Mufatire akarorero ku bahanuzi—Yona
1. Ni kamere nziza izihe Yona yari afise?
1 Ni igiki gica kiza mu bwenge iyo wiyumviriye umuhanuzi Yona? Hari aboca bamubona nk’umuntu w’umunyabwoba canke ruburakigongwe. Yamara, yaragaragaje bimwe biboneka ukwicisha bugufi, umutima rugabo be n’agatima ko kwitanga. Dushobora gute ‘gufatira akarorero’ kuri kamere nziza Yona yari afise?—Yak. 5:10.
2. Dushobora gute kwigana ukwicisha bugufi kwa Yona?
2 Ukwicisha bugufi: Yona yabanje gufata inzira ija mu karere gahushanye n’ako yari yarungitswemwo. Ivyo ntibitangaje kubera ko Abashuri bari bazwi ko ari inkazi, kandi Ninewe yahavuye yitwa ko ari “igisagara gisesa amaraso.” (Nah. 3:1-3) Naho vyari ukwo, Yehova yaratoje indero Yona, uno akaba yaragaragaje ukwicisha bugufi mu kwemera kuja iyo yari yarungitswe igihe yasubira guhabwa akaryo ko kubigira. (Imig. 24:32; Yona 3:1-3) Naho mu ntango yari yabanje kugonanwa, yarakoze ivyo Yehova agomba. (Mat. 21:28-31) Twoba natwe twiyemeje kwamamaza inkuru nziza, naho mbere twoba twatojwe indero canke tukaba dufise icibare kigoye?
3. Ni mu mice iyihe y’ubusuku bwacu dukeneye umutima rugabo n’ukwitanga?
3 Umutima rugabo n’ukwitanga: Igihe Yona yabona ko ingingo mbi yari yafashe yariko iratuma abagendesha imeri bahakwa kuhasiga ubuzima, yaragize umutima ukunze wo guheba ubuzima bwiwe. (Yona 1:3, 4, 12) Mu nyuma, igihe yariko ararangura igikorwa yari yashinzwe i Ninewe, yarinjiye cane muri ico gisagara, kumbure arondera ahantu habereye hagati muri co kugira ngo atangure gutangaza urubanza rwa Yehova. Ivyo bintu, ntivyari gukorwa n’umunyabwoba, ariko vyari gukorwa n’umuhanuzi w’Imana afise umutima rugabo! (Yona 3:3, 4) Tweho bite muri iki gihe? Turakeneye umutima rugabo uva ku Mana kugira ngo dushinge intahe n’ubutinyutsi mu bantu baturwanya. (Ivyak. 4:29, 31) Agatima ko kwitanga karakenewe kugira ngo dukoreshe umwanya wacu n’ubutunzi bwacu mu busuku.—Ivyak. 20:24.
4. Kubera iki dukwiye gufata akanya ko kuzirikana ku karorero keza k’abahanuzi ba Yehova?
4 Igihe cose usomye inkuru yerekeye umwe mu bahanuzi ba Yehova, uzogira ico uhigiye niwiha ishusho ubwawe uri mu mimerere yarimwo. Niwibaze uti: ‘Iyaba jewe nari kuvyifatamwo gute? Nokwigana gute kamere ziwe nziza mu buzima bwanje?’ (Heb. 6:11, 12) Ibindi biganiro bizosohoka mu Gikorwa dukorera Ubwami bizoca irya n’ino ibindi vyigwa bihambaye dushobora kwigira ku bandi bahanuzi ba Yehova b’abizigirwa.