Ijambo rya Yehova ni rizima
Ibikurubikuru vyo mu Gitabu ca Kabiri ca Zaburi
TWEBWE abasavyi ba Yehova, turitega gushikirwa n’ibigeragezo. Intumwa Paulo yanditse ati: “Abagomba bose kugenda bubaha Imana bari muri Kristo Yesu, bazohamwa” (2 Timoteyo 3:12). Ni igiki none kizodufasha kwihanganira ibigeragezo n’uruhamo, gutyo tukaba twerekanye yuko turi intadohoka ku Mana?
Igice ca kabiri co muri vya bice bitanu bikoranijwemwo amazaburi, kiratanga iyo mfashanyo. Kuva kuri Zaburi ya 42 gushika ku ya 72 haratwereka yuko kugira ngo twihanganire ibigeragezo, dutegerezwa kwizigira Yehova tugaherezako, tukongera tukiga kumuhanga amaso ngo abe ari we aturokora. Ese ukuntu ico ari icigwa gihambaye kuri twebwe! Ubutumwa buri mu Gitabu ca Kabiri ca Zaburi, cokimwe n’uburi mu bindi vyanditswe vyo mw’Ijambo ry’Imana, vy’ukuri ni ‘buzima kandi burafise ububasha’, no muri iki gihe.—Abaheburayo 4:12.
YEHOVA NI WE “BUHUNGIRO BGACU N’INKOMEZI ZACU”
Umulewi umwe ari mu bunyagano. Arababazwa cane n’uko adashobora kuja gusengera ku rusengero rwa Yehova, yamara akiremesha ati: “Mutima wanje, n’iki gitumye wicurikīra? N’iki gitumye umpagararamwo? Ni wishimire Imana” (Zaburi 42:5, 11; 43:5). Uwo murongo uguma usubirwamwo, ufatanya ingingo zitatu zigizwe n’amajambo ndyoshamvugo za Zaburi ya 42 n’iya 43, bigatuma izo ngingo zigira igisomwa ndyoshamvugo kimwe. Zaburi ya 44 irimwo amajambo y’ugutakambira ihanga ry’Ubuyuda, rino rikaba iriri mu mubabaro kumbure biturutse kw’iterabwoba ry’Abashuri bashaka kuritera mu gihe ca wa Mwami Hezekiya.
Zaburi ya 45, iyigizwe n’ururirimbo rwerekeye ubugeni bw’umwami, yerekeza mu buryo bw’ubuhanuzi ku Mwami Mesiya. Amazaburi atatu akurikira adondora Yehova ko ari ‘ubuhungiro n’inkomezi’, “Umwami ahambaye aganza isi yose”, be n’“igihome kirekire gikīngira abantu” (Zaburi 46:1; 47:2; 48:3). Zaburi ya 49 na yo, ntiworaba ukuntu yerekana neza yuko ata muntu n’umwe “ashobora gucungura mugenzi we na gatoya” (Zaburi 49:7)! Amazaburi umunani ya mbere yo muri ico gice ca kabiri, yitirirwa abahungu ba Kora. Iy’icenda yoyo, ari yo Zaburi ya 50, yatunganijwe na Asafu.
Inyishu z’ibibazo bishingiye ku Vyanditswe:
44:19—Aho “hantu h’imbgebge” hari hehe? Umwanditsi w’iyo zaburi ashobora kuba yariko avuga ahantu habera urugamba, aho imivyimba y’abaruguyemwo usanga iribwa n’imbwebwe.
45:13, 14a—Uwo ‘mukobwa w’umwami azohava azanirwa umwami’ ni nde? Ni umukobwa w’“Umwami w’ibihe bidahera”, Yehova Imana (Ivyahishuriwe 15:3, NW). Agereranya rya shengero rininahaye ry’abakirisu 144.000, abo Yehova agira abana biwe mu kubasiga impwemu yiwe (Abaroma 8:16). Uwo “mukobga” wa Yehova, “[u]witegu[y]e nk’uk’umugeni asharizwa umugabo wiwe”, azozanirwa umukwe ari we wa Mwami Mesiya.—Ivyahishuriwe 21:2.
45:14b, 15—Abo “bakobga” bagereranya bande? Ni rya “shengero ryinshi” ry’abasenga b’ukuri, bifatanya n’amasigarira y’abasizwe bakongera bakabashigikira. Kubera ko bazoba “bavūye muri wa mubabaro mwinshi” ari bazima, bazoba bari kw’isi igihe ubugeni bw’Umwami Mesiya buzosozerwa mw’ijuru (Ivyahishuriwe 7:9, 13, 14). Ico gihe, bazokwumva buzuye “umunezero n’uguhimbarwa”.
