Ibibazo vy’abasomyi
Ni «iciyumviro» ikihe Yehova yimirije gushira mu mitima y’amahanga?
Ku bijanye n’ibizoba mu ntango y’amakuba akomeye, mu Vyahishuwe 17:16, 17 havuga hati: «Arya mahembe cumi wabonye na kirya gikoko bizokwanka urya mumaraya, bimunyage ivyo afise vyose, bimusige ari gusa. Bizorya inyama ziwe zose maze bimuturire ashe ahere. Kuko Imana yashize mu mitima yabo gushitsa iciyumviro cayo, emwe gushitsa umugambi wabo umwe wo guha ubwami bwabo ca gikoko.» Kera ibitabu vyacu vyahora bivuga ko ico «ciyumviro» Yehova azoshira mu mitima y’amahanga, ari ugusangangura idini ry’ikinyoma.
Ariko rero, hari ivyahindutse. «Iciyumviro» Yehova azoshira mu mitima y’amahanga ni ico gutuma ayo mahanga aha ‘ubwami bwayo ca gikoko.’ Kugira dutahure ingene ivyo bizoranguka, reka tuzirikane ku bibazo bikurikira.
Ni bande bavugwa muri ubwo buhanuzi? Haravugwamwo «umumaraya,» uwitwa kandi «Babiloni Akomeye», akaba agereranya inganji y’isi yose y’idini ry’ikinyoma. Ca «gikoko gitukura» na co kigereranya Ishirahamwe mpuzamakungu ONU. Iryo shirahamwe ryatanguye gushingwa mu 1919 kugira rizigame amahoro kw’isi, ico gihe rikaba ryitwa Umuhari w’amahanga. (Ivyah. 17:3-5) «Ya mahembe cumi» na yo agereranya intwaro zose zishigikira ico gikoko.
Ni ubucuti ubuhe buri hagati ya wa mumaraya na ca gikoko gitukura? Wa mumaraya amaze igihe «yicaye» kuri ca gikoko gitukura. Aragihezagira kandi akagerageza gutuma gikora ivyo ashaka.
Ni ibiki bizoshikira uwo mumaraya? Ca gikoko hamwe na ya mahembe cumi agishigikiye ‘bizokwanka uwo mumaraya.’ Mu kwerekana urwanko bimufitiye, bizosahura ubutunzi bwiwe bwose vyongere bishire ahabona ububisha bwiwe. Bizoca bishitsa urubanza Yehova yaciriye uwo mumaraya rwo kumusangangura buhere. (Ivyah. 17:1; 18:8) Ico gihe ivy’amadini y’ikinyoma bizoba biheze. Ariko imbere y’uko ivyo biba, Yehova azotuma amahanga akora ikintu kitari bwigere kibaho.
Yehova azotuma amahanga akora iki? Azoshira ‘iciyumviro ciwe’ mu mitima ya ya mahembe cumi. Ico ciyumviro ni ic’uko ayo mahembe cumi ‘azoha ububasha bwayo n’ubushobozi bwayo ca gikoko gitukura,’ ari co rya Shirahamwe mpuzamakungu ONU. (Ivyah. 17:13) Zirikana gatoyi: Intwaro z’abantu zoba ari zo zizokwibwiriza guha ca gikoko ububasha bwazo n’ubushobozi bwazo? Uwokubesha. Ubwo buhanuzi bwerekana ko Imana ubwayo ari yo izotuma babigira. (Imig. 21:1; gereranya na Yesaya 44:28.) None ico gikorwa coba kizoba intambwe ku yindi? Eka data. Biboneka ko kizoba bukwi na bukwi. Ca gikoko rero nicamara kuronka ubwo bubasha, kizoca gishitsa urubanza Yehova yaciriye idini ry’ikinyoma, kirikureho ubutakigaruka.
None twitege iki? Ntidukwiye kwitega kwumva amakuru y’ingene intwaro z’abantu zizogenda zirashigikira Ishirahamwe mpuzamakungu ONU intambwe ku yindi. Ico dukwiye kwitega ni iki: Bukwi na bukwi Yehova azoshira mu mitima y’amahanga iciyumviro co guha ububasha bwayo ca gikoko. Ivyo nivyashika tuzoca tumenya ko amakuba akomeye agira atangure. Mu kurindira, nimuze «tugume turikanuye kandi tuzigame ubwenge bwacu.»—1 Tes. 5:6.