‘Tumako abakurambere’

1. Yehova yerekanye gute ko aha agaciro intama ziwe?

YEHOVA araha agaciro intama ziwe. Yaziguze amaraso ya Yezu yongera azishinga abakurambere kugira ngo bazitwararike. (Ivyak. 20:28) Yehova yipfuza ko abakurambere bazifatana ikibabarwe. Bisunze ubuyobozi bwa Yezu, bararuhurira izo ntama bakongera bakazikingira ivyozigirira nabi mu vy’impwemu.—Yes. 32:​1, 2.

2. Ni bande canecane Yehova yitwararika? (Ezekiyeli 34:​15, 16)

² Yehova aritwararika abasavyi biwe bose, canecane abafise ingorane. Abicishije ku bakurambere, arafasha abarwaye mu vy’impwemu. (Soma Ezekiyeli 34:​15, 16.) Naho ari ukwo, yipfuza ko dusaba iyo mfashanyo igihe tuyikeneye. Mu bihe nk’ivyo, turamutakambira tumusaba ko yodushigikira, ariko kandi tukitura «abungere n’abigisha» bo mw’ishengero kugira ngo badufashe.—Ef. 4:​11, 12.

3. Kwihweza ibikorwa abakurambere bakora vyodufasha gute?

³ Muri iki kiganiro, turaza guca irya n’ino intunganyo Imana yadushiriyeho yo gufashwa n’abakurambere igihe dufise ingorane mu vy’impwemu. Turaza kuronka inyishu z’ibi bibazo: Ni ryari twokwitura abakurambere ngo badufashe? Kubera iki dukwiye kubitura? Badufasha gute? Naho ata ngorane twoba dufise ubu, kumenya inyishu z’ivyo bibazo biraza gutuma turushiriza gukenguruka iyo ntunganyo Imana yadushiriyeho. Hari naho umusi uri zina bishobora kuzoturokora.

NI RYARI ‘TWOTUMAKO ABAKURAMBERE’?

4. Twemezwa n’iki ko ibivugwa muri Yakobo 5:​14-16, 19, 20, vyerekeza ku ndwara yo mu vy’impwemu? (Raba n’amafoto.)

⁴ Mu kuvuga ibijanye n’iyo ntunganyo Imana yadushiriyeho yo gufashwa mu vy’impwemu, umwigishwa Yakobo atangura abaza ati: «Hoba hari uwurwaye muri mwebwe? Natumeko abakurambere b’ishengero.» (Soma Yakobo 5:​14-16, 19, 20.) Ibivugwa muri iyo mirongo, birerekana ko Yakobo yariko avuga ibijanye n’indwara yo mu vy’impwemu. Nk’akarorero, avuga ko uwo murwayi adatumako umuganga, ahubwo atumako abakurambere. Ikindi cerekana ko ari indwara yo mu vy’impwemu ni uko uwuyirwaye akira ari uko ababariwe ibicumuro. Ivyo umuntu akora kugira ngo akire iyo ndwara, birasa n’ivyo uwurwaye indwara isanzwe akora kugira akire. Igihe turwaye, turitura umuganga, tukamubwira uko tumerewe, tugakurikiza n’ivyo atubwira. N’igihe turwaye mu vy’impwemu, turakwiye kwitura abakurambere, tukababwira uko tumerewe, tukongera tugashira mu ngiro impanuro baduha zishingiye kuri Bibiliya.

5. Ni ibiki vyodufasha kumenya ko dutanguye kurwara mu vy’impwemu?

⁵ Ibivugwa muri Yakobo ikigabane ca 5 bituremesha kwitura abakurambere igihe dutanguye kwumva ko amagara yacu yo mu vy’impwemu atifashe neza. Birahambaye cane ko badufasha, ubucuti dufitaniye n’Imana butarahabonera. Turakwiye kwirinda kwihagararako. Ivyanditswe bivuga yuko tutabaye maso dushobora kwibwira ko dufitaniye ubucuti bwiza n’Imana, kandi atari vyo. (Yak. 1:22) Ivyo vyarashikiye abakirisu bamwebamwe b’i Sarudi, kandi Yezu yarabakebuye. (Ivyah. 3:​1, 2) Kimwe mu vyodufasha kumenya uko duhagaze mu vy’impwemu, ni ukugereranya umwete dufise muri iki gihe be n’uwo twari dufise igihe twamenya ukuri. (Ivyah. 2:​4, 5) Twoshobora kwibaza duti: «Gusoma Bibiliya no kuyizirikanako vyoba bikinezera nka kera? Vyoba bishika sintegure amakoraniro? Mbe hoho noba nkiyitaba nka kera? Noba namamaza n’umwete nka kera? Noba nsigaye mara umwanya munini niyumvira ivyo kwinezereza canke ivyo kwiruka inyuma y’amaronko?» Inyishu utanga kuri ivyo bibazo, zirashobora kukwereka aho urwaye maze ugasaba imfashanyo ibintu bitarunyuka. Nimba tudashoboye gukosora aho tugoyagoya canke tukaba tumaze kurenga ku ngingo ngenderwako z’Imana, turakwiye guca twitura abakurambere kugira badufashe.

