“Ni nde yamenye umuzirikanyi wa Yehova?”

“‘Ni nde yamenye umuzirikanyi wa Yehova, ngo amwigishe?’ Mugabo twebwe turafise umuzirikanyi wa Kristu.”​—1 KOR. 2:16.

1, 2. (a) Ni ingorane iyihe abantu benshi bagira? (b) Dukeneye kwibuka iki ku bijanye n’ukuntu twiyumvira be n’ukuntu Yehova yiyumvira?

WOBA umaze kubona ko bigoye gutahura ukuntu uwundi muntu yiyumvira? Kumbure uheruka kwubaka urwawe, ukaba ubona ko udashobora gutahura mu buryo bushitse ukuntu uwo mwubakanye yiyumvira. Nkako, usanga abagabo n’abagore biyumvira mu buryo butandukanye, eka mbere bakavuga mu buryo butandukanye. Mbere mu mico kama imwimwe usanga abagabo n’abagore mu vy’ukuri bavuga indimi zitandukanye zikomoka ku rurimi rumwe! Vyongeye, kuba hari imico kama itandukanye hamwe n’indimi zitandukanye birashobora gutuma abantu biyumvira bakongera bakifata mu buryo butandukanye. Ariko rero, uko urushiriza kumenya abandi, ni ko urushiriza kuronka akaryo ko gutangura gutahura ukuntu biyumvira.

² Ntidukwiye rero gutangazwa n’uko ukuntu twiyumvira gutandukanye rwose n’ukuntu Yehova yiyumvira. Yehova abicishije ku muhanuzi wiwe Yesaya, yabwiye Abisirayeli ati: ‘Ivyiyumviro vyanyu si vyo vyiyumviro vyanje, n’inzira zanje si zo nzira zanyu.’ Maze mu kubitangira akarorero, Yehova yabandanije avuga ati: “Kuko, nk’uko amajuru ari hejuru cane y’isi, ni ko n’inzira zanje ziri hejuru cane y’inzira zanyu, n’ivyiyumviro vyanje bikaba hejuru cane y’ivyiyumviro vyanyu.”​—Yes. 55:8, 9.

3. Ni uburyo bubiri ubuhe dushobora kwihatira kugiranira “ubugenzi somambike na Yehova”?

³ Ariko none ivyo vyoba bisigura yuko tudakwiye mbere kugerageza gutahura ukuntu Yehova yiyumvira? Habe namba. Naho tudashobora kwigera dutahura mu buryo bushitse ivyiyumviro vya Yehova vyose, Bibiliya ituremesha kugiranira “ubugenzi somambike na Yehova.” (Soma Zaburi 25:14; Imigani 3:32.) Uburyo bumwe dushobora kurushiriza kwiyegereza Yehova ni mu kwitwararika ibikorwa vyiwe nk’uko vyanditse mw’Ijambo ryiwe, ari ryo Bibiliya. (Zab. 28:5) Ubundi buryo ni mu kurondera kumenya “umuzirikanyi wa Kristu,” we “shusho y’Imana itaboneka.” (1 Kor. 2:16; Kol. 1:15) Dufashe umwanya wo kwiga inkuru zo muri Bibiliya tukongera tukazizirikanako, turashobora gutangura gutahura kamere za Yehova be n’ukuntu yiyumvira.

Uraba maso ku mpengamiro itabereye

4, 5. (a) Ni impengamiro itabereye iyihe dukeneye kwirinda? Sigura. (b) Abisirayeli biyumviriye mu buryo butabereye ubuhe?

⁴ Uko tuzirikana ku bikorwa vya Yehova, turakeneye kwirinda impengamiro yo gutora amahinyu Imana dufatiye ku ngingo abantu bishingira. Iyo mpengamiro irerekezwako mu buryo butadomako mu majambo Yehova yavuze yanditswe muri Zaburi 50:21 agira ati: “Wiyumviriye yuko ntobuze kumera nkawe.” Ni nk’uko incabwenge imwe mu vya Bibiliya yabivuze ubu hakaba haciye imyaka irenga 175 iti: “Usanga abantu bafise impengamiro yo gutora amahinyu Imana bafatiye ku ngingo ubwabo bishingiye no kwiyumvira yuko Imana ibwirizwa gukurikiza amategeko nk’arya nyene biyumvira ko bakwiye gukurikiza.”

