Ivyigwa wa Mwigisha wacu ahambaye yanyigishije mu buzima

AKARORERO K’ABAVYEYI BANJE

Mu 1957, abavyeyi banje baravuye mu Butaliyano bimukira i Kindersley, mu ntara ya Saskatchewan muri Kanada. Haciye igihe gito bimukiyeyo barize ukuri, kandi umuryango wacu wagumye uha agaciro ukwo kuri. Ndibuka ko nkiri umwana namara umwanya munini mu ndimiro, ndi kumwe n’abo mu muryango wacu. Ni co gituma nkunda gutwenza abantu ndababwira ko nabaye umutsimvyi afasha mfise imyaka umunani.

Naho abavyeyi banje bari bakenye, bari intangakarorero mu gushira imbere Yehova mu buzima bwabo. Nk’akarorero, mu 1963 baragurishije vyinshi mu vyo bari batunze kugira bongerereze amahera yo kwitaba ihwaniro mpuzamakungu ryabereye i Pasadena, muri Leta ya Kaliforniya muri Amerika. Mu 1972, umuryango wacu waciye wimukira ku bilometero nka 1.000, mu gisagara citwa Trail mu ntara ya Colombie-Britannique, muri Kanada. Ico gihe twimukiyeyo tugiye kubwira inkuru nziza abavuga igitaliyano. Dawe yakora akazi k’isuku no kubungabunga imangazini. Yaranse gukora ubundi buzi bwari kumuha amahera menshi kugira ashobore kwitunira ku gikorwa ca Yehova.

Ndakenguruka cane akarorero abavyeyi bacu badusigiye, twese uko tuvukana turi bane. Akarorero kabo karambereye umushinge w’iterambere nagize mu vy’impwemu, kongera karanyigisha iki cigwa gihambaye mu buzima: Ninashira ivy’Ubwami mu kibanza ca mbere, Yehova azonyitwararika.—Mat. 6:33.

NTANGURA UMURIMO W’IGIHE COSE

Mu 1980, narubakanye n’umudada yasa n’irirenga yitwa Debbie, yari afise imigambi itomoye yo mu vy’impwemu. Kubera ko twipfuza gukora umurimo w’igihe cose, Debbie yaciye atangura gukora ubutsimvyi inyuma y’amezi atatu twubakanye. Haciye umwaka twubakanye, twaciye twimukira mw’ishengero ritoyi ryari rikeneye abamamaji, nanje nca ndatangura ubutsimvyi.

Haciye igihe, twaracitse intege duca twiyumvira kuvayo. Ariko imbere yo kuvayo, twabanje kuyaga n’umuhagarikizi w’umuzunguruko. Abigiranye umutima mwiza kandi adacisha ku ruhande, yatubwiye ati: «Erega na mwebwe ubwanyu murica intege. Mugumiza umutima ku bitagenda neza. Ariko hamwe mwowushira ku biriko bigenda neza, mwobibona.» Emwe, iyo mpanuro ni yo twari dukeneye! (Zab. 141:5) Twaciye tuyikurikiza, kandi bidatevye twariboneye ko hari ivyiza vyinshi twariko turirengagiza. Abatari bake mw’ishengero baripfuza kurushiriza gukorera Yehova, ushizemwo n’abakiri bato be na bamwebamwe mu bari bubakanye n’abo badasangiye ukwizera. Basha, ico cigwa carinjiye. Twarize kuza turarondera ivyiza mu bintu biba biriko biradushikira, no kurindira ko Yehova akosora ibintu. (Mika 7:7) Twaciye dusubira kugira umunezero kandi ibintu vyahavuye bigenda neza.

Abigisha batwigishije mw’ishure rya mbere ry’abatsimvyi, bari barakoreye mu mahanga. Igihe batwereka amafoto, bakatwiganira ingorane baciyemwo n’imihezagiro bironkeye, vyaciye bituma twipfuza kuba abamisiyonari. Twaciye rero dufata ingingo zotuma dushika kuri uwo mugambi.

Muri iyo ntumbero, mu 1984 twaciye twimukira mu ntara ya Kebeke ahavugwa igifaransa, akaba ari ku bilometero birenga 4.000 uvuye muri Colombie-Britannique, aho twari dusanzwe tuba. Ivyo vyasaba ko twiga imico mishasha n’ururimi rushasha. Iyindi ngorane, ni uko akenshi wasanga ata buryo bukwiye dufise. Igihe kimwe harabavye, ku buryo hari umurimyi umwe yatwemereye kuja gutoragura uturaya mu murima iwe, kugira tube turamaze na kabiri. Debbie yahavuye aba umuhinga mu bijanye no guteka ibiraya mu buryo butandukanye. Naho twari muri izo ngorane, twagumye twihatira kugumana umunezero. Vyongeye, twaribonera ko Yehova yaguma atwitwararika.—Zab. 64:10.

