburuka babigiranye ubukerebutsi ingingo ngenderwako za Yehova kandi bakemera ko abasena, nka kurya kw’ibumba riri ku rujo rw’umubumvyi, barashobora kubumbwa, gusenwa maze bagahindurwamwo inzavya zifise akamaro. Igihe dusenyeye ku mugozi umwe na Yehova, turaninahaza ubusegaba bwiwe kandi tukaronka imihezagiro myinshi.