6. Uwakoze igicumuro gikomeye akwiye gukora iki?

⁶ Ariko rero, bishitse umuntu agakora igicumuro gikomeye gishobora gutuma akurwa mw’ishengero, arakwiye guca yitura abakurambere. (1 Kor. 5:​11-13) Uwakoze igicumuro nk’ico, aba akwiye gufashwa kugira ngo asubire kugiranira ubucuti bwiza na Yehova. Kugira Yehova atubabarire yishimikije incungu, dutegerezwa gukora «ibikorwa vyerekana ukwigaya.» (Ivyak. 26:20) Muri ivyo bikorwa, harimwo no kwitura abakurambere igihe twakoze igicumuro gikomeye.

7. Ni bande kandi bakwiye kwitura abakurambere ngo babafashe?

⁷ Abakurambere ntibafasha gusa abakoze igicumuro gikomeye, barafasha n’abagoyagoya mu vy’impwemu. (Ivyak. 20:35) Nk’akarorero, woshobora kubona ko kurwanya ivyipfuzo bibi bisigaye ari urugamba. Urwo rugamba rwoshobora kutoroha canecane nimba imbere y’uko umenya ukuri wari wariziziwe n’ibiyayuramutwe, kuraba amashusho y’ibiterasoni, canke ubusambanyi. Nturwane urwo rugamba wenyene. Ubona gute wituye umukurambere? Azogutega yompi, aguhe impanuro, yongere aguhumurize ko ushobora gutsinda ivyo vyipfuzo bibi maze ugahimbara Yehova. (Umus. 4:12) Naho woba wumva ko wotana n’akabando, abakurambere bazokwibutsa ko kuba wabituye ubwavyo ari icerekana ko uha agaciro cane ubucuti ufitaniye na Yehova be n’uko utipfuza kwizigira inkomezi zawe.—1 Kor. 10:12.

8. Ni ryari atari ngombwa ko twitura abakurambere?

⁸ Si ngombwa ngo twiture abakurambere kw’ikosa iryo ari ryo ryose twoba dukoze. Nk’akarorero, dufate ko wabwiye umuvukanyi canke mushiki wacu amajambo ababaza, mbere ukanamushavurira cane. Aho guca witura umukurambere, ukwiye gukurikiza impanuro Yezu yatanze igusaba kwikiranura n’uwo muntu. (Mat. 5:​23, 24) Woshobora kugira n’ubushakashtsi ku bijanye na kamere y’ubwitonzi, ukwihangana n’ukwigumya, kugira ngo ubone ingene worushiriza kuzigaragaza ikindi gihe. Ariko ntiwumve, ubonye ko unaniwe kugira ivyo uryohoye, woshobora kwitura umukurambere kugira agufashe. Nk’akarorero, mw’ikete intumwa Pawulo yandikiye Abafilipi, yarasavye umuvukanyi umwe atavugwa izina, ngo afashe Evodi na Sentike gutorera umuti ikibazo bari bafitaniye. Na wewe, umukurambere wo mw’ishengero iwanyu arashobora kugufasha muri ubwo buryo.—Flp. 4:​2, 3.

KUBERA IKI TWOTUMAKO ABAKURAMBERE?

9. Kubera iki ibimaramare bidakwiye gutuma tureka gutumako abakurambere? (Imigani 28:13)

⁹ Igihe twakoze igicumuro gikomeye, canke igihe tubona ko biriko biratunanira kurwanya ubugoyagoye kanaka, tuba dukeneye ukwizera n’umutima rugabo kugira ngo dusabe imfashanyo. Ntidukwiye kureka ngo ibimaramare bitume tudatumako abakurambere. Uti kubera iki? Dukurikije iyo ntunganyo Yehova yashizeho, tuba twerekanye ko tumwizigiye, kuko yayishizeho kugira ngo idufashe kuguma dufise amagara meza mu vy’impwemu. Igihe cose tunyereye, turemera ko dukeneye gufashwa na we kugira ngo ntitugwe. (Zab. 94:18) Nimba na ho twarakoze igicumuro, turashobora kwizigira ko Yehova azotubabarira, nitwacaturira abakurambere kandi ntidusubire kugikora.—Soma Imigani 28:13.

