‘Inzira za Yehova ziraroranye’

‘Inzira za Yehova ziraroranye, kandi abagororotsi ni bo bazozigenderamwo’.​—HOSEYA 14:9.

1, 2. Ni intango imeze gute Yehova yashiriyeho Abisirayeli, mugabo vyabagendeye gute?

YEHOVA yarashiriyeho Abisirayeli intango igororotse mu misi y’umuhanuzi Musa. Ariko rero, mu ntango y’ikinjana c’umunani B.G.C., bari barononekaye rwose ku buryo Imana yabonye ko bagirwa n’ibibi vy’agahomerabunwa. Ivyo biribonekeza uravye muri Hoseya ikigabane ca 10 gushika ku kigabane ca 14.

² Umutima wa Isirayeli wari warabaye indyadya. Abantu bo muri ubwo bwami bwari bugizwe n’imiryango cumi bari ‘barimye ivyaha’ canke ubukozi bw’ikibi, maze bimbura ukugabitanya (Hoseya 10:1, 13). Yehova yavuze ati: “Isirayeli uhereye akir’umwana naramukunda, maze mpamagara uwo mwana wanje ngw ave muri Egiputa” (Hoseya 11:1). Naho Imana yari yarabohoje Abisirayeli ikabakura mu buja bwo mu Misiri, ico ciza bacishuye ukubesha be n’uruhendo (Hoseya 11:12). Ni co gituma Yehova yaciye abaha iyi mpanuro igira iti: “Hindukirira Imana yawe: gumya imbabazi n’ibiroranye”.​—Hoseya 12:6.

3. Ni ibiki vyoshikiye Samariya yagararije, kandi Abisirayeli bari gushobora gute kugirirwa ikigongwe?

³ Samariya yagararije be n’umwami wayo, vyogize iherezo ry’agahomerabunwa (Hoseya 13:11, 16). Ariko ikigabane ca nyuma c’ubuhanuzi bwa Hoseya gitangura n’aya majambo yo kwinginga agira ati: “Ewe Isirayeli we, garuka k’Uhoraho Imana yawe”. Iyo Abisirayeli bigaya bagasaba ikigongwe, Imana yari kukibagirira. Ariko ntiwumve, bobwirijwe kwemera icese yuko ‘inzira za Yehova ziroranye’, maze bakazigenderamwo.​—Hoseya 14:1-6, 9.

4. Ni ingingo ngenderwako izihe zo mu buhanuzi bwa Hoseya tugiye kurimbura?

⁴ Iki gihimba c’ubuhanuzi bwa Hoseya kirimwo ingingo ngenderwako nyinshi zishobora kudufasha kugendana n’Imana. Izo tugiye kurimbura ni izi: (1) Yehova adusaba ko tumusenga ata buryarya, (2) Imana iragaragariza abasavyi bayo urukundo rudahemuka, (3) turakeneye kwama twizigira Yehova, (4) inzira za Yehova zama ziroranye, (5) abanyavyaha barashobora kugaruka kuri Yehova.

Yehova adusaba ko tumusenga ata buryarya

5. Imana yiteze ko tuyirangurira umurimo umeze gute?

⁵ Yehova yiteze ko tumurangurira umurimo mweranda tudahumanye kandi tutagira uburyarya. Ariko rero, Isirayeli yari yarabaye “umuzabibu w’ikijakija” (NW) utimbuka. Abo muri iryo hanga bari ‘baragwije ibicaniro’ vyo gukoresha mu gusenga kw’ikinyoma. Abo bahuni bari baranashinze inkingi, kumbure bikaba vyari ivyibutso vyari bigenewe gukoreshwa mu gusenga guhumanye. Yehova yari agiye gusangangura ivyo bicaniro no gusitagura izo nkingi.​—Hoseya 10:1, 2.

6. Kugira tugendane n’Imana, ni igiki dutegerezwa kwirinda?

⁶ Uburyarya nta kibanza bufise mu basavyi ba Yehova. Mugabo Abisirayeli vyari vyabagendeye gute? Emwe, bari basigaye ‘bafise imitima ibiri’! Naho bari baragiranye isezerano na Yehova bagacika ihanga ryamwiyeguriye, yasanze buzuye uburyarya. Ni igiki dushobora kwigira kuri ivyo? Nimba twariyeguriye Imana, dutegerezwa kutaba indyadya! Mu Migani 3:32 hatugabisha hati: “Ikidambidambi [ni] igisesema k’Uhoraho, arikw abagororotsi bo, asangiye ibanga na bo”. Kugira tugendane n’Imana, dutegerezwa kugaragaza urukundo “ruva mu mutima utanduye, utarimw’ijwi ri[tw]āgiriza ikibi, no ku kwizera kutar’ukw’uburyarya”.​—1 Timoteyo 1:5.