45:16—Ni gute abana bazosubira mu gishingo ca ba sekuruza b’umwami? Igihe Yezu yavukira ngaha kw’isi, yari afise ba sekuruza. Bazoba abana biwe igihe azobazura mu bapfuye mu gihe ca ya Ngoma yiwe y’imyaka igihumbi. Bamwe muri bo bazoba mu bagenywe kuba “abaganwa mu gihugu cose”, ni ukuvuga kw’isi yose.
50:2—Ni kubera iki Yeruzalemu hitwa ahantu “h’ubgiza buhebuje”? Ico gisagara nticitwa gutyo kubera ukuntu casa. Ahubwo riho, ni kubera yuko Yehova yagikoresheje yongera aragiha ubwiza bwinshi mu guhitamwo ko kiba ari co cubakwamwo urusengero rwiwe, kikongera kikaba wo murwa w’abami yimika.
Ivyigwa tuhigira:
42:1-3. Nka kurya impongokazi iri ahantu h’ubugaragwa yipfuza cane amazi, ni ko uwo Mulewi yumva anyotewe Yehova. Uwo mugabo, kuba atashobora gusengera Yehova ku rusengero rwiwe vyaramubabaza cane gushika n’aho ‘amosozi yiwe amubera ivyokurya ku murango no mw’ijoro’, kuko ata kayabagu yari agifise. Wumva natwe none tudakwiye gutsimbataza agatima ko guha agaciro cane ugusenga Yehova turi kumwe n’abo dusangiye ukwizera?
42:4, 5, 11; 43:3-5. Bishitse tukamara igihe kinaka tutari kumwe n’ishengero rya gikirisu kubera impamvu itatuvuyeko, kwibuka ukuntu twaryoherwa turi kumwe na ryo birashobora kudukomeza. Naho mu ntango ivyo vyoshobora gutuma turushiriza kwumva twishwe n’irungu, vyotwibutsa kandi ko Imana ari yo buhungiro bwacu be n’uko dukeneye kuyihanga amaso ngo idutabare.
46:1-3. Naho twoshikirwa n’icago ikihe, dutegerezwa kwizigira tudakekeranya na gatoyi yuko “Imana [ari] yo buhungiro bgacu n’inkomezi zacu”.
50:16-19. Umuntu wese avugana ubugunge kandi amogorera ikibi, ntakwiye na gato guserukira Imana.
50:20. Aho kwandagaza amakosa y’abandi, dukwiye kuyihoza.—Ab’i Kolosayi 3:13.
“MUTIMA WANJE, UHWEKERE KU MANA YONYENE”
Amazaburi agize uyu mugwi atangurwa n’isengesho rivuye ku mutima Dawidi atura inyuma y’aho akoreye icaha na Batisheba. Kuva kuri Zaburi ya 52 gushika ku ya 57 harerekana ko Yehova azokiza abamukorera umutwaro wabo bakongera bakamuhanga amaso ngo abarokore. Nk’uko bivugwa muri Zaburi ya 58 gushika ku ya 64, mu marushwa yose Dawidi acamwo, Yehova ni we agira ubuhungiro bwiwe. Aririmba ati: “Mutima wanje, uhwekere ku Mana yonyene, kukw ari yo ivyizigiro vyanje vyandurukako”.—Zaburi 62:5.
Ubucuti somambike dufitaniye n’Umurokozi wacu bukwiye kutuvyurira umutima wo ‘kuririmba twerekana icubahiro c’izina ryiwe’ (Zaburi 66:2). Muri Zaburi ya 65, Yehova ashemezwa yuko ari umutanzi atanga atitangiriye itama, muri Zaburi ya 67 n’iya 68 agashemezwa yuko ari Imana ikora ibikorwa vy’ugukiza, muri Zaburi ya 70 n’iya 71 na ho agashemezwa ko ari we Murokozi.
Inyishu z’ibibazo bishingiye ku Vyanditswe:
51:12—Dawidi yasavye ko yoshigikirwa n’“umutima [“ukunze”, NW]” wa nde? Uwo si umutima ukunze Imana yogize wo gufasha Dawidi, canke impwemu yera ya Yehova, ahubwo ni umutima ukunze wa Dawidi ubwiwe, ni ukuvuga agatima afise. Yariko asaba Imana ngo itume agira umutima ukunze wo gukora ibigororotse.
53:1—Umuntu ahakana ko Imana iriho ni “igipfu” mu buryo ubuhe? Ubwo bupfu bwiwe ntibusobanura ko atagira ubwenge. Ahubwo, ni ubupfu mu vy’inyifato ibereye, ivyo bikaba bibonekera ku kuntu aheza akononekara mu vy’ukwigenza runtu nk’uko bidondorwa muri Zaburi 53:1-4.