⁵ Turakeneye kwiyubara kugira ntitureke ngo ingingo twebwe ubwacu twishingira be n’ivyipfuzo vyacu abe ari vyo twisunga mu bijanye n’ukuntu tubona Yehova. Ni kubera iki ivyo bihambaye? Mu bisanzwe, uko twiga Ivyanditswe, twoshobora kubona umengo bimwebimwe mu vyo Yehova yakoze ntibibereye dufatiye ku kuntu tubona ibintu mu buryo buri n’aho bugarukira kandi burimwo agahaze. Abisirayeli bariyumviriye muri ubwo buryo maze bashika ku ciyumviro kitari co mu bijanye n’ukuntu Yehova yabafata. Raba ivyo Yehova yababwiye: “Namwe ntimuzobura kuvuga ngo: ‘Inzira ya Yehova ntitumbereye.’ Enda niwumve, ewe nzu ya Isirayeli! Inzira yanje ntitumbereye? Mbega inzira zanyu si zo zidatumbereye?”​—Ezk. 18:25.

6. Ni icigwa ikihe Yobu yize, kandi dushobora gute kwungukira ku vyamushikiye?

⁶ Ikintu codufasha kwirinda kugwa mu mutego wo guhinyura Yehova dufatiye ku ngingo twebwe ubwacu twishingira, ni ukumenya yuko tubona ibintu mu buryo buri n’aho bugarukira be n’uko rimwe na rimwe tubibona mu buryo burimwo amakosa bimwe bikomeye. Ico ni co cigwa Yobu yari akeneye kwiga. Igihe yariko arashikirwa n’imibabaro yarihebuye rwose maze acika umuntu asa n’uwurajwe ishinga cane n’ivyiwe gusa. Ntiyabaye akibona neza ibibazo vyari bihambaye kuruta ibindi. Ariko rero Yehova abigiranye urukundo, yaramufashije kubona ibintu mu buryo bwagutse. Mu kubaza Yobu ibibazo bitandukanye birenga 70, akaba ata na kimwe muri vyo Yobu yashoboye kwishura, Yehova yarashimitse ku vy’uko Yobu yatahura ibintu mu buryo buri n’aho bugarukira. Yobu yaciye yicisha bugufi, arahindura ukuntu abona ibintu.​—Soma Yobu 42:1-6.

Ingene twogira “umuzirikanyi wa Kristu”

7. Ni kubera iki gusuzuma ivyo Yezu yakoze bidufasha gutahura ukuntu Yehova yiyumvira?

⁷ Yezu yariganye neza Se wiwe mu bintu vyose yavuga no mu bintu vyose yakora. (Yoh. 14:9) Ku bw’ivyo rero, gusuzuma ivyo Yezu yakoze biradufasha gutahura ukuntu Yehova yiyumvira. (Rom. 15:5; Flp. 2:5) Nimuze rero dusuzume inkuru zibiri zo mu Njili.

8, 9. Nk’uko bivugwa muri Yohani 6:1-5, ni ibiki vyatumye Yezu abaza ikibazo Filipo, kandi ni kubera iki yakimubajije?

⁸ Numere nk’uwubona ibi bintu. Hari imbere gato ya Pasika yo mu 32 G.C. Hari haciye akanya intumwa za Yezu zivuye mu rugendo ruhambaye rwo kwamamaza hirya no hino i Galilaya. Kubera yuko ico gikorwa cose cari caziruhishije, Yezu yaciye azijana ahantu hiherereye ku nkengera y’Ikiyaga ca Galilaya iherereye mu Buraruko bushira Ubuseruko. Ariko rero, abantu ibihumbi n’ibihumbi baciye babakurikira babasangayo. Yezu amaze gukiza iryo sinzi no kubigisha ibintu vyinshi, haciye havyuka ingorane ijanye no kumenya ingene bokora igikorwa kinaka. None abo bantu bose bari gushobora gute kuronka ico bafungura muri ako gahinga ka nyaganande? Yezu amaze kubona yuko ico kintu gikenewe, yaciye abaza Filipo, uno akaba yava muri ako karere, ati: “Tugurira hehe imikate kugira aba barye?”​—Yoh. 6:1-5.

