Bavukanyi mukiri bato, nimwigane Mariko na Timoteyo

1-2. Ni ibiki vyari gushobora gutuma Mariko na Timoteyo batitanga mu murimo wa Yehova bimwe bishitse?

BAVUKANYI mukiri bato, mwoba mwipfuza gukora vyinshi mu murimo wa Yehova no gufasha cane abagize ishengero? Nta nkeka ko muvyipfuza. Birakora ku mutima cane kubona abavukanyi benshi bakiri bato bafise umutima ukunze wo gukorera abandi. (Zab. 110:3) Ariko ntiwumve, vyoshobora kutaborohera. Woba ugonanwa kwagura umurimo kubera gutinya ivyohava bigushikira? Canke, vyoba birashika ukanka gushingwa igikorwa kanaka kubera ko wumva ko utogishobora? Nimba bimaze kugushikira, uri mu bandi.

² Mariko na Timoteyo na bo nyene barashikiwe n’ibintu nk’ivyo. Ariko rero ntibaretse ngo gutinya ivyohava bibashikira, canke kwumva ko hari ivyo badashoboye, ngo bibabuze kwagura umurimo. Igihe intumwa Pawulo na Barunaba basaba Mariko ko bojana mu rugendo rwabo rwa mbere rw’ubumisiyonari, biboneka ko Mariko yibanira na nyina mu nzu yabo nziza. (Ivyak. 12:​12, 13, 25) Ariko Mariko yaremeye guheba ubwo buzima kugira ngo yagure umurimo. Ubwa mbere, yagiye i Antiyokiya. Mu nyuma, yaraherekeje Pawulo na Barunaba no mu yindi mihingo ya kure cane. (Ivyak. 13:​1-5) Timoteyo na we nyene ashobora kuba yabana n’abavyeyi biwe igihe Pawulo yamusaba ko bojana mu gikorwa co kwamamaza. Kubera ko Timoteyo yari akiri muto kandi akaba atari bwamenye utuntu n’utundi, yari gushobora kwanka kujana na we kubera ko yumva ko ata vyo yoshobora. (Gereranya na 1 Abakorinto 16:​10, 11 be na 1 Timoteyo 4:12.) Aho kubigenza gutyo, yaremeye kujana na Pawulo kandi ivyo vyatumye yironkera imihezagiro myinshi.—Ivyak. 16:​3-5.

3. (a) Twemezwa n’iki ko Pawulo yaha agaciro Mariko na Timoteyo? (2 Timoteyo 4:​6, 9, 11) (Raba n’amafoto.) (b) Ni ibibazo ibihe tuza guca irya n’ino muri iki kiganiro?

³ Mariko na Timoteyo, bize kwitwararika amabanga ahambaye yo mw’ishengero bakiri bato. Pawulo yaraha agaciro cane abo basore, ku buryo igihe yabona ko yari yimirije gupfa yipfuza ko boba bari iruhande yiwe. (Soma 2 Timoteyo 4:​6, 9, 11.) Ni kamere izihe none zatumye Pawulo akunda ukuraho Mariko na Timoteyo? Abavukanyi bakiri bato bokwigana gute Mariko na Timoteyo? Vyongeye, impanuro ziranga urukundo Pawulo yatanze, zofasha gute abavukanyi bakiri bato?

NIWIGANE MARIKO MU GUKORERA ABANDI N’UMUTIMA UKUNZE

4-5. Mariko yerekanye gute ko afise umutima ukunze wo gukorera abandi?

⁴ Twisunze ibivugwa n’igitabu kimwe, gukorera abandi bitekeye iciyumviro co kugira akigoro ko kubafasha «ubigiranye umwete kandi ukumirako naho vyoba bigoye.» Mariko yarabaye intangakarorero muri ivyo. Igihe Pawulo yanka ko bajana mu rugendo rwa kabiri rw’ubumisiyonari, Mariko ashobora kuba yarababaye kandi aravunika umutima. (Ivyak. 15:​37, 38) Ariko rero, ivyo ntivyatumye Mariko acika intege ngo areke gukorera abavukanyi biwe.

⁵ Mariko yaremeye kujana na muvyarawe Barunaba gukorera mu kandi karere. Haciye nk’imyaka 11, Mariko yari mu bantu bitwararitse Pawulo igihe yapfungirwa i Roma ari ryo rya mbere. (Flm. 23, 24) Pawulo yarashimye cane ukwo kuntu Mariko yamushigikiye, ku buryo yavuze ko ‘yamuhojeje cane.’—Kol. 4:​10, 11.