Umusi umwe, twagiye twumva telefone idutumira kuja gukorera kuri Beteli yo muri Kanada. Kubera ko imbere y’aho twari twarasavye kwitaba Ishure rya Gileyadi, igihe twatumirwa kuja gukorera kuri Beteli, ku ruhande rumwe twararyohewe ku rundi na ho turacika intege. Naho ari ukwo twaremeye ubwo butumire. Igihe twashika kuri Beteli, twarabajije umuvukanyi Kenneth Little yari muri Komite y’ishami duti: «None ko twari twasavye kwitaba Ishure rya Gileyadi, bizoca bigenda gute?» Yishuye ati: «Bizokwigwa nihagera.»

Burya rero inyuma y’indwi imwe ubutigu bwari bugeze. Twe na Debbie twaciye dutumirwa mw’Ishure rya Gileyadi. Twabwirizwa rero gufata ingingo. Umuvukanyi Little yatubwiye ati: «Ico mwohitamwo cose, birashobora kuzoshika mukumva umengo mwari guhitamwo ico mutahisemwo. Ico mwohitamwo cose ni ciza, kandi Yehova azogihezagira.» Twaciye duhitamwo kwitaba Ishure rya Gileyadi, kandi haciye imyaka twariboneye ko ivyo umuvukanyi Little yatubwiye kwari ukuri. Iyo ndemesho yaduhaye twarakunda kuyibwira abandi baba bipfuza kumenya agateka bohitamwo.

IGIKORWA C’UBUMISIYONARI

Twe n’umukenyezi wanje twarahimbawe kuba mu banyeshure 24 bitavye umugwi ugira 83 w’Ishure rya Gileyadi, ryabereye i Brooklyn muri New York, muri Ndamukiza 1987. Umuvukanyi Ulysses Glass na Jack Redford ni bo bari abigisha nyamukuru. Amezi atanu y’ivyigwa ntitwamenye ingene arangiye, maze ku wa 6 Nyakanga 1987 duca duhabwa impapuro z’umutsindo. Twaciye turungikwa gukorera muri Hayiti, hamwe na John Goode n’umukenyezi wiwe Marie.

Igihe abamisiyonari banyuma birukanwa muri Hayiti mu 1962, nta bandi bari bwarungikweyo. Inyuma y’indwi zitatu dusohotse Ishure rya Gileyadi, twaciye dutangura gukorera muri Hayiti, mw’ishengero ritoyi ry’abamamaji 35 ryari iyo catawe mu karere k’imisozi. Twari tukiri bato tutazi n’ibintu vyinshi, kandi ni twe twenyene twaba mu nzu y’abamisiyonari. Abantu bo muri ako karere bari bakenye kandi benshi muri bo ntibari bazi gusoma. Tutaramara na kabiri muri Hayiti, harabaye imyiyerekano, baratembagaza ubutegetsi akatari gake, baraturira ibintu mu mabarabara, haratera n’ibivumbuzi vy’umuyaga.

Hari vyinshi twigiye ku bavukanyi na bashiki bacu bo muri Hayiti. Bari abantu bihangana kandi bamana umunezero. Naho benshi bari bafise ingorane nyinshi mu buzima, barakunda Yehova n’igikorwa co kwamamaza. Hari mushiki wacu umwe yitereye mu myaka atari azi gusoma, ariko yari azi ku mutwe nk’ivyanditswe 150. Ivyo twibonera buri musi, vyarakomeza umwiyemezo wacu wo kubwira abantu ko Ubwami bw’Imana ari wo muti rudende w’ingorane zihanze abantu. Biradukora ku mutima cane kubona bamwe mu bo twatanguye kwigisha Bibiliya bahavuye baba abatsimyi basanzwe, abatsimvyi badasanzwe, n’abakurambere.

Igihe nari muri Hayiti, narahuye n’umumisiyonari umwe akiri muto yitwa Trevor wo mw’idini ry’abamorumone maze turaganira incuro zitari nke kuri Bibiliya. Haciye imyaka, nagiye mbona andungikira ikete ryagira riti: «Nzobatizwa kw’iteraniro ryimirije, kandi nipfuza kuzoca nsubira muri Hayiti gukorera ubutsimvyi budasanzwe muri ka karere nyene nahora nkoreramwo ubumisiyonari nkiri mw’idini ry’abamorumone.» Kandi ivyo nyene ni vyo yamaze imyaka myinshi akora we n’umukenyezi wiwe.

