Turyohore ubuhanga bwacu mu busuku—Kwamamaza mu bibanza bikorerwamwo ivy’ubudandaji

Igituma bihambaye: Kubera ko abantu benshi bamara umwanya muremure bari ku kazi, uburyo bwiza kuruta bwo kubaronka kugira ngo tubabwire inkuru nziza y’Ubwami ni ukubasanga aho bakorera. Kwamamaza mu bibanza vy’ubudandaji birashobora kuba ibiteye umunezero kandi bikavamwo ivyiza kuko abadandaza tutabaronka i muhira kandi akenshi bakaba bakirana urupfasoni abantu babona ko bashobora kubashorera. Kugira ngo bigende neza, abamamaji bategerezwa kwiyubara kandi bakwiye kwambara no kwitunganya mu buryo bwiza. (2 Kor. 6:3) Ku bw’ivyo, umucungezi w’umurimo akwiye gukurikirana incuro ibibanza vy’ubudandaji bikorerwamwo be n’ababikoreramwo.

Uko twobigira:

Nutegure uburyo bwo gutanguza ikiyago bugufi. Hamwe twomutwara umwanya munini vyoshobora gutuma atatwakira ikindi gihe.
Nubagendere igihe ata bakiriya benshi bafise, nk’akarorero bacugurura.
Niwihatire kubanza kuyagisha uwujejwe aho hantu. Nugire igishika wongere ubayagishe neza. Ushobora kuvuga uti: “Turiko tugendera gatoyi abantu tubasanze aho bakorera kuko bitoroshe kubatora i muhira.” Nuce make mu gutanguza ikiyago hama uce umuha agapapuro k’inkuru nziza, ibinyamakuru, canke ikindi gisohokayandikiro. Kugira ngo ntibatwitiranye n’abagenda bacuruza, vyoba vyiza tutavuze ivy’intererano kiretse batubajije ukuntu amahera akoreshwa mu gikorwa cacu aboneka.
Niba uwujejwe aho hantu yakwakiriye neza, numusabe uruhusha rwo kuganira gatoya n’abandi bakozi. Mu bibanza bimwebimwe vy’ubudandaji, vyoba vyiza dusavye uruhusha rwo gushira aho bafatira akayaga ibisohokayandikiro bikeyi vyo gusoma.
Niwiyubare kandi uhuze n’uko ibintu vyifashe. Nk’akarorero, igihe umudandaza ariko aravugana n’umukiriya canke akaba afatiriwe, nurindire gushika ahejeje.

Muri uku kwezi nugerageze iki kintu:

Ku mugoroba uhariwe Ugusenga kwo mu muryango kwanyu ukurikira nimwimenyereze ukuntu mwotanguza ikiyago muri make hamwe mwokwamamaza mu bibanza bikorerwamwo ivy’ubudandaji.