Ingene ishengero ryokwigana ukuntu Yehova abona abacumuzi

1. Yehova yipfuriza iki abantu bose?

YEHOVA yaremanye abantu uburenganzira bwo kwihitiramwo. Ubwo burenganzira twama tubukoresha mu gufata ingingo. Ingingo ihambaye kuruta izindi zose umuntu yofata, ni ukwiyegurira Yehova akaba umwe mu bagize umuryango wiwe. Ico ni co Yehova yipfuza ko abantu bose bokora. Uti kubera iki? Kubera ko akunda abantu kandi akaba abipfuriza ineza. Yipfuza ko bagiranira na we ubucuti bwiza maze bakazobaho ibihe bidahera.—Gus. 30:​19, 20; Gal. 6:​7, 8.

2. Yehova ashaka ko abacumuzi batarigaya bakora iki? (1 Yohani 2:1)

² Naho ari ukwo, Yehova nta n’umwe ahatira kumukorera. Arareka umwe wese akihitiramwo ico yokora. Bite none nka hamwe umukirisu yabatijwe ahisemwo kurenga itegeko ry’Imana, agakora igicumuro gikomeye? Iyo atigaye, arakurwa mw’ishengero. (1 Kor. 5:13) Ariko n’ico gihe nyene, Yehova aguma yiteze ko uwo mucumuzi azomugarukako. Kanatsinda, ikintu nyamukuru catumye atanga incungu, ni ukugira ngo abacumuzi bigaya bashobore kubabarirwa. (Soma 1 Yohani 2:1.) Imana yacu y’urukundo irahimiriza abacumuzi ibigiranye umutima mwiza ngo bigaye.—Zak. 1:3; Rom. 2:4; Yak. 4:8.

3. Twihweza ibiki muri iki kiganiro?

³ Yehova yipfuza ko twigana ukuntu abona igicumuro n’abacumuzi. Iki kiganiro kiraza kutwereka ingene twomwigana. Kiraza kutwereka (1) ingene ishengero ry’i Korinto ryo mu kinjana ca mbere ryatunganije ikibazo c’umuvukanyi yari yakoze igicumuro gikomeye, (2) ivyo intumwa Pawulo yasavye iryo shengero gukora uwo mucumuzi amaze kwigaya, (3) ico iyo nkuru itwigisha ku bijanye n’ingene Yehova abona ababa bakoze igicumuro gikomeye.

INGENE ISHENGERO RY’I KORINTO RYATUNGANIJE IKIBAZO C’UWAKOZE IGICUMURO GIKOMEYE

4. Ni ibiki vyabaye mw’ishengero ry’i Korinto mu kinjana ca mbere? (1 Abakorinto 5:​1, 2)

⁴ Soma 1 Abakorinto 5:​1, 2. Igihe Pawulo yari mu rugendo rwa gatatu rw’ubumisiyonari, yarumvise amakuru adahumuriza y’ivyabaye mw’ishengero ry’i Korinto ryaheruka gushingwa. Muri iryo shengero, hari umuvukanyi yasambana na mukase. Ico kintu cari agahomerabunwa, kuko ‘kitanavugwa no mu mahanga.’ Ishengero ryarirengagiza inyifato y’uwo muvukanyi nk’aho ata co itwaye. Bishoboka ko bamwe mu barigize biyumvira ko kubigenza gutyo kwari ukwigana imbabazi Imana igaragariza abantu badatunganye. Ariko Yehova ntarenza uruho rw’amazi ku bibi bikorerwa mw’ishengero. Iyo nyifato iteye isoni y’uwo mugabo kandi y’akagagazo, yariko iratukisha ishengero. Ashobora kandi kuba yariko arosha abandi bo mw’ishengero bifatanya na we. None Pawulo yaciye asaba iryo shengero gukora iki?

5. Pawulo yasavye ishengero gukora iki, kandi yashatse kuvuga iki? (1 Abakorinto 5:13) (Raba n’ifoto.)

⁵ Soma 1 Abakorinto 5:13. Pawulo ahumekewe n’Imana yarandikiye ikete iryo shengero arisaba gukura muri ryo uwo mucumuzi atigaya. None abagize ishengero bari kumufata gute? Pawulo yababwiye ngo ‘bareke kwifatanya’ na we. None ivyo vyasobanura iki? Pawulo yababwiye ko iryo tegeko ryarimwo ‘no kudasangira na we.’ (1 Kor. 5:11) Gusangira n’umuntu birashobora gutuma murushiriza kumarana umwanya no kuyaga. Biboneka rero ko Pawulo yashaka kuvuga ko abagize ishengero batari bakwiye kumarana umwanya n’uwo muntu. Ivyo vyotumye atabandukiza iyo nyifato mbi. (1 Kor. 5:​5-7) Vyongeye, kutifatanya cane n’uwo muntu vyomufashije kubona ko yababaje cane Yehova, maze akamaramazwa n’ivyo yakoze bigatuma yigaya.