Imana iragaragariza abasavyi bayo urukundo rudahemuka

7, 8. (a) Ni ryari Imana ishobora kutugaragariza urukundo rudahemuka? (b) Niba twarakoze icaha gikomeye, dukwiye gukora iki?

⁷ Nitwasenga Yehova mu buryo butarimwo uburyarya kandi bugororotse, azotugaragariza ubuntu-mvarukundo, ari rwo rukundo rudahemuka. Ba Bisirayeli bigira ibiro biteze babwiwe bati: “Mubibe mugendereye ukugororoka, mubone kwimbura nk’ukw imbabazi ziri; mumene imishike yanyu; kukw igihe kigeze co kurondera Uhoraho, gushitsa ah’azozira, akabarekurira imvura y’ubugororotsi [ni ukuvuga, “akabigisha ivy’ukugororoka”, NW]”.​—Hoseya 10:12.

⁸ Ese iyo Abisirayeli bigaya bakarondera Yehova! Yohimbawe rero no ‘kubigisha ivy’ukugororoka’. Niba twarakoze icaha gikomeye, nimuze turondere Yehova, tumusenge tumusaba ikigongwe, twongere turondere gufashwa mu vy’impwemu n’abakurambere bakirisu (Yakobo 5:13-16). Nimuze kandi turondere ubuyobozi bw’impwemu yera y’Imana, kubera ko ‘uwubiba mu buryo bw’umubiri azokwimbura ukubora mu mubiri; ariko uwubiba mu mpwemu azokwimbura mu mpwemu ubuzima budahera’ (Ab’i Galatiya 6:8). Turamutse ‘tubivye mu mpwemu’, Imana izobandanya kutugaragariza urukundo rudahemuka.

9, 10. Muri Hoseya 11:1-4 hahuye gute n’ivyo Yehova yagiriye Isirayeli?

⁹ Turashobora kwizigira yuko Yehova yama afatana urukundo abasavyi biwe. Ikimenyamenya c’ivyo tugisanga muri Hoseya 11:1-4, aho dusoma duti: “Isirayeli uhereye akir’umwana naramukunda, maze mpamagara uwo mwana wanje ngw ave muri Egiputa. . . . [Batanze] ibimazi kuri Bayali, [bo]sereza imibavu ibishushanyo bibājwe. Ariko ni jewe nigishije Abefurayimu [ari bo Bisirayeli] gutambuka; nabashize mu kwāha; ariko ntibamenye kw ari jewe nabakijije. Nabakwegesheje imigozi y’umuntu, imigozi y’ibitsibo vy’urukundo; kandi nabamereye nk’[“abaterura ingǒgo bakayikura”, NW] mu mibangabanga yabo, nterekeranya ivyo kurya imbere yabo”.

¹⁰ Hano Isirayeli igereranywa n’umwana mutoyi. Yehova abigiranye urukundo yarigishije Abisirayeli gutambuka, arabatwara mu kwaha. Kandi yaguma abakwegesha “imigozi y’ibitsibo vy’urukundo”. Mbega ishusho y’ibintu ikora ku mutima! Fata ko uri umuvyeyi ariko afasha umwana wiwe gutera intambwe za mbere. Waramvuye amaboko. Hari aho woba uriko urakoresha imigozi kugira ngo ako kana kawe kayifate ntigatembe. Emwe, urukundo Yehova agukunda rurimwo ikibabarwe nk’ico nyene. Arahimbarwa no kukurongora akoresheje “imigozi y’ibitsibo vy’urukundo”.