⁹ Kubera iki none Yezu yabajije Filipo ico kibazo? Yezu yoba yari ahagaritswe umutima no kumenya icokorwa? Oya. None vy’ukuri yariko yiyumvira iki? Intumwa Yohani, na we nyene akaba yari ng’aho, asigura ati: “[Yezu] yariko avuga ivyo kugira amugeze, kuko we yari azi ico yagira akore.” (Yoh. 6:6) Mu kuvuga ayo majambo, Yezu yaragejeje iterambere abigishwa biwe bari bagezeko mu vy’impwemu. Mu kubaza ico kibazo, yarakwegereye ivyiyumviro vyabo maze arabaha akaryo ko kwerakana yuko bizeye ivyo yari gushobora gukora. Mugabo baragishije ako karyo maze barerekana vy’ukuri yuko babona ibintu mu buryo buri n’aho bugarukira. (Soma Yohani 6:7-9.) Yezu yaciye abandanya kubereka yuko yari ashoboye gukora ikintu mbere batari biyumviriye. Yaragaburiye ku gitangaro abo bantu ibihumbi n’ibihumbi bari bashonje.​—Yoh. 6:10-13.

10-12. (a) Ni igiki coshobora kuba caratumye Yezu adaca akorera uwo mugore w’Umugirikikazi ico yari amusavye? Sigura. (b) Ni igiki tugira turimbure?

¹⁰ Iyo nkuru yoshobora kudufasha gutahura ukuntu Yezu yiyumvira mu bijanye n’ikindi kintu cabaye. Gatoyi inyuma y’aho Yezu agaburiye uwo mugwi munini w’abantu, we hamwe n’intumwa ziwe barafashe urugendo baja mu Buraruko, hakurya y’imbibe za Isirayeli, bashika mu micungararo ya Tiro na Sidoni. Igihe bari ng’aho, barahuye n’umugore w’Umugirikikazi, uno akaba yaringinze Yezu ngo amukirize umukobwa wiwe. Yezu yabanje kwirengagiza uwo mugore. Mugabo igihe yabandanya kumwinginga, Yezu yamubwiye ati: “Banza ureke abana bahage, kuko atari vyiza gufata umukate w’abana ukawuterera utubwa.”​—Mrk. 7:24-27.

¹¹ Ni kubera iki Yezu yabanje kwanka gufasha uwo mugore? Yoba yariko aramugeza, nk’uko yagejeje Filipo, kugira ngo arabe ukuntu yari kuvyifatamwo, akaba amuhaye akaryo ko kwerekana ukwizera kwiwe? Naho ijwi Yezu yakoresheje ritumvikanye mu gisomwa canditswe, ntiryamuciye intege. Ukuba yarakoresheje imvugo ngo “utubwa” vyatumye ukwo kugereranya ibintu kutumvikana ko gukaze. Yezu ashobora rero kuba yariko akora nk’umuvyeyi afise intumbero yo guha umwana ico yamusavye ariko akirinda gukora ikintu na kimwe cerakana ko afise iyo ntumbero, kugira ngo arabe yuko uwo mwana yamusavye ico kintu ashimitse. Uko vyoba vyari vyifashe kwose, uwo mugore amaze guserura ukwizera kwiwe, Yezu abigiranye umutima ukunze yaramukoreye ico yari amusavye.​—Soma Mariko 7:28-30.

¹² Izo nkuru zibiri zo mu Njili ziradufasha gutahura bimwe bigera kure “umuzirikanyi wa Kristu.” Nimuze ubu na ho twihweze ukuntu izo nkuru zibiri zishobora kudufasha kurushiriza gutahura umuzirikanyi wa Yehova.

Ingene Yehova yafashe Musa

13. Gutahura ukuntu Yezu yiyumvira bidufasha gute?

¹³ Gutahura ukuntu Yezu yiyumvira biradufasha gutahura imirongo yo mu Vyanditswe yoshobora kuba igoye gutegera. Nk’akarorero, rimbura amajambo Yehova yabwiye Musa inyuma y’aho Abisirayeli bahinguriye inyana y’inzahabu kugira ngo bayisenge. Imana yavuze iti: “Nitegereje aba bantu: emwe, ni abantu b’izosi ridadaraye. Ubu rero ndeka nkwereke, ishavu ryanje ribarurumbire, ndabatikize, nawe ndagukuremwo ihanga rikomeye.”​—Kuv. 32:9, 10.

