Woba uriko urayikoresha bimwe bishitse?

¹ “Ndashashaye kuyikoresha mu ndimiro!” Ivyo ni vyo umuvukanyikazi umwe yanditse ahejeje gusoma Umunara w’Inderetsi wo ku wa 1 Nzero 2008. Woba umaze kurimbura ibiganiro bimwebimwe vyama bisohoka mu nteguro ya bose, vyongeye woba umaze gutora uburyo bwiza bwo kubikoresha mu busuku bwawe bwo mu ndimiro?

² “Ivyo twigira kuri Yezu”: Vyoshoboka ko wasanze ico kiganiro cofasha mu gutanguza inyigisho za Bibiliya. Nimba utarabigira, nugerageze gusomera umutwe w’ico kiganiro uwo wasanze ku muhana hanyuma umwereke ivyo Yezu yavuze ku bijanye n’ico kintu, nk’uko biba vyavuzwe mu ngingo ya mbere. Uwo muntu niyaca ashimishwa, urihatira kubandanya ikiyago mu gukoresha udutwe dutoduto, udutunganijwe mu buryo bw’ibibazo bituma umuntu azirikana. Nusabe uwo muntu agire ico avuze ku kibazo cose mushitseko. Nusigure muri make amashusho ayo ari yo yose ajanye n’ico kibazo, hanyuma uje ku ngingo ikurikira. Woshobora kuganira n’uwo muntu wagendeye ari bwo bwa mbere ku gice c’ico kiganiro, maze mukazoganira ku kindi gice ugarutse kumugendera. Niwitegurire kuzobandanya iyo nyigisho mu gitabu Ivyo Bibiliya yigisha.

³ “Ibintu nyamukuru vyotuma mu rugo haba agahimbare”: Ivyo biganiro, ibiboneka uko amezi atatu aheze, bigenewe gufasha abanega, abakenyezi be n’abavyeyi kumenya ukuntu boshira mu ngiro ingingo ngenderwako zo muri Bibiliya igihe batunganya ingorane zibangamira amahoro yo mu rugo. Urashobora kandi gukoresha ivyo biganiro mu gufasha abatari Ivyabona kubona ubukerebutsi dusanga muri Bibiliya.—2 Tim. 3:16, 17.

⁴ Ibiganiro bigenewe urwaruka: Ibiganiro bivuga ngo “Ku bw’urwaruka rwacu” biratanga ivyiyumviro bitunganijwe mu buryo buha umusomyi akaryo ko kuzirikana ku nkuru iriko irashikirizwa, kandi birashobora gukoreshwa ku bwo kurondera kumenya vyinshi ku bijanye n’inkuru yinaka yo muri Bibiliya. Urashobora gukoresha ivyo biganiro mu gufasha abakiri bato muhura mu busuku kubona agaciro ngirakimazi ko kwiga Ijambo ry’Imana. (Zab. 119:9, 105) Igihe uriko uganiriza abavyeyi, woshobora gukoresha ibiganiro bivuga ngo “Niwigishe abana bawe,” bino bikaba bisohoka rimwe mu mezi abiri. Ivyo biganiro birashobora gufasha abana bato kwigira ivyigwa bihambaye ku nkuru z’abantu bavugwa muri Bibiliya. Woba umaze gufata akaryo ko gusoma ivyo biganiro uri kumwe n’abana bawe?

⁵ Ibindi biganiro: Buri kwezi, ikiganiro kivuga ngo “Ivyabajijwe n’abasomyi bacu” kiraca irya n’ino ikibazo abantu batari Ivyabona boshobora kubaza. Woshobora kwerekana ico kiganiro igihe uriko urashikiriza ibinyamakuru inzu ku nzu. Ikiganiro kivuga ngo “Ikete rivuye . . . ” ni inkuru ikabura umuntu atanga ku vyamushikiye ubwiwe yerekana ingorane abamisiyonari be n’abandi bamamaji bahura na zo igihe baba bariko bararangura ubusuku bwabo. Ivyo biganiro birashobora gufasha abashimishijwe kubona ko inkuru nziza iriko iramamazwa kw’isi yose, ico kikaba ari ikimenyetso c’ukuhaba kwa Kristu.—Mat. 24:3, 14.

⁶ Ikiganiro gisohoka buri kwezi kivuga ngo “Niwiyegereze Imana,” ikiba gishingiye ku busomyi bwa Bibiliya bwo mw’Ishure ry’ubusuku bwa gitewokarasi, coshobora kuvyurira abantu bafise umutima nziraburyarya icipfuzo co kurondera kwiga vyinshi ku vyerekeye Yehova. Ibiganiro bivuga ngo “Niwigane ukwizera kwabo,” ibisohoka kane mu mwaka, bigenewe gufasha abantu kwiha ishusho y’ibivugwa mu nkuru zo muri Bibiliya, bigatuma abasomyi ba none babona mu bwenge abantu bavugwa muri Bibiliya, amahitamwo bagize, ingorane baciyemwo be n’ukwizera bagaragaje.

⁷ Ese ukuntu twumva duhimbawe kubona buri kwezi turonka inomero y’Umunara w’Inderetsi igenewe gukoreshwa yose mu ndimiro! Uko bishoboka kwose, nimuze twiyemeze kumenya neza amayagwa ayigize kandi tuyikoreshe bimwe bishiste mu busuku bwacu.