11. Ni mu buhe buryo Imana ‘yabaye nk’umuntu aterura ingogo’?

¹¹ Mu migenderanire Yehova yagiranira n’Abisirayeli, ‘yabamereye nk’abaterura ingǒgo bakayikura mu mibangabanga yabo, aterekeranya ivyo kurya imbere yabo’. Imana yabaye nk’umuntu aterura canke asunikira inyuma cane ingogo kugira ngo igitungwa gishobore kurisha corohewe. Igihe Abisirayeli baca ingogo yabo yagereranya ukuyobokera Yehova kwabo, ni ho gusa baja munsi y’ingogo y’agakandamizo y’abansi babo (Gusubira mu vyagezwe 28:45, 48; Yeremiya 28:14). Nimuze ntitwigere tugwa mu vyara vy’umwansi wacu mukuru Shetani, maze ngo ducumukuzwe n’ingogo yiwe y’agakandamizo. Ahubwo riho, nimuze tubandanye kugendana na ya Mana yacu y’urukundo tudahemuka.

Niwame wizigira Yehova

12. Twisunze Hoseya 12:6, dusabwa iki kugira ngo tubandanye kugendana n’Imana?

¹² Kugira tubandanye kugendana n’Imana, dutegerezwa kwama tuyizigira. Ba Bisirayeli babwiwe bati: “Hindukirira Imana yawe: gumya imbabazi n’ibiroranye, kandi wame [“wizigira”, NW] Imana yawe udahengeshanya” (Hoseya 12:6). Abo muri Isirayeli bari gushobora gutanga ikimenyamenya c’uko bigaye bakagaruka kuri Yehova, mu kugaragaza imbabazi canke, ubuntu-mvarukundo mu kugumya ibiroranye canke, ubutungane no mu ‘kwizigira Imana badahengeshanya’. Naho twoba tumaze igihe kingana iki tugendana n’Imana, dutegerezwa kwiyemeza kugaragaza ubuntu-mvarukundo, gukora ibiranga ubutungane no kwama twizigira Imana.​—Zaburi 27:14.

13, 14. Paulo yakoresheje gute amajambo ari muri Hoseya 13:14, kandi ivyo biduha imvo iyihe yo kwizigira Yehova?

¹³ Ubuhanuzi bwa Hoseya buvuga ivyerekeye Abisirayeli buraduha imvo idasanzwe yo kwizigira Imana. Yehova yavuze ati: “Nzobacungura mbakūre mu bubasha bg’i kuzimu; nzobagōmbōra mbakūre mu rupfu: wa rupfu we, ikīza watera kiri hehe? Wa kuzimu we, kwa guhonnya kwawe kuri hehe?” (Hoseya 13:14). Yehova ntiyari agiye gukiza Abisirayeli urupfu rwo mu buryo bw’umubiri ico gihe, mugabo amaherezo yomize miyonzwa urupfu ibihe vyose kandi agahindura ubusa intsinzi yarwo.

¹⁴ Igihe Paulo yandikira abakirisu basizwe bagenziwe, yarasubiyemwo amajambo yo mu buhanuzi bwa Hoseya mu kwandika ati: “Uyu ubora ni wamara kwambara ukutabora, n’uyu upfa ni wamara kwambara ukudapfa, ni ho hazoshika rya jambo ryanditswe, ng’Urupfu rumizwe n’intsinzi. Wa rupfu we, intsinzi yawe iri hehe? Wa rupfu we, uruboyi rwawe ruri hehe? Ivyaha ni vyo ruboyi rw’urupfu, kand’ubushobozi bg’ivyaha [ni] ivyagezwe. Arikw Imana ishimwe, iduha gutsinda kubg’Umwami wacu Yesu Kristo” (1 Ab’i Korinto 15:54-57). Yehova yarazuye Yezu mu bapfuye, aba atanze icemeza gihumuriza rwose c’uko abantu Imana yibuka bazozurwa (Yohana 5:28, 29). Ese ukuntu iyo ari imvo iteye akamwemwe yotuma twizigira Yehova! Yamara rero, uretse icizigiro c’izuka, hariho ikindi kintu kituvyurira umutima wo kugendana n’Imana.

Inzira za Yehova zama ziroranye

15, 16. Ni ibiki vyabuwe ku vyerekeye Samariya, kandi ubwo buhanuzi bwarangutse gute?

