Mufatire akarorero ku bahanuzi—Habakuki
1. Ni gute ivyacu bisa n’ivy’umuhanuzi Habakuki?
1 Kubera ko ubugizi bwa nabi buguma bwiyongera muri ino si, twoshobora kwiyumva nka Habakuki, uwabajije Yehova ati: “Kubera iki unyereka ibintu bibabaza, ukaguma witegereza ivyago?” (Hab. 1:3; 2 Tim. 3:1, 13) Kuzirikana ku karorero kiwe k’ukudahemuka no ku butumwa yashikiriza, vyoshobora kudufasha kuguma dushikamye magingo tukirindiriye umusi w’urubanza wa Yehova.—2 Pet. 3:7.
2. Twokwerekana gute ko tubeshwaho n’ukwizera?
2 Nubeshweho n’ukwizera: Aho kureka ngo arengerwe n’ibihe bibi yariko aracamwo, Habakuki yagumye ari maso mu vy’impwemu afise n’umwete. (Hab. 2:1) Yehova yarakuye amazinda uwo muhanuzi y’uko iryo yavumereye rizoranguka ku gihe cashinzwe be n’uko ‘umugororotsi azobandanya kubeshwaho [“n’ukwizera,” Bibiliya Yera] kwiwe.’ (Hab. 2:2-4) None ivyo bisobanura iki ku bakirisu bo muri iki gihe, aho igihe c’iherezo kigeze kure? Kwemera udakeka ko iherezo rizoza ni co kintu gihambaye kuruta kumenya aho rizozira. Ukwizera kuradufasha kuguma turi maso no gushira imbere igikorwa co kwamamaza.—Heb. 10:38, 39.
3. Ni kubera iki twogumana akanyamuneza mu murimo turangurira Yehova?
3 Niwigine Yehova: Gogi w’i Magogi niyatera abasavyi ba Yehova, ukwizera kwacu kuzogeragezwa. (Ezk. 38:2, 10-12) Intambara irateza ingorane, mbere no ku bashobora gutahukana intsinzi. Ibifungurwa vyoshobora gukena, abantu bagatakaza ivyo batunze n’uburyo bwo kubaho bugahinduka. Tuzovyifatamwo gute ingorane nizaduka? Kubera ko Habakuki yari azi ko yoshikiwe n’ingorane, yaciye yiyemeza kugumana akanyamuneza kiwe mu gukorera Yehova. (Hab. 3:16-19) “Akanyamuneza ka Yehova” na twebwe kazodufasha kwihanganira ibigeragezo bizodushikira.—Neh. 8:10; Heb. 12:2.
4. Ni igiki cotuma twironkera akanyamuneza ubu no muri kazoza?
4 Abo Yehova azokingira ku musi wiwe w’urubanza bazoguma bigishwa inzira ziwe. (Hab. 2:14) N’abazoba bazutse bazokwiga ivyerekeye Yehova. No muri kino gihe, ese twokoresha akaryo kose turonse tukavuga ivyerekeye Yehova n’ibikorwa vyiwe bitangaje!—Zab. 34:1; 71:17.