Bariboneye urukundo mu bikorwa

YOMARA na basazawe, ari bo Marcelo na Hiver, baba mu kigwati gitoyi co muri Gwatemala. Yomara ni we yatanguye kwiga Bibiliya n’Ivyabona, mu nyuma basazawe na bo barakurikira. Mugabo bari bafise ingorane. Uko ari batatu ni impumyi, kandi ntibari bazi gusoma inyuguti z’impumyi. Uwabigisha Bibiliya rero ni we yabasomera ingingo be n’Ivyanditswe vyo muri Bibiliya.

Iyindi ngorane bari bafise kwari ukwitaba amakoraniro y’ishengero. Ntibashobora kwijana ku Ngoro y’Ubwami yari hafi yabo, rukaba rwari urugendo rw’iminuta 40. Ariko abavukanyi bo muri iryo shengero baratunganije ivyo kuza barabazana ku makoraniro. Igihe abo bavukana batangura gushikiriza ibiganiro vy’abanyeshure mw’ikoraniro ry’Ubuzima bwacu n’igikorwa cacu, abavukanyi barabafashije gufata ku mutwe ibiganiro vyabo.

Muri Rusama 2019, amakoraniro yaratanguye kugirirwa mu kigwati iwabo. Ico gihe, hari umugabo n’umugore b’abatsimvyi basanzwe bari barimukiye muri ico kigwati. Baciye bishingira umugambi wo kubigisha bose uko ari batatu gusoma no kwandika inyuguti z’impumyi, naho uwo mugabo n’umugore batari bazi ingene bobigenza. Baciye baja ahari ububiko bw’ibitabu kwiga ibijanye n’inyuguti z’impumyi be n’uburyo bokoresha mu kwigisha abandi.

Mu mezi makeyi gusa, abo bavukana uko ari batatu bari bamaze kumenya gusoma neza inyuguti z’impumyi, ivyo bikaba vyatumye barushiriza gutera imbere mu vy’impwemu. Ubu Yomara, Marcelo na Hiver ni abatsimvyi basanzwe. Marcelo ni umukozi w’ishengero. Bamara indwi yose bakorana umwete igikorwa ca Yehova. Umwete wabo warandukiye abandi.

Uko ari batatu barakenguruka cane kubona ingene ishengero ryabashigikiye ribigiranye urukundo. Yomara avuga ati: “Kuva umusi twabonana n’Ivyabona, baratugaragarije urukundo ruranga abakirisu b’ukuri.” Marcelo yongerako ati: “Turifitiye abagenzi beza mw’ishengero, kandi turi mu bagize umuryango w’abavukanyi ukwiye kw’isi yose urangwa urukundo.” Yomara na basazawe barashashaye kubona umusi isi izohinduka ikaba iparadizo.—Zab. 37:10, 11; Yes. 35:5.