Umusi udasanzwe wo gutanguza inyigisho za Bibiliya

¹ Guhera muri Nzero, ishengero rimwerimwe ryose rizotegekanya impera y’umushamvu imwe buri kwezi, kumbure irya itangura ukwezi, kugira ngo ryitunire ku gutanguza inyigisho za Bibiliya. Ivyo vyoshobora kugirwa ku wa gatandatu canke ku w’iyinga, mwisunze ivyoba vyiza gusumba ibindi aho iwanyu. Niba kuri uwo musi abo musanze ku muhana batemeye kugirirwa inyigisho, abamamaji boshobora kubandanya bashikiriza igitabu Ivyo Bibiliya yigisha canke ibinyamakuru biheruka gusohoka. Abakurambere be n’abakozi b’ishengero bose bakwiye gutunganya ivyo kugira uruhara bimwe vyuzuye muri ico gikorwa kandi bagafasha abamamaji gutanguza inyigisho za Bibiliya.

² Komite y’umurimo y’ishengero izoshinga impera y’umushamvu izokurwamwo umusi ugenewe gutanguza inyigisho za Bibiliya. Abamamaji barakwiye kuza baributswa kugira ngo bashobore kwitegura bongere bagire akigoro kadasanzwe ko gutanguza inyigisho za Bibiliya ku nzu n’inzu be n’igihe basubira kugendera abashimishijwe.

³ Ukuntu twokwitegura: Turashobora kuronka ivyiyumviro vy’ukuntu twotanguza inyigisho za Bibiliya mu nyongera y’Igikorwa dukorera Ubwami co muri Nzero 2006 be no mu gatabu Uburyo bwo Gutanguza no Kubandanya Ibiyago Bishingiye Kuri Bibiliya ku rupapuro rwa 4. Hari aboshobora guhitamwo gukoresha agapapuro k’inkuru nziza, nka kamwe kavuga ngo Woba ushaka kumenya Ukuri? Igikorwa dukorera Ubwami co muri Ndamukiza 2007 ku rupapuro rwa 3, na co nyene kiratanga ivyiyumviro vy’ukuntu twotanguza inyigisho za Bibiliya igihe dusubiye kugendera abemeye kwakira ibinyamakuru twabasigiye. Abakurambere be n’abakozi b’ishengero bazoshirwa ku rutonde kugira ngo barongore ikoraniro rigufi ryo gusohoka mu murimo wo mu ndimiro rimara iminuta iri hagati ya 10 na 15, mu gihe c’iryo koraniro hakaba hakwiye kurimburwa inama ngirakamaro imwe canke zibiri z’ukuntu hotanguzwa inyigisho za Bibiliya canke bikagirwa mu mwerekano.

⁴ Mu bisanzwe, abantu bose ntibazokwemera kugirirwa inyigisho ya Bibiliya canke ngo babandanye kwiga igihe kirekire. Ivyo ntibikwiye gutuma dutana n’akabando, narirya Yehova ari we ariko arakwegera abameze nk’intama ngo baze mw’ishirahamwe ryiwe. (Yoh. 6:44) Ico tujejwe si ukubiba gusa imbuto z’ukuri, ariko kandi turafise ibanga ryo kubagarira no kuvomera izimaze gushinga imizi, ivyo na vyo bikaba birimwo kwigisha Bibiliya abantu bafise agatima kabereye. Mu kubigenza gutyo, tuba turiko turinovora agateka dufise ko kuba abakozi bakorana n’Imana.—1 Kor. 3:9.