10. Vyogenda gute nka hamwe twogerageza guhisha ibicumuro vyacu?

¹⁰ Kwitura abakurambere kugira ngo badufashe biravamwo ivyiza, ariko guhisha ibicumuro vyacu bidukwegera akarambaraye. Nk’akarorero, igihe umwami Dawidi yagerageza guhisha ibicumuro vyiwe, ubucuti afitaniye na Yehova bwarononekaye n’amagara yiwe arahabonera. (Zab. 32:​3-5) Kurya nyene indwara canke igikomere igihe bitavuwe neza bituma ibintu vyunyuka, ni ko bigenda no ku ndwara yo mu vy’impwemu. Ivyo Yehova arabizi neza. Ni co gituma adusaba ngo «dutunganye ibibazo» biri hagati yacu na we biciye ku bakurambere yadushiriyeho kugira badufashe mu vy’impwemu.—Yes. 1:​5, 6, 18.

11. Guhisha ibicumuro vyacu vyogira ingaruka izihe ku bandi?

¹¹ Hamwe twokora igicumuro gikomeye maze tukagihisha, vyoshobora kugira ingaruka ku bandi. Vyoshobora gutuma Imana yima ishengero ryose impwemu yayo, kandi bigahungabanya amahoro hagati y’abavukanyi bacu. (Ef. 4:30) Ikindi na co, bishitse natwe tukamenya ko hari uwo mw’ishengero yakoze igicumuro gikomeye, turakwiye kumuremesha kuja kubibwira abakurambere.a Guhishirira uwakoze igicumuro gikomeye birashobora gutuma na twebwe twagirwa n’icaha. (Lew. 5:1) Urukundo rero dukunda Yehova rurakwiye gutuma tumenyesha abakurambere ivyabaye. Ivyo tubigize birafasha ishengero kuguma rityoroye, bigafasha n’uwo mucumuzi kunagura ubucuti afitaniye na Yehova.

ABAKURAMBERE BADUFASHA GUTE?

12. Abakurambere bafasha gute abagoyagoya mu vy’impwemu?

¹² Abakurambere basabwa gushigikira abagoyagoya mu vy’impwemu. (1 Tes. 5:14) Bishitse ugakora igicumuro, boshobora kukubaza utubazo kugira barushirize gutahura uko ubona ivyagushikiye be n’ukuntu umerewe. (Imig. 20:5) Kugira ngo ivyo babishikeko vyoba vyiza ubabwije ukuri udahisha, mbere n’igihe bitokworohera kubera imico kama wakuriyemwo, ukuntu usanzwe wimereye, canke kubera ibimaramare bitewe n’ivyo uba wakoze. Ntukwiye kugira ubwoba ngo wiyumvire ko uhava uvuga ibitari vyo. (Yobu 6:​3, akajambo k’epfo) Aho guca bakwiyumvira nabi, abakurambere bazokwihatira kukwumviriza bitonze, bongere barondere kumenya amakuru yose, imbere yo kuguha impanuro. (Imig. 18:13) Kubera yuko batahura ko gufasha intama za Yehova bisaba umwanya, hari aho bogusaba ko mubonana incuro zirenze imwe, kugira bagufashe neza.

13. Abakurambere bashobora gute kugufasha biciye ku masengesho batura no ku vyanditswe? (Raba n’amafoto.)

¹³ Niwatumako abakurambere bazogerageza kugufasha. Ntibazotuma urushiriza kwiyagiriza, ahubwo bazogusengera. Uzokwumirwa ubonye ingene amasengesho batura afise «inguvu nyinshi». Ikindi kintu bakora mu kugufasha, ni «[ukugusiga] amavuta mw’izina rya Yehova.» (Yak. 5:​14-16) Ayo «mavuta» agereranya ukuri kwo mw’Ijambo ry’Imana. Abakurambere barakoresha Bibiliya babigiranye ubuhinga, kugira bakuremeshe kandi baguhumurize maze usubire kunagura ubucuti ufitaniye n’Imana. (Yes. 57:18) Impanuro baguha zishingiye kuri Bibiliya zirashobora gutuma urushiriza gukora iciza. Yehova abicishije ku bakurambere aratuma wumva ijwi ryiwe rikubwira riti: «Iyi ni yo nzira. Nimuyigenderemwo.»—Yes. 30:21.

