Turyohore ubuhanga bwacu mu busuku—Niwame ushira abantu ibinyamakuru

Igituma bihambaye: Abantu benshi bakunda gusoma ibinyamakuru vyacu usanga batipfuza ko twigana Bibiliya. Bashobora kuba batipfuza guhindura idini canke bakaba babona ko ata mwanya boronka wo kwiga. Ariko, uko baguma basoma ibinyamakuru vyacu, boshobora gucambirwa Ijambo ry’Imana. (1 Pet. 2:2) Hari igihe hogira ikiganiro kibakora ku mutima, canke ivyabo bigahinduka. Kwama tuza turabagendera gatoyi bizotuma tuba abagenzi kandi bizodufasha kumenya ibibashimisha n’ibibaraje ishinga. Amaherezo, boshobora gutangura kwiga Bibiliya.

Uko twobigira:

Buri kwezi, nutegekanye igihe uzoza urashira abantu ibinyamakuru Umunara w’Inderetsi na Be maso! biheruka gusohoka. Kumbure woshobora gusubira kubagendera muri ukwo kwezi nyene kugira ngo ubavyurire akayabagu ko gusoma ikiganiro kanaka co mu binyamakuru wabasigiye, canke kugira ubahe ibisohokayandikiro biba biriko birashikirizwa muri ukwo kwezi. Nugire utwo wanditse.—Raba Igikorwa dukorera Ubwami co muri Nzero 2014, rup. 3.
Niwitegure imbere y’uko ushira umwe wese ibinyamakuru. Aho gupfa kumuha ibinyamakuru, nimuganire wongere ugerageze kumugira umugenzi kugira ngo utume arushiriza gushimishwa.
Uronse akaryo ko gutanguza inyigisho ya Bibiliya, ntukagishe. Umuntu wama ushira ibinyamakuru akubajije ico Bibiliya ivuga ku ciyumviro kanaka, nuce umuzanira igisohokayandikiro dukoresha mu kuyobora inyigisho za Bibiliya kirimwo inyishu y’ico kibazo maze muyiganireko. Imbere y’uko musezerana, numubaze ikibazo gifitaniye isano n’ico mwariko muraganirako maze muzoce mukiganirako niwagaruka. Igihe wama uganira n’umuntu ukoresheje Bibiliya na kimwe mu bisohokayandikiro dukoresha mu kuyobora inyigisho za Bibiliya kandi mukaba muganira mu buryo buri ku rutonde, naho mwoba muganira akanya gatogato, uba uriko urayobora inyigisho ya Bibiliya. Woba warahaye umuntu wama ushira ibinyamakuru agatabu Inkuru nziza wongera uramwereka ingene yokwiga Bibiliya mu kanya gatoyi? Woba waramweretse ya videwo ivuga ngo Ni kubera iki ukwiye kwiga Bibiliya? n’imwe ivuga ngo Ingene dufasha abantu kwiga Bibiliya? Naho uwo muntu ashobora kuba ubwa mbere atashimye kwiga Bibiliya, ibintu birahinduka. Ubona wosubira kugerageza?

Muri uku kwezi nugerageze iki kintu:

Nugire urutonde rw’abantu wokwama ushira ibinyamakuru. Nubashire ibinyamakuru biheruka gusohoka maze ubabwire ko uzobazanira n’ibindi bizosohoka.