6. Ishengero be n’uwo mucumuzi bakiriye gute iryo kete rya Pawulo?

⁶ Pawulo amaze kurungikira iryo kete abakirisu b’i Korinto, ashobora kuba yaribajije ingene boryakiriye. Tito yahavuye amuzanira agakuru keza kavuga ko baryakiriye neza. (2 Kor. 7:​6, 7) Bari bashize mu ngiro ivyo yababwiye. N’igishimishije kuruta, ni uko mu mezi yari ahaciye kuva Pawulo yanditse iryo kete, na wa mucumuzi yari yigaye. Yari yarahinduye inyifato atangura kubaho yisunga ingingo ngenderwako za Yehova zigororotse. (2 Kor. 7:​8-11) None ico gihe hoho, Pawulo yaciye asaba ishengero gukora iki?

INGENE ISHENGERO RYARI GUFATA WA MUCUMUZI AMAZE KWIGAYA

7. Gukura wa mucumuzi mw’ishengero vyavuyemwo iki? (2 Abakorinto 2:​5-8)

⁷ Soma 2 Abakorinto 2:​5-8. Pawulo yavuze yuko ‘ukwo gukosorwa na benshi kwari guhagije kuri uwo muntu.’ Mu yandi majambo, indero yatojwe yari yamufashije cane. Uti gute? Yaratumye yigaya.—Heb. 12:11.

8. Ni ibiki Pawulo yaciye asaba iryo shengero gukora?

⁸ Pawulo yasavye abagize iryo shengero ‘kubabarira n’umutima mwiza’ uwo muvukanyi yari yahuvye ‘bakongera bakamuhoza’, kandi ‘bakamwereka ko bamukunda.’ Urabona ko Pawulo yashaka ko bakora n’ibindi uretse gusa kumugarukana mw’ishengero. Pawulo yashaka ko mu mvugo no ngiro basubiriza umutima mu nda uwo mugabo yari yigaye, bakamwereka ko bamubabariye vy’ukuri kandi ko bamukunda. Ivyo vyari gutuma uwo muvukanyi yumva yisanze mw’ishengero.

9. Kubera iki hari abo vyoba vyaragoye kubabarira uwo mucumuzi yari yigaye?

⁹ Hoba hari abo bitoroheye guha ikaze uwo mucumuzi yari yigaye akagaruka mw’ishengero? Iyo nkuru nta vyo ivuga. Ariko birashoboka ko bariho. Nakare ivyo yakoze vyari vyahungabanije ishengero ryose, kumbure mbere biranasiga iceyi abantu bamwebamwe. Bamwe muri bo bashobora kuba babona yuko bitari bibereye ko uwo mugabo asubira guhabwa ikaze mw’ishengero, narirya bobo bari bagumye bakora uko bashoboye kwose ngo bagume badahumanye. (Gereranya na Luka 15:​28-30.) Kubera iki none vyari bihambaye ko iryo shengero rigaragariza urukundo nyakuri uwo muvukanyi yari agarukanywe?

10-11. Vyari kugenda gute iyo abakurambere banka kubabarira uwo mucumuzi yari yigaye?

¹⁰ Iyumvire ingene vyari kugenda iyo abakurambere banka kugarukana mw’ishengero uwo mugabo yari yigaye vy’ukuri, canke na ho amaze kugarukanwa ishengero ntirimugaragarize urukundo. Ivyo vyari gushobora gutuma yicwa «n’umubabaro urenze urugero.» Yari guca yihebura ntabe akigira n’akigoro ko kunagura ubucuti afitaniye n’Imana.

¹¹ N’ikibabaje kuruta, iyo abavukanyi na bashiki bacu banka kubabarira uwo mucumuzi yari yigaye, bobaye bashize mu kaga ubucuti bari bafitaniye na Yehova. Uti kubera iki? Kubera ko batobaye bariko barigana imbabazi Yehova agaragariza abacumuzi bigaya. Ahubwo bobaye biganye agatima kabi ka Shetani ko kutababarira. Ni nk’aho bobaye bemeye ko Shetani abakoresha kugira ngo bace intege uwo mugabo ntabandanye gukorera Yehova.—2 Kor. 2:​10, 11; Ef. 4:27.