14. Twisunze Abagalatiya 6:​1, abakurambere bafasha gute umuntu yafashe «inzira itari yo»? (Raba n’amafoto.)

¹⁴ Soma Abagalatiya 6:1. Igihe umukirisu afashe «inzira itari yo», aba aciye kubiri n’ingingo ngenderwako z’Imana. Iyo nzira itari yo ishobora kuba ari ingingo itaranga ubukerebutsi aba yafashe canke igicumuro gikomeye aba yakoze. Abakurambere babigiranye urukundo ‘baragerageza kumubogora n’umutima w’ubwitonzi.’ Ijambo ry’ikigiriki ryahinduwe ngo «kubogora» rirashobora gukoreshwa mu kudondora ingene umuganga asubiza mu kibanza igufa riba ryatiriganye, kugira ngo uwagize iyo ngorane ntahave amugara burundu. Nka kurya nyene umuganga w’umuhinga agerageza gusubiza igufa mu kibanza caryo atarinze kubabaza cane umurwayi, ni ko n’abakurambere bagerageza kutuvura mu vy’impwemu batarinze kwunyura umubabaro bwacu. Vyongeye, Bibiliya ibasaba ‘kwigumizako ijsho.’ Igihe rero baba bariko baradufasha gusubira ku murongo, baratahura ko na bo nyene badatunganye be n’uko vyoshika bagatirimuka. Ni co gituma birinda kwishira hejuru, kwibona ubugororotsi canke gutora amahinyu uwo baba bariko barafasha. Aho kubigenza gutyo barihatira kwicisha bugufi no kuba abanyempuhwe.—1 Pet. 3:8.

15. Twokora iki mu gihe twoba dufise ingorane?

¹⁵ Turakwiye kwizigira abakurambere bacu. Baramenyerejwe kugumya ibanga, gutanga impanuro zishingiye kuri Bibiliya aho kwisunga ivyiyumviro vyabo, no kuguma badufasha kugira ntiturengerwe kubera ivyo tuba twakoze. (Imig. 11:13; Gal. 6:2) Naho bafise kamere zitandukanye kandi bakaba batanganya uburambe muri iryo banga, ntukwiye kwitinya kwitura umukurambere uwo ari we wese kugira umuture ingorane ufise. Ariko rero ntidukwiye kuva ku mukurambere umwe tuja ku wundi turondera gusa uwodushirira aho dushaka. Tubigize twoba tubaye nka ba bandi barondera ‘ababagaza amatwi’, aho kwumvira inyigisho ngirakamaro yo mw’Ijambo ry’Imana. (2 Tim. 4:3) Igihe twituye umukurambere ku kibazo kanaka, yoshobora kutubaza nimba hari abandi bakurambere twakiganiriyeko, akatubaza n’impanuro baduhaye. Vyongeye, ukwifata ruto kwoshobora gutuma abanza kugisha inama uwundi mukurambere mugenzi we imbere y’uko agira ico akubwiye.—Imig. 13:10.

IBANGA RITWEGA

16. Ni ibanga irihe dufise?

¹⁶ Naho abakurambere baguma baducungereye twebwe intama z’Imana, ntibadutegeka ico twokora. Kubaho tuyobokera Imana ni ibanga ryega umwe wese ku giti ciwe. Umwe wese azokwibarizwa n’Imana ivyo avuga n’ivyo akora. Igishimishije, tubifashijwemwo n’Imana turashobora kuguma turi intahemuka kuri yo. (Rom. 14:12) Aho kudutegeka ico twokora rero, abakurambere badufasha gusa kubona ibintu nk’uko Imana ibibona bisunze Bibiliya. Dukurikije impanuro baduha zishingiye kuri Bibiliya turashobora kumenyereza ‘ububasha bwacu bwo gutahura’ maze tugafata ingingo ziranga ubukerebutsi.—Heb. 5:14.

17. Dukwiye kwiyemeza gukora iki?

¹⁷ Ese ukuntu ari iteka ridasanzwe kuba turi intama za Yehova! Yehova yararungitse wa «mwungere mwiza» ari we Yezu, kugira ngo aducungure gutyo tuzoshobore kubaho ibihe bidahera. (Yoh. 10:11) Vyongeye, biciye ku ntunganyo y’abakurambere, Yehova yarashikije umuhango yatanze ugira uti: «Nzobaha abungere bameze nk’uko umutima wanje ugomba. Bazobagaburira bakoresheje ubumenyi n’ubukerebutsi.» (Yer. 3:15) Igihe tugoyagoya mu vy’impwemu canke turwaye mu vy’impwemu, ntidukwiye kugonanwa gutumako abakurambere kugira badufashe. Ese twokwiyemeza kuguma twungukira bimwe bishitse ku ntunganyo y’abakurambere Yehova yadushiriyeho.