14. Musa yakiriye gute ivyo Yehova yari amubwiye?

¹⁴ Iyo nkuru ibandanya kuvuga iti: “Musa aca atangura gutakambira Yehova Imana yiwe ati: ‘Kubera iki ga Yehova, ishavu ryawe ryokwirirwa rirarurumbira abantu bawe wakuye mu gihugu ca Misiri ku bubasha buhambaye no ku kiganza gikomeye? Kubera iki Abanyamisiri bokwirirwa baravuga ngo: “Yabakuyeyo mu ntumbero mbi kugira abicire mu misozi no kugira abatikize ku buringanire bw’ubutaka”? Hindukira, ureke ishavu ryawe rirurumba, wicuze ku nabi wagira ukorere abantu bawe. Ibuka Aburahamu, Izahaki na Isirayeli abasavyi bawe, abo warahiye wewe nyene, mu kubabwira uti: “Nzogwiza uruvyaro rwanyu nk’inyenyeri zo mu majuru, kandi iki gihugu cose nerekanye nzogiha uruvyaro rwanyu, kugira ngo bacigabire koko gushika igihe kitagira urugero.”’ Nuko Yehova atangura kwicuza ku nabi yari yavuze ko akorera abantu biwe.”​—Kuv. 32:11-14.a

15, 16. (a) Ivyo Yehova yavuze vyatumye Musa aronka akahe karyo? (b) Ni mu buryo nyabaki Yehova ‘yicujije’?

¹⁵ Musa yoba vy’ukuri yari akeneye gukosora ukuntu Yehova yiyumvira? Habe namba! Naho Yehova yaseruye ico yashaka gukora, iyo si yo yari ingingo yiwe ya nyuma. Mu bisanzwe mu kuvuga ayo majambo, Yehova yariko arageza Musa, nk’uko mu nyuma Yezu yagejeje Filipo na wa mugore w’Umugirikikazi. Musa yarahawe akaryo ko guserura ukuntu abona ibintu.b Yehova yari yagenye Musa ngo abe umuhuza hagati yiwe na Isirayeli, kandi yarubahiriza ukuba yari yaramugenye ngo arangure urwo ruhara. Musa yoba yari gutwarwa n’ishavu? Yoba yari gufatira kuri ako karyo kugira aremeshe Yehova ngo yibagire ibijanye na Isirayeli maze atume abakomoka kuri Musa bacika ihanga rikomeye?

¹⁶ Inyishu Musa yatanze yarerekanye yuko yizera akongera akizigira ubutungane bwa Yehova. Ukuntu yavyifashemwo kwarerekanye ko atari arajwe ishinga n’ivyiwe ahubwo yuko yari arajwe ishinga n’izina rya Yehova. Ntiyashaka ko ritukwa. Musa yarerekanye rero yuko yatahura “umuzirikanyi wa Yehova” ku bijanye n’ico kibazo. (1 Kor. 2:16) Uti none ivyo vyavuyemwo iki? Kubera ko Yehova atari yiyemeje kugira ico akoze vyanka vyakunda, iyo nkuru yahumetswe ivuga yuko ‘yatanguye kwicuza.’ Mu giheburayo, iyo mvugo ishobora gusa gusobanura yuko Yehova atateje ivyago yari yavuze ko yashaka guteza iryo hanga ryose.

Ingene Yehova yafashe Aburahamu

17. Yehova yerekanye gute ukwihangana gukomeye mu kuntu yavyifashemwo ku bijanye n’ivyari biraje ishinga Aburahamu?

¹⁷ Akandi karorero kerekana ingene Yehova aha abasavyi biwe akaryo ko guserura ukwizera be n’ukwizigira bafise, kajanye n’ivyo Aburahamu yasavye ku vyerekeye Sodomu. Muri iyo nkuru, Yehova yarerekanye ukwihangana gukomeye mu kureka Aburahamu akabaza ibibazo umunani bikurikirana. Hari aho bishika Aburahamu agatakamba ashimitse ati: “Ni ibitokwiyumvirwa kuri wewe yuko wokora gutyo ukicana umugororotsi n’umubisha, umugororotsi bikamubera nk’uko bibera umubisha! Ni ibitokwiyumvirwa kuri wewe. Mbega Umucamanza w’isi yose ntazokora ibigororotse?”​—Ita. 18:22-33.