¹⁵ Kuba twemera tudakeka yuko ‘inzira za Yehova ziroranye’ biradufasha kubandanya kugendana n’Imana. Ababa i Samariya ntibagendeye mu nzira z’Imana zigororotse. Ku bw’ivyo, bokwiboneyeko ku bw’ibibi bari barakoze no ku bw’ukutizera Yehova. Ehe raba ivyabuwe: “Samariya hazogibgako n’ibigabitanyo vyaho, kuko bāgararije Imana yabo: bazoririkwa n’inkota: abana babo b’inzoya bazomenagurirwa hasi, kand’abagore babo bakuriwe bazofomozwa” (Hoseya 13:16). Inkuru za kahise zirerekana yuko Abashuri, ari na bo bigaruriye Samariya, bari bashoboye gukora iryo bara.

¹⁶ Samariya wari umurwa mukuru wa bwa bwami bwa Isirayeli bwari bugizwe n’imiryango cumi. Ariko rero, hano izina Samariya ryoshobora gukoreshwa mu kuvuga akarere kose k’ubwo bwami (1 Abami 21:1). Umwami Shalumaneseri wa gatanu wa Ashuri yarateye igisagara ca Samariya mu 742 B.G.C. Igihe amaherezo Samariya hatemba mu 740 B.G.C., benshi mu bantu baho bakomakomeye baratwawe inyagano muri Mezopotamiya no mu Bumedi. Nta wuzi neza nimba Shalumaneseri wa gatanu ari we yoba yarigaruriye Samariya canke ko hoba higaruriwe n’uwamukurikiye, ari we Sarigoni wa kabiri (2 Abami 17:1-6, 22, 23; 18:9-12). Naho ari ukwo, mu nyandiko za Sarigoni haravugwamwo yuko Abisirayeli 27.290 bambukanywe bakajanwa ari inyagano mu turere twa Efurate yo haruguru no mu Bumedi.

17. Aho gukengera ingingo mfatirwako z’Imana, dukwiye nyabuna gukora iki?

¹⁷ Ababa i Samariya bariboneyeko kubera batagendeye mu nzira za Yehova ziroranye. Na twebwe abakirisu biyeguye twoshikirwa n’ingaruka ziteye umubabaro hamwe twomogorera icaha, tugakengera ingingo mfatirwako zigororotse z’Imana. Nimuze ntitwigere dukurikirana ingendo mbi nk’iyo! Ahubwo riho, nimuze umwumwe wese muri twebwe ashire mu ngiro iyi mpanuro intumwa Petero yatanze igira iti: “Ntihakagire umuntu wo muri mwebge ahōrwa kuba umwicanyi canke kuba igisuma canke kuba inkozi y’ikibi canke kwita mu vyo atagezwemwo. Ariko ni hāgira ūhōrwa kuba Umukristo, yoye kumāramāra, arikw aheshe Imana icubahiro kubg’iryo zina”.​—1 Petero 4:15, 16.

18. Dushobora gute kubandanya ‘guhesha Imana icubahiro’?

¹⁸ Tubandanya ‘guhesha Imana icubahiro’ mu kugendera mu nzira zayo ziroranye, aho gukora ibintu nk’uko twigombera. Kayini yarasheshe amaraso kubera yuko yakoze ibintu nk’uko yigombeye ntiyumvira imburizi ya Yehova y’uko icaha cari kigiye kumucakira (Itanguriro 4:1-8). Balamu yaremeye guherwa n’umwami w’i Mowabu, ariko naho yagerageje kuvuma Isirayeli, vyabaye impfagusa (Guharūra 24:10). Vyongeye, Imana yarishe wa Mulewi Kora be n’abandi bari bifatanije na we, kubera yuko bagararije ubukuru bwa Musa na Aroni (Guharūra 16:1-3, 31-33). Emwe, ntidushaka ‘kujana inzira y’ubwicanyi ya Kayini’ no kwiroha mu “buzimire bga Balamu”, canke guhonera mu “mugararizo wa Kora” (Yuda 11). Ariko, bishitse uwo muri twebwe agakora icaha, ubuhanuzi bwa Hoseya buraduhumuriza.

Abanyavyaha barashobora kugaruka kuri Yehova

19, 20. Ni ibimazi ibihe Abisirayeli bari bigaye bashoboye gushikana?

¹⁹ Mbere n’abatsitaye mu gukora icaha gikomeye barashobora kugaruka kuri Yehova. Muri Hoseya 14:1, 2 tuhasanga aya majambo yo kwinginga agira ati: “Ewe Isirayeli we, garuka k’Uhoraho Imana yawe; kuko wagwishijwe n’ibigabitanyo vyawe. Mujane amajambo yo kwisaba mugaruke k’Uhoraho; mumwinginge, muti N’uduharire ibigabitanyo vyose, uduhangaze: muti Mu gishingo c’amapfizi tuzogushikanira ibimazi vy’iminwa yacu”.