I BURAYA HANYUMA MURI AFRIKA

Twararungitswe gukorera mu karere k’i Buraya, aho igikorwa co kwamamaza cariko kiratezurirwa. Mu 1992 ni ho twashika i Ljubljana muri Sloveniya, hafi y’aho abavyeyi banje bakuriye imbere y’uko bimukira mu Butaliyano. Intambara zari zikibica bigacika mu turere tw’icahoze ari Yugoslaviya. Ishami ry’i Vienne muri Otrishe, n’ibiro vy’i Zagreb muri Krowasiya, n’ivy’i Belgrade muri Serbiya, ni vyo vyari bihagarikiye igikorwa muri ako karere. Ariko rero ibintu vyari bigiye guhinduka, buri gihugu kikagira Beteli yaco.

Ivyo vyasaba ko dusubira kwiga urundi rurimi no kumenyera iyindi mico. Abo muri Sloveniya ni bo bakunda kwivugira ngo, «Jezik je težek», bikaba bisobanura ngo «indimi ni amahanga.» Emwe, ivyo twaravyiboneye koko! Ariko rero, twarakorwa ku mutima n’ukudahemuka kw’abavukanyi bama biteguriye kujana n’amahinduka yaba mw’ishirahamwe, kandi twariboneye ingene Yehova abahezagira. Twarasubiye kwibonera ingene Yehova yama atunganya ibintu abigiranye urukundo, kandi akabigira ku gihe kibereye. Ivyigwa twari tumaze kwiga vyaradufashije cane mu myaka twamaze muri Sloveniya, kandi twarahigiye n’ibindi vyinshi.

Ari ukwiga ho, twari tukiriko. Mu 2000 twararungitswe gukorera muri Côte d’Ivoire, mu burengero bwa Afrika. Yamara muri Munyonyo 2002, twaciye duhungira muri Sierra Leone kubera intambara y’abanyagihugu, narirya hoho intambara nk’iyo yari imaze imyaka 11 yari iherutse kurangira. Naho kuva muri Côte d’Ivoire bukwi na bukwi vyatubabaje, ivyigwa twahigiye vyaradufashije kugumana umunezero.

Aho muri Sierra Leone, twashize umutima ku bantu baho bari bakeneye kumenya ukuri, no ku bavukanyi bacu twikundira bari bamaze imyaka bari mu ntambara. Naho bari bakenye, baripfuza gusangira n’abandi ivyo bafise. Nk’akarorero, hari umudada umwe yahaye Debbie impuzu. Mu ntango Debbie yaranse kuzakira, ariko uwo mudada yaramugobereye amubwira ati: «Igihe twari mu ntambara abavukanyi bo mu bindi bihugu baradufashije. Harageze rero ko natwe dufasha abandi.» Natwe twaciye twiyemeza kwigana akarorero kabo.

Twahavuye dusubira muri Côte d’Ivoire, ariko hasubira kwaduka uruhagarara mu vya politike. Muri Munyonyo 2004, twahavuye duhungishwa na kajugujugu, ico gihe umwe wese akaba yahunganye agasakoshi k’ibilo 10 gusa. Ico gihe twahungiye ku kirindiro c’abasoda b’Abafaransa, kandi iryo joro twaraye hasi. Bukeye twaciye dufata indege itujana mu Buswise. Igihe twashika ku biro vy’ishami nka sasita z’ijoro, abagize Komite y’ishami n’abigisha b’Ishure rimenyereza abasuku hamwe n’abakenyezi babo batwakiranye igishika, baratugumbira, baraduha udufungurwa dushushe be n’amashokola menshi yo mu Buswise. Ntiworaba ingene vyadukoze ku mutima.

Twahavuye turungikwa gukorera muri Gana igihe gito, mu nyuma dusubira muri Côte d’Ivoire uruhagarara rumaze guhwama. Kubona ingene abavukanyi batwitwararitse igihe twariko turahunga be n’igihe twaza turahindurirwa igikorwa, vyaradufashije kwihangana. Naho urukundo nk’urwo ari ikintu gisanzwe kiranga abasavyi ba Yehova, twe na Debbie twiyemeje kutazokwigera turufata minenerwe. Wanashima, n’ivyo bihe bigoye twaciyemwo vyahavuye bitwigisha ibintu bihambaye mu buzima.