58:3-5—Ni mu buryo ubuhe abanyakibi bameze nk’inzoka? Ibinyoma bavuga ku bandi bimeze nk’ubumara bw’inzoka. Barasiga iceyi abandi, nka kurya ubumara bugirira nabi umubiri. Nka kurya kw’“imamba itumva, yiziba amatwi”, abanyakibi bariziba amatwi igihe bahawe ubuyobozi canke bakosowe.
58:7—Ni mu buryo ki abanyakibi “bakamangan[a] nk’amazi ashēshwe”? Dawidi ashobora kuba yariko yiyumvira amazi yo mu myonga minaka yo muri ca Gihugu c’Isezerano. Naho isegenya yotuma mwene iyo myonga yuzura, ayo mazi y’isegenya yoca atemba ningoga maze agakamangana. Dawidi yariko asaba ko abanyakibi bokamangana ningoga.
68:13—Ni mu buryo ki ‘amababa y’inuma yakayanganako ifeza, n’amoya yayo agakayanganako izahabu y’umuhondo’? Inuma zimwezimwe zifise ibara ry’ubururu ritazize usanga amababa yazo aca ibibatsi. Iyo ziri ku muco w’izuba ukayangana nk’izahabu, amababa yazo aca asa nk’icuma. Kumbure Dawidi yariko agereranya ingabo z’Abisirayeli zije zitahukanye intsinzi n’inuma imeze nk’izo, iyo usanga iri n’ubushobozi bukomeye bwo kuguruka kandi ica ibibatsi. Nk’uko incabwenge zimwezimwe zibivuga, ayo majambo ashobora kuba adondora akagenegene, canke ikintu c’agaciro, catwawe nk’isahu. Uko biri kwose, Dawidi yariko avuga ibijanye n’ukuntu Yehova yafashije abasavyi biwe kunesha abansi babo.
68:18—Izo ‘ngabire z’abantu’ bari bande? Abo bari bamwe mu bagabo bagirwa inyagano mu gihe ca Gihugu c’Isezerano cariko cigarurirwa. Mu nyuma abo bagabo bashinzwe igikorwa co gufasha Abalewi.—Ezira 8:20.
68:30—Ukwo gusaba ko ‘ca gikoko co mu rufunzo camirwa’ gushaka kuvuga iki? Mu kugereranya abansi b’abasavyi ba Yehova n’ibikoko, Dawidi yasavye Imana ko yobamira, ni ukuvuga akaguma acungereye ububasha bwabo bwo gukora ikibi.
69:23—‘Guhindisha agashitsi ikiyunguyungu’ c’abansi bisobanura iki? Imitsi yo mu kiyunguyungu iragira uruhara ruhambaye igihe umuntu akora ibikorwa bisaba inguvu nyinshi, nk’uguterura canke kwikorera ibintu biremereye. Igihe umuntu ikiyunguyungu ciwe kidakomeye, vyerekana ko ata nguvu aba agifise. Dawidi yariko asaba ko abansi biwe inguvu zobaherana.
Ivyigwa tuhigira:
51:1-4, 17. Gukora icaha si ngombwa ngo bidutandukanye na Yehova Imana. Twigaye, turashobora guhera amazinda yuko aheza akatugirira ikigongwe.
51:5, 7-10. Mu gihe twacumuye, turashobora kwitura Yehova tukamusaba ko aduharira kubera ko twavutse turi abanyabicumuro. Turakwiye kandi kumusaba ngo aduhumanure, atume ivyacu bisubira kumera neza, adufashe gukura mu mutima wacu impengamiro zo gukora icaha, yongere adufashe kuguma dushikamye.
51:18. Ivyaha Dawidi yakoze vyarageramiye ineza y’ihanga ryose. Ni co gituma yasavye Imana ko yogirira ineza i Siyoni. Igihe dukoze icaha gikomeye, akenshi birasiga iceyi izina rya Yehova be n’ishengero. Turakenera gusaba Imana ngo itunganye inabi twoshobora kuba twarateje.
52:8. Mu gihe tugamburukira Yehova tukongera tukakirana umutima ukunze indero adutoza, turashobora kumera “nk’igiti ca elayo kiremvye co mu rugo rw’Imana”, ni ukuvuga tukamwiyegereza tukongera tukimbuka mu murimo wiwe.—Abaheburayo 12:5, 6.
55:4, 5, 12-14, 16-18. Dawidi yaragize intuntu nyinshi kubera ubugarariji bw’umuhungu wiwe bwite Abusalomu be n’ukuntu umuhanuzwajambo wiwe Ahitofeli yamuhemukiye. Mugabo ivyo ntivyatumye Dawidi ataba acizigira cane Yehova. Natwe, ntidukwiye kureka ngo umubabaro wo mu mutima utume tutaba tucizigira cane Imana.