6. Kwifatanya n’abakirisu bahumuye vyafashije gute Mariko? (Raba akajambo k’epfo.)

⁶ Kwifatanya n’abakirisu bahumuye, vyarafashije cane Mariko. Haciye igihe Mariko ari kumwe na Pawulo i Roma, yahavuye aja i Babiloni, aho yasanze intumwa Petero. Barabaye abagenzi bashika ku buryo Petero yamwise ngo «umuhungu wanje Mariko.» (1 Pet. 5:13) Mu kiringo bamaze bakorana, birashoboka ko Petero yayagiye uwo mugenzi wiwe akiri muto ibintu vyinshi bishimishije vyerekeye ubuzima bwa Yezu n’igikorwa ciwe, ku buryo Mariko yahavuye avyandika mu Njili yitirirwa izina ryiwe.a

7. Umuvukanyi akiri muto yitwa Seung-Woo yiganye gute akarorero ka Mariko? (Raba n’ifoto.)

⁷ Mariko yagumye akorera Yehova abigiranye umwete kandi yagumye yiyegereza abavukanyi bahumuye. None womwigana gute? Nimba vyarashitse ntuterwe agateka wipfuza niwihangane, kandi ugume urondera utundi turyo two gukorera Yehova n’abagize ishengero. Raba akarorero k’umuvukanyi Seung-Woo, ubu akaba ari umukurambere. Igihe yari akiri muto yarakunda kwigereranya n’abandi bavukanyi bakiri bato. Bamwe muri bo bari baramutanze gushingwa amabanga mw’ishengero. Kubera ko Seung-Woo yumva ko yirengagijwe, yahavuye abiyagira abakurambere. Umwe muri bo yamuhanuye kwitanga cane agakorera abandi, mbere n’aho ivyiza akora abandi batoshoka babibona. Iyo mpanuro yatumye Seung-Woo atangura kuza arafasha abageze mu zabukuru be n’abakeneye uwobunguruza abajana ku makoraniro. Atereje amaso inyuma, avuga ati: «Nahavuye ntahura ico gukorera abandi bisobanura vy’ukuri. Nariboneye umunezero mwinshi umuntu yironkera iyo afashije abandi.»

NIWIGANE TIMOTEYO MU KWITWARARIKA ABANDI VY’UKURI

8. Kubera iki Pawulo yahisemwo Timoteyo ngo bajane? (Abafilipi 2:​19-22)

⁸ Igihe Pawulo yasubira mu bisagara vyarimwo abari baramurwanije, yari akeneye kujana n’abantu b’umutima rugabo. Yabanje guhitamwo umukirisu ahumuye yitwa Silasi ngo abe ari we bajana. (Ivyak. 15:​22, 40) Mu nyuma yarahisemwo na Timoteyo ngo bajane. Kubera iki none yamuhisemwo? Kimwe coco ni uko yavugwa neza. (Ivyak. 16:​1, 2) Vyongeye, yaritwararika abandi vy’ukuri.—Soma Abafilipi 2:​19-22.

9. Timoteyo yerekanye gute ko yitwararika abavukanyi vy’ukuri?

⁹ Kuva Timoteyo agitangura gukorana na Pawulo, yarerekanye ko yashira imbere inyungu z’abandi kuruta iziwe. Ni co gituma Pawulo atatinye kumusiga i Beroya kugira ngo aremeshe abigishwa bashasha. (Ivyak 17:​13, 14) Nta nkeka ko ico gihe hari vyinshi Timoteyo yigiye kuri Silasi, kuko na we nyene yari yagumye i Beroya. Ariko rero mu nyuma, Pawulo yararungitse Timoteyo wenyene i Tesalonika, kugira ngo akomeze abavukanyi bo muri ico gisagara. (1 Tes. 3:​2, akajambo k’epfo.) Mu myaka irenga nka 15 yakurikiye, Timoteyo yarize ‘kurirana n’abarira’, mu kugaragariza impuhwe uwo wese yaba ari mu ngorane. (Rom. 12:15; 2 Tim. 1:4) None abavukanyi bakiri bato bokwigana gute Timoteyo?

10. Umuvukanyi umwe yitwa Woo Jae yize gute kurushiriza kwitwararika abandi?

¹⁰ Umuvukanyi umwe yitwa Woo Jae yarize kurushiriza kwitwararika abandi. Vyaramugora cane kuyaga n’abavukanyi na bashiki bacu bamuruta. Ico yakora rero kwari ukubaramutsa gusa ku Ngoro y’Ubwami, agaca yigira. Hari umukurambere yamugiriye inama y’ukuntu yoza araganiriza abavukanyi, amubwira ko yohera ku kubabwira ikintu ashima kuri bo. Uwo mukurambere yamuhanuye no kuza ariyumvira ivyo abandi boba bakunda. Woo Jae yarakurikije iyo mpanuro. Ubu ni umukurambere. Avuga ati: «Bisigaye binyorohera cane kuyagisha abantu b’imyaka itandukanye. Ntiworaba ingene bindyohera kubona nsigaye ntahura neza ibiba biraje ishinga abandi. Ivyo vyaratumye mba kirumara mu gufasha abavukanyi banje.»

