Agaburira ibihumbi akoresheje udukate n’udufi dukeyi

Za ntumwa 12 zaryohewe n’urugendo rwo kwigisha zagize i Galilaya, kandi ziriganira Yezu ‘ibintu vyose zakoze n’ivyo zigishije.’ Birumvikana ko zirushe. Yamara rero, ntizironka akanya ko gufungura kuko hari uruja n’uruza rwinshi. Nuko Yezu azibwira ati: “Nimuze, mwebwe mwenyene, ahiherereye mu gahinga muruhuke gatoya.”​—Mariko 6:30, 31.

Barurira ubwato, kumbure hafi y’i Kaperinawumu, bakagenda bagana ahantu hiherereye mu buseruko bwa Yorodani hirya y’i Betsayida. Ariko rero abantu benshi barabona ko bagiye, abandi na bo bakavyumva. Abo bose baranyaragasa bakajana inkengera y’ikiyaga maze bwa bwato bugasanga bamaze gushika.

Yezu avuye mu bwato, abona rya sinzi ry’abantu maze bamutera akagongwe kuko bameze nk’intama zitagira umwungere. Ku bw’ivyo, atangura “kubigisha ibintu vyinshi” vyerekeye Ubwami. (Mariko 6:34) Vyongeye, arakiza “abakeneye gukizwa.” (Luka 9:11) Amasaha yitereye, abigishwa biwe bamubwira bati: “Aha hantu ni mu gahinga kandi amasaha aramaze kwiterera; nurungike ayo masinzi, bagende mu bigwati bigurire ivyo kurya.”​—Matayo 14:15.

Yezu abishura ati: “Ntibirirwa baragenda: Be ari mwebwe mubaha ico barya.” (Matayo 14:16) Naho Yezu azi ico agiye gukora, aragerageza Filipo mu kumubaza ati: “Tugurira hehe imikate kugira aba barye?” Filipo ni we abazwa ico kibazo kuko aturuka i Betsayida hafi y’aho bari. Ariko rero, ingorane si ukuronka aho bagurira iyo mikate. Hari nk’abagabo 5.000, abantu bose hamwe bagashobora kuba baruta ico gitigiri incuro zibiri ushizemwo abagore n’abana! Filipo yishura ati: “Imikate iciye idenariyo amajana abiri [idenariyo ni umushahara w’umusi umwe] ntiyobakwira ku buryo umwe wese aronka gatoyi.”​—Yohani 6:5-7.

Kumbure mu kwerekana ko kugaburira abo bantu bose bidashoboka, Andereya agira ati: “Hano hariho agahungu gatoyi gafise imikate itanu ya sayiri n’udufi tubiri. Mugabo ivyo ni iki ku bantu benshi gutyo?”​—Yohani 6:9.

Ni muri Ntwarante canke Ndamukiza, imbere gatoyi ya Pasika yo mu 32, kandi ku musozi hari ubwatsi butotahaye. Yezu ategeka abigishwa biwe kubwira abo bantu ngo bicare mu migwi y’abantu 50 n’iyindi y’abantu 100. Aratora twa dukate dutanu na twa dufi tubiri hama akengurukira Imana. Maze atangura kumanyagura twa dukate yongera agabura twa dufi. Yezu arabiha abigishwa biwe na bo bakabigaburira nya bantu. Igitangaje, nya bantu bose bararya bagahaga!

Mu nyuma, Yezu abwira abigishwa biwe ati: “Nimwegeranye utumanyu dusigaye, kugira ntihagire igipfa ubusa.” (Yohani 6:12) Emwe, ibiseke 12 biruzura bikanihira!