55:22. Dukorera gute Yehova umutwaro wacu? Tubigira (1) mu kumubwira mw’isengesho ikituraje ishinga, (2) mu kuronderera ubuyobozi n’imfashanyo mw’Ijambo ryiwe no mw’ishirahamwe ryiwe, no (3) mu kugira uko dushoboye kwose kugira ngo dutume ivyacu bimera neza kuruta.—Imigani 3:5, 6; 11:14; 15:22; Ab’i Filipi 4:6, 7.
56:8. Yehova ntiyama azi gusa ukuntu ivyacu vyifashe, mugabo kandi arazi n’ingene bigira ico bikoze ku kuntu twumva tumerewe mu mutima.
62:11. Imana ntikenera inguvu ziva ahandi hantu. Ni yo soko ry’ububasha. ‘Ni yo ifise inganji’.
63:3. “Imbabazi” z’Imana, ari bwo buntu-mvarukundo bwayo, ‘ziraruta ubuzima’ kubera yuko mu gihe itotugirira ubuntu-mvarukundo ubuzima bwoba ata co busobanura kandi nta ntumbero bwogira. Vyoba biranga ubukerebutsi dutsimbataje ubucuti na Yehova.
63:6. Mw’ijoro, kubera ko ata rwamo canke ibidusamaza biba bihari, harashobora kuba igihe ciza cane co kuzirikana.
64:2-4. Urusaku rurashobora gusiga iceyi umuntu ata co azira. Ntidukwiye kurutega ugutwi canke ngo turukwiragize.
69:4. Kugira ngo tuzigame amahoro, rimwe na rimwe hari aho vyoba biranga ubukerebutsi ‘turishe ico tutatwaye’ mu gusaba imbabazi, naho ata coba kitwemeza ko ari twe turi mw’ikosa.
70:1-5. Yehova aratwumvira igihe tumutakambira tumusaba ko yodutabara (1 Ab’i Tesalonike 5:17; Yakobo 1:13; 2 Petero 2:9). Naho Imana yoshobora kureka ikigeragezo kikabandanya, iraduha ubukerebutsi budufasha kumenya uko tuvyifatamwo muri ico kigeragezo ikongera ikaturonsa inkomezi zo kucihanganira. Ntizoreka ngo tugeragezwe n’ivyo tudashobora kwihanganira.—1 Ab’i Korinto 10:13; Abaheburayo 10:36; Yakobo 1:5-8.
71:5, 17. Dawidi yaratsimbataje umutima rugabo yongera aragira inkomezi mu kwizigira Yehova mu buto bwiwe, eka mbere n’igihe yari ahanganye na ca kigatanya c’Igifilisitiya ari co Goliyati (1 Samweli 17:34-37). Ni vyiza ko abakiri bato biheka kuri Yehova mu vyo bakora vyose.
“Isi yose yuzure icubahiro cayo”
Zaburi ya 72, ari na rwo ruririmbo rwa nyuma rwo mu gice ca kabiri gikoranirijwemwo amazaburi, ivuga ivyerekeye ingoma ya Salomo, ikerekana mu buryo menyeshakazoza ukuntu ibintu bizoba vyifashe ku ngoma ya Mesiya. Ntiworaba ukuntu imihezagiro idondorwa ng’aho ari myiza! Amahoro azosasagara, agahahazo n’ubukazi biveho, here impeke ku buryo haba agahimbo kw’isi. Twoba tuzoba mu bazonezererwa iyo mihezagiro hamwe n’iyindi Ubwami buzozana? Birashoboka nimba, cokimwe n’umwanditsi wa Zaburi, duhimbarwa no guhanga amaso Yehova, tukamugira we buhungiro bwacu n’inkomezi zacu.
“Amasengesho ya Dawidi . . . arangira[na]” n’aya majambo agira ati: “Uhoraho Imana, ni yo Mana y’Abisirayeli, ihimbazwe; ni yo yonyene ikora ibitangaza: izina ryayo ry’icubahiro rihimbazwe ibihe bidashira; kand’isi yose yuzure icubahiro cayo; Amen, kandi Amen” (Zaburi 72:18-20). Nimuze na twebwe duhimbaze Yehova twongere dushemagize izina ryiwe ry’icubahiro n’umutima wacu wose.
[Ifoto ku rup. 9]
Woba uzi abagereranywa n’“umukobga w’umwami”?
[Ifoto ku rup. 10, 11]
Woba uzi igituma Yeruzalemu hitwa ahantu “h’ubgiza buhebuje”?