18. Ni ibiki twigira ku kuntu Yehova yafashe Aburahamu?

¹⁸ Dufatiye kuri iyo nkuru, ni ibiki twiga ku bijanye n’ukuntu Yehova yiyumvira? Yehova yoba yari akeneye ko Aburahamu amufasha kuzirikana kugira ngo afate ingingo ibereye? Oya. Ego ni ko, Yehova yari gushobora gusa kuvuga mu ntango imvo zatumye afata iyo ngingo. Mugabo biciye kuri ivyo bibazo, Yehova yarahaye Aburahamu umwanya wo kwemera iyo ngingo no gutahura ukuntu yiyumvira. Ivyo vyaratumye kandi Aburahamu atahura ukuntu ikibabarwe n’ubutungane vya Yehova bigera kure. Egome, Yehova yafashe Aburahamu nk’umugenzi.​—Yes. 41:8; Yak. 2:23.

Ivyigwa tuhakura

19. Dushobora gute kwigana Yobu?

¹⁹ Ni ibiki twize ku bijanye n’“umuzirikanyi wa Yehova”? Turakeneye kureka Ijambo ry’Imana rikadufasha gutahura umuzirikanyi wa Yehova mu buryo butarimwo amakosa. Ntidukwiye kwigera dutora amahinyu Yehova dufatiye ku kuntu tubona ibintu mu buryo buri n’aho bugarukira, ku ngingo twishingira, no ku kuntu twiyumvira. Yobu yavuze ati: “[Imana si] umuntu nkanje ngo ndayishure, ngo tuzanane mu ntahe.” (Yobu 9:32) Cokimwe na Yobu, igihe dutanguye gutahura umuzirikanyi wa Yehova turavyurirwa umutima wo kuvuga duti: “Raba! Utwo ni udusunwa tw’inzira zayo, vyongeye, ese ingene ivyo twumva ku biyerekeye ari utwongoshwe gusa! Ariko umuturagaro wayo ukomeye, ni nde yokwerekana ko awutegera?”​—Yobu 26:14.

20. Dukwiye gukora iki igihe dushitse ku murongo wo mu Vyanditswe utugora gutahura?

²⁰ Igihe dusoma Ivyanditswe, dukwiye gukora iki mu gihe dushitse ku murongo ugoye gutahura, na canecane ku bijanye n’ukuntu Yehova yiyumvira? Mu gihe tumaze kugira ubushakashatsi kuri ico kintu, mugabo tukaba tutararonka inyishu itomoye, ivyo turashobora kubibona nk’ikintu kigeza ukwizigira Yehova kwacu. Uribuka yuko rimwe na rimwe amajambo amwamwe aduha akaryo ko kwerekana yuko twizigira uburyo bwose kamere za Yehova zigaragariramwo. Nimuze twemere twicishije bugufi yuko tudatahura ikintu cose Yehova akora. (Umus. 11:5) Gutyo, tuzokwihutira kwemera aya majambo intumwa Paulo yavuze ati: “Ewe bwimbike bw’ubutunzi n’ubukerebutsi n’ubumenyi vy’Imana! Ese ukuntu imanza zayo zidaserangurika be n’ukuntu inzira zayo ata wushobora kuzitora! Kuko ‘ni nde yamenye umuzirikanyi wa Yehova, canke ni nde yabaye umujanama wiwe?’ Canke, ‘Ni nde yabanje kumuha, kugira ngo bibe ngombwa ko avyishurwa?’ Kubera ko vyose biriho bivuye kuri we, bigizwe na we, no ku bwiwe. Ubuninahazwa bube ubwiwe ibihe vyose. Amen.”​—Rom. 11:33-36.

[Utujambo tw’epfo]

Woba uvyibuka?

• Ni ibiki bizodufasha kwirinda impengamiro yo gutora amahinyu Yehova dufatiye ku ngingo twishingira?

• Gutahura ivyo Yezu yakoze bishobora gute kudufasha kugiranira “ubugenzi somambike na Yehova”?

• Ni ivyigwa ibihe wigiye ku biyago Yehova yagiranye na Musa hamwe na Aburahamu?

[Akajambo gasigura ifoto ku rup. 5]

Ni ibiki twiga ku bijanye n’ukuntu Yehova yiyumvira turavye ingene yafashe Musa na Aburahamu?