11. Abavukanyi bakiri bato, bokwiga gute kwitwararika abagize ishengero? (Raba n’ifoto.)

¹¹ Na mwebwe bavukanyi mukiri bato murashobora kwiga kwitwararika abandi. Igihe muri ku makoraniro, nimwiteho kuyagisha abantu bose mutaravye imyaka yabo canke aho bakuriye. Nubabaze amakuru yabo hama ubatege yompi. Ivyo birashobora gutuma umenya ingene wobafasha. Nk’akarorero, hari aho womenya ko umugabo n’umugore bitereye mu myaka bakeneye uwobafasha gukoresha JW Library^®. Canke na ho woshobora kumenya ko ata muntu bafise bokorana mu ndimiro. Ubona wofasha mwene abo bantu kumenya ingene bokoresha utwuma twabo two mu buhinga bwa none, canke ukitanga kugira ngo mukorane mu ndimiro? Wibwirije ugafasha abandi, uzoba utanze akarorero keza mw’ishengero.

IMPANURO ZIRANGA URUKUNDO PAWULO YATANZE ZOSHOBORA KUGUFASHA

12. Impanuro Pawulo yahaye Timoteyo zofasha gute abakiri bato?

¹² Pawulo yarahaye Timoteyo impanuro nziza zomufashije mu buzima no mu gikorwa yarangurira Yehova. (1 Tim. 1:18; 2 Tim. 4:5) Na mwebwe bavukanyi mukiri bato, mwoshobora kwungukira ku mpanuro ziranga urukundo Pawulo yatanze. Uti gute? Nimusome amakete abiri Pawulo yandikiye Timoteyo nk’aho ari mwebwe yandikiwe, muce muronderamwo impanuro mwokurikiza mu buzima bwanyu. Ehe raba uburorero bumwebumwe.

13. Ni igiki cogufasha kuguma uri intahemuka kuri Yehova?

¹³ «Wimenyereze ufise intumbero yo kwihebera Imana.» (1 Tim. 4:7b) Kwihebera Imana bisobanura iki? Ni ukuba intahemuka kuri Yehova, ukaguma ukora ibimuhimbara. Kubera ko ico kintu atari mvukanwa, turakeneye kugitsimbataza. None twobigira gute? Ijambo ry’ikigiriki ryahinduwe ngo «kwimenyereza», akenshi ryakoreshwa mu kudondora imyimenyerezo ikomeye abanonotsi bagira kugira bitegurire ihiganwa. Abo banonotsi vyasaba ko birinda ivyobasamaza. Na twebwe turakeneye kwirinda ivyodusamaza kugira ngo dushobore gukora ibintu vyotuma turushiriza kwiyegereza Yehova.

14. Ukwiye gusoma Bibiliya ufise intumbero iyihe? Tanga akarorero.

¹⁴ Urakwiye kwihatira kuza urasoma Bibiliya buri musi, ukabigira ufise intumbero yo kurushiriza kwiyegereza Yehova. Nk’akarorero, ni icigwa ikihe wokura ku kiyago Yezu yagiraniye n’umutware umwe w’umutunzi akiri muto? (Mrk. 10:​17-22) Uwo mugabo akiri muto, yaremera ko Yezu ari we Mesiya, ariko vyaramunaniye kuba umwigishwa wiwe. Naho ari ukwo, Yezu ‘yumvise amukunze.’ Ntukorwa ku mutima none n’ingene Yezu yayagishije uwo mugabo akiri muto? Biraboneka ko Yezu yashaka ko afata ingingo nziza. Vyongeye, urukundo Yezu yakunda uwo mugabo ni na rwo nyene Yehova yamukunda. (Yoh. 14:9) Uko uzirikana kuri iyo nkuru no ku kuntu ivyawe vyifashe, niwibaze uti: «Nokora iki kugira ngo ndushirize kwiyegereza Yehova no kwitangira cane abandi?»

15. Kubera iki bihambaye ko umuvukanyi akiri muto abera abandi akarorero keza? (1 Timoteyo 4:​12, 13)

¹⁵ «Nubere abizigirwa akarorero.» (Soma 1 Timoteyo 4:​12, 13.) Pawulo ntiyahimirije Timoteyo gutsimbataza gusa ubuhanga kanaka, nko gusoma canke kwigisha, ahubwo yamuhimirije no gutsimbataza kamere nziza, nk’urukundo, ukwizera be n’ukutandura. Uti kubera iki? Kubera ko imvugo irutwa n’ingiro. Dufate ko uhawe gushikiriza ikiganiro kivuga ibijanye no kugira umwete mu ndimiro. Nimba usanzwe uri umunyamwete mu ndimiro, uzogishikiriza umutima uri mu nda. Akarorero utanga kazotuma uvugana umwidegemvyo.—1 Tim. 3:13.