MU BIHUGU VY’ABARABU

Mu 2006, twararose ikete rivuye ku cicaro gikuru ryatumenyesha ko twimuriwe gukorera mu bihugu vy’Abarabu. Ivyo vyadusaba kumenyera ibintu bishasha, guhura n’izindi ntambamyi, no kwiga indimi nshasha be n’imico mishasha. Hari vyinshi twigiye muri ako karere kari karasinzikajwe n’indyane zishingiye kuri politike no ku madini. Twarakorwa ku mutima n’ubumwe bwarangwa mu mashengero yaho, naho yari agizwe n’abavukanyi bava mu mico itandukanye kandi bavuga indimi zitandukanye. Ubwo bumwe bwava ku kuba barakurikiza ubuyobozi butangwa n’ishirahamwe. Twarakorwa kandi ku mutima no kubona ingene benshi muri abo bavukanyi bihanganira kurwanywa n’abo mu muryango, abo bakorana, abo bigana n’ababanyi babo.

Mu 2012 twaritavye ihwaniro ridasanzwe ryabereye i Tel Aviv muri Israyeli. Ryari ryo rya mbere abasavyi ba Yehova bo muri ako karere basubira guhurira hamwe ari benshi ukuraho, kuva kuri Pentekoti yo mu 33. Emwe, cari ikiringo c’intibagirwa mu buzima!

Muri iyo myaka, twararungitswe kugendera igihugu kimwe aho igikorwa cacu cari kibujijwe. Twarajanye ibitabu bimwebimwe, turaja kwamamaza, twongera turitaba amateraniro y’abantu bakebake. Naho aho twaca hose hari huzuye amabariyeri n’abitwaje ibirwanisho, twarumva dutekanye kuko twari kumwe n’abamamaji baho bari bazi iminyuro.

NSUBIRA MURI AFRIKA

Mu 2013, twaciye turungikwa gukorera kw’ishami ryo muri Kongo Kinshasa, hakaba hari hatandukanye cane n’aho twari tuvuye. Kongo ni igihugu kinini cane kandi ciza, mugabo cugarijwe n’ubukene be n’intambara zikunda guterwa n’imigwi yitwaje ibirwanisho. Mu ntango twavuze duti: «Afrika yoyo turayizi, nta bwoba.» Ariko ntitwari tuzi ivyari bituraririye, na canecane mu bijanye no kwiyunguruza mu turere tutagira amabarabara meza. Naho ari ukwo, twasanzeyo ibintu vyiza vyinshi vyaturemesha, nko kwibonera ingene abavukanyi bihanganira ingorane z’ivy’ubutunzi banezerewe, ingene bakunda indimiro, n’ingene bagira akigoro ko kwitaba amakoraniro n’amateraniro. Twariboneye ingene Yehova ahezagira igikorwa ciwe kigatera imbere. Imyaka twamaze dukorera muri Kongo, yaratwigishije ibintu vyinshi yongera iratuma twunguka umuryango.

Mu mpera y’umwaka wa 2017, twarahinduriwe igikorwa turungikwa muri Afrika y’Epfo. Beteli yo muri ico gihugu ni yo nini cane gusumba izindi twari tumaze gukorerako, kandi n’ibikorwa twashinzweyo vyari bishasha. Naho ico gihe twari tugifise vyinshi vyo kwiga, ivyo twari twaraciyemwo vyaradufashije cane. Twarakunze abavukanyi na bashiki bacu benshi bari bamaze imyaka myinshi cane bihangana. Vyongeye, birakora ku mutima kubona ingene abagize umuryango wa Beteli bakorana mu bumwe, naho bava mu moko atandukanye n’imico itandukanye. Emwe, biragaragara ko Yehova ahezagira abantu biwe akabaha amahoro, uko bihatira kwambara kamere nshasha no gushira mu ngiro ingingo ngenderwako zo muri Bibiliya.

Uko imyaka yagiye irarengana, twe na Debbie twarashinzwe ibikorwa bishimishije, turamenyera imico kama itandukanye, turiga n’indimi nshasha. Naho bitamye vyoroshe, twagumye twibonera urukundo rudahemuka Yehova adukunda biciye kw’ishirahamwe ryiwe no ku bavukanyi. (Zab. 144:2) Turemera tudakeka ko ivyigwa twigiye mu murimo w’igihe cose, vyatumye tuba basavyi ba Yehova babushitse.

Ndashima cane indero nahawe n’abavyeyi banje, ukuntu umugore wanje nkunda cane Debbie yanshigikiye, n’uburorero budasanzwe bw’abavukanyi bo hirya no hino kw’isi. Imisi yose twe n’umukenyezi wanje tugisigaje kubaho, twiyemeje kuzoguma twakiriza yompi ivyigwa twigishwa na wa Mwigisha wacu ahambaye.