12. Ishengero ryari kwigana gute Yehova?

¹² None ishengero ry’i Korinto ryari kwigana gute Yehova aho kwigana Shetani? Ryari kubigira mu kwigana ukuntu Yehova afata abacumuzi baba bigaye. Raba ivyo abanditsi bamwebamwe ba Bibiliya bavuze ku bijanye na Yehova. Dawidi yavuze ati: ‘Ni mwiza kandi yiteguriye kubabarira.’ (Zab. 86:5) Mika yanditse ati: «Imana imeze nkawe ni iyihe, iharira ikosa, ikirengagiza igicumuro?» (Mika 7:18) Yesaya na we yanditse ati: «Umubisha nahebe inzira yiwe, umunyakibi ahebe ivyiyumviro vyiwe. Nagaruke kuri Yehova, azomugirira imbabazi, agaruke ku Mana yacu, kuko izomubabarira cane.»—Yes. 55:7.

13. Kubera iki vyari bibereye ko wa mugabo agarukanwa mw’ishengero bidatevye? (Raba uruzitiro ruvuga ngo «Wa mugabo w’i Korinto yagarukanywe mw’ishengero ryari?»)

¹³ Kugira ngo ishengero ry’i Korinto ryerekane ko ryigana Yehova, ryategerezwa guha ikaze uwo mugabo yari yigaye no kumwereka ko rimukunda. Kubona iryo shengero ryarakurikije ivyo Pawulo yari yarisavye rigaha ikaze uwo mucumuzi yari yigaye, ryari ryerekanye ko ‘rigamburuka muri vyose.’ (2 Kor. 2:9) Naho hari haciye amezi makeyi gusa uwo muntu akuwe mw’ishengero, indero yatojwe yaratumye yigaya. Nta mvo n’imwe rero yari ihari yari gutuma bateba kumugarukana mw’ishengero.

INGENE TWOKWIGANA UBUTUNGANE BWA YEHOVA N’IMBABAZI ZIWE

14-15. Ni ivyigwa ibihe twigira ku kuntu ishengero ry’i Korinto ryatunganije ikibazo cari cavyutse? (2 Petero 3:9) (Raba n’ifoto.)

¹⁴ Inkuru ivuga ingene ishengero ry’i Korinto ryatunganije ikibazo cari cavyutse, yaranditswe muri Bibiliya kugira ngo ‘itwigishe.’ (Rom. 15:4) Iyo nkuru iratwigisha ko Yehova atarekerana ibicumuro bikomeye bikorwa mw’ishengero. Hari abokwiyumvira ko kubera ko Yehova ari umunyembabazi yoreka abacumuzi batigaya bakaguma mw’ishengero. Ariko rero ivyo Yehova ntavyerekwa. Naho Yehova ari Imana y’imbabazi, ntarekerana ibintu canke ngo ahindagure ingingo ngenderwako ziwe zigenga inyifato runtu. (Yuda 4) Nkako, kurekerana ibintu gutyo ntivyoba biranga imbabazi na gato, kuko vyoshira mu kaga ishengero ryose.—Imig. 13:20; 1 Kor. 15:33.

¹⁵ Naho ari ukwo, iyo nkuru iratwigisha kandi ko Yehova adashaka yuko hagira n’umwe ahona. Aripfuza gukiza abantu igihe cose bishoboka. Aragirira imbabazi abikubita agashi kandi bipfuza kunagura ubucuti bafitaniye na we. (Ezk. 33:11; soma 2 Petero 3:9.) Ni co gituma igihe wa mugabo wo mw’ishengero ry’i Korinto yigaya agaheba gukora igicumuro, Yehova abicishije kuri Pawulo yabwiye iryo shengero ko rikwiye kumubabarira rikongera rikamuha ikaze.

16. Uravye ingene ca kibazo caduka mw’ishengero ry’i Korinto catunganijwe, bituma wiyumva gute?

¹⁶ Gusuzuma ingene ca kibazo caduka mw’ishengero ry’i Korinto catunganijwe, vyadufashije kwibonera ingene Yehova ari Imana y’urukundo, y’ubugororotsi be n’ubutungane. (Zab. 33:5) None ivyo ntibikuvyurira umutima wo kurushiriza kumushemeza? Erega twese turakeneye imbabazi ziwe kubera ko turi abacumuzi. Twese turi n’imvo zo gukengurukira Yehova kubera incungu yatanze, iyituma bishoboka ko tubabarirwa ibicumuro vyacu. Ese ukuntu bihumuriza cane kumenya ko Yehova akunda abasavyi biwe vy’ukuri kandi ko abipfuriza ineza!

17. Tuzokwihweza ibiki mu biganiro bikurikira?

¹⁷ Tuvuge iki none muri iki gihe? Hagize uwukora igicumuro gikomeye, abakurambere bokwigana gute Yehova igihe bamufasha kugira ngo yigaye? Iyo abakurambere bafashe ingingo yo gukura umuntu mw’ishengero canke kumugarukana, abagize ishengero bakwiye kuvyakira gute? Ivyo bibazo bizokwishurwa mu biganiro bikurikira.