16. (a) Abavukanyi bakiri bato bakwiye kubera abandi akarorero mu bintu bitanu ibihe? (b) Umuvukanyi akiri muto yoba akarorero gute «mu mvugo»?

¹⁶ Muri 1 Timoteyo 4:​12, Pawulo aravuga ibintu bitanu umuvukanyi akiri muto yoberamwo abandi akarorero. Ubona gute mu kwiyigisha kwawe ufashe umwanya wo kuza urasuzuma kimwekimwe cose muri ivyo? Dufate ko wipfuza kubera abandi akarorero «mu mvugo.» Zirikana ku kuntu wokoresha imvugo yawe kugira ngo uremeshe abandi mu buryo butandukanye. Nimba ukibana n’abavyeyi bawe, ubona gute ugiye urabashimira ku vyo bagukorera? Inyuma y’amakoraniro, ubona gute ubwiye uwashikirije ikiganiro ikintu cagukoze ku mutima mu kiganiro ciwe? Mu gihe c’amakoraniro, woshobora no kuza uragerageza gutanga inyishu mu majambo yawe bwite. Wihatiye kuba akarorero mu mvugo bizokwerekana ko uriko uratera imbere mu vy’impwemu.—1 Tim. 4:15.

17. Ni ibiki vyofasha umuvukanyi akiri muto gushikira imigambi yiwe yo mu vy’impwemu? (2 Timoteyo 2:22)

¹⁷ «Hunga . . . ivyipfuzo vy’abakiri bato, mugabo ukurikirane ubugororotsi.» (Soma 2 Timoteyo 2:22.) Pawulo yahimirije Timoteyo kurwanya ivyipfuzo vyomusamaza bigatuma adashikira imigambi yiwe yo mu vy’impwemu kandi bikonona ubucuti afitaniye na Yehova. Na wewe woshobora gusanga hariho ibikorwa bimwebimwe, naho ubwavyo bitoba ari bibi, vyoba bituma udasigarana umwanya ukwiye wo gukorera Yehova. Nk’akarorero, zirikana ku mwanya umara uri muri siporo, uri kuri internet, canke uriko urakina udukino two kuri ordinateri. Ubona wogabanya umwanya umara muri ivyo kugira uwukoreshe mu murimo wa Yehova? Woshobora nko kwitanga ugafasha mu kubungabunga Ingoro y’Ubwami yanyu canke ugashigikira intunganyo ijanye no kwamamaza ku mugaragaro. Ugize uruhara muri ivyo bikorwa, birashoboka ko uzoronka abagenzi bashasha bazogufasha kwishingira imigambi yo mu vy’impwemu no kuyishikako.

GUKORERA ABANDI BIRAZANA IMIHEZAGIRO

18. Kubera iki twovuga ko Mariko na Timoteyo bahisemwo ubuzima bwiza?

¹⁸ Mariko na Timoteyo baragize ivyo bahevye kugira ngo bitangire abandi bimwe bishitse, kandi vyatumye bahimbarwa cane mu buzima. (Ivyak. 20:35) Mariko yaragiye mu mihingo itandukanye y’isi kugira ngo akorere abavukanyi biwe. Yaranditse n’inkuru iryoshe yerekeye ubuzima bwa Yezu n’igikorwa ciwe. Timoteyo yarafashije Pawulo gushinga amashengero no gukomeza abavukanyi. Emwe biraboneka ko Yehova yashimye uwo mutima wo kwitanga Mariko na Timoteyo bagaragaje!

19. Kubera iki abavukanyi bakiri bato bakwiye kwitwararika cane impanuro Pawulo yahaye Timoteyo, kandi babigize bizovamwo iki?

¹⁹ Urukundo Pawulo yakunda umugenzi wiwe akiri muto Timoteyo ruribonekeza neza mu makete yamwandikiye. Ayo makete yahumetswe n’Imana arerekana kandi ko Yehova abakunda cane na mwebwe bavukanyi mukiri bato. Yipfuza ko mumukorera muhimbawe. Nimufate nka nkama rero impanuro iranga urukundo Pawulo yatanze, mwongere mwihatire gukorera abandi bimwe bishitse. Ivyo bizotuma mugira ubuzima buhimbaye muri iki gihe, muri kazoza na ho ‘muzocakire ubuzima nyakuri.’—1 Tim. 6:​18, 19.