²⁰ Abisirayeli bari bigaye barashoboye gushikanira Imana ‘ibimazi vy’iminwa yabo’. Ivyo vyari ibimazi vy’amashemezo avuye ku mutima. Paulo yarerekeje kuri ubwo buhanuzi igihe yahimiriza abakirisu ‘guha Imana ikimazi co gukenguruka, ari co mbuto z’iminwa ishima izina ryayo’ (Abaheburayo 13:15). Ese ukuntu ari agateka kugendana n’Imana no gushikana ibimazi nk’ivyo muri iki gihe!

21, 22. Abisirayeli bari bigaye bosubijwe umutamana gute?

²¹ Abisirayeli bemeye guheba ingendo yabo y’ukwigira ibiro biteze bakagaruka ku Mana, barayishikaniye ‘ibimazi vy’iminwa yabo’. Gutyo, barasubijwe umutamana mu vy’impwemu, nk’uko Imana yari yarabisezeranye. Muri Hoseya 14:4-7 havuga hati: “[Jewe Yehova] nzoharira ugusubira inyuma kwabo, nzobakunda urukundo rutagira akagero: kuk’uburake bganje busubiye inyuma bubavuyeko. Isirayeli nzomubera nk’ikime, na we azoshurika nk’ikirungu, ashōre imizi nk’ibiti vy’i Lebanoni. Amashami yiwe azogasara, ubgiza bgiwe buse n’igiti c’umwelayo, n’ugutāmirana kwiwe kumere nk’ibiti vy’i Lebanoni. Ababa mu gitūtu ciwe bazogaruka; bazobaduka nk’ingano, bashurike nk’umuzabibu: ugutāmirana kwabo kuzomera nka vino y’i Lebanoni”.

²² Abisirayeli bari bigaye bokijijwe mu buryo bw’impwemu maze bakongera gukundwa n’Imana. Yehova yobabereye nk’ikime kiruhura mu buryo bw’uko yobahezagiye cane. Abasavyi biwe bobaye basubijwe umutamana bogize agaciro ‘nk’ak’igiti c’umwelayo’, kandi bogendeye mu nzira z’Imana. Kubera yuko dufise umwiyemezo wo kugendana na Yehova Imana, ni igiki dusabwa?

Bandanya kugendera mu nzira za Yehova ziroranye

23, 24. Igitabu ca Hoseya gisozera n’ubuhanuzi buremesha ubuhe, kandi ubwo buhanuzi butuma dukora iki?

²³ Kugira tubandanye kugendana n’Imana, dutegerezwa gukoresha “ubgenge buva mw ijuru” kandi tukama duhuza n’inzira zayo ziroranye (Yakobo 3:17, 18). Umurongo wa nyuma w’ubuhanuzi bwa Hoseya uvuga uti: “Ni nde azi ubgenge? N’atahure ivyo! Ni nde w’umuhanga? N’abimenye! Kukw inzira z’Uhoraho ar’iziroranye, kand’abagororotsi ni bo bazozigendamwo; arikw abacumura bazozigwamwo”.​—Hoseya 14: 9.

²⁴ Aho kuyoborwa n’ubukerebutsi be n’ingingo mfatirwako vy’iyi si, nimuze twiyemeze kugendera mu nzira z’Imana ziroranye (Gusubira mu vyagezwe 32:4). Ivyo ni vyo Hoseya yamaze imyaka 59 canke irenga agira. Yarashikirije ubutumwa bw’Imana adahemuka, azi yuko abantu b’inkerebutsi be n’incabwenge botahuye ubwo butumwa. Tweho bite? Magingo Yehova akiduhaye akaryo ko gushinga intahe, tuzobandanya kurondera abemera ubuntu tutabereye bwiwe babigiranye ubukerebutsi. Vyongeye, turahimbarwa no kubikora dusenyera ku mugozi umwe na wa “mushumba wo kwizigirwa w’ubgenge”.​—Matayo 24:45-47.

25. Umwihwezo twagize w’ubuhanuzi bwa Hoseya ukwiye kudufasha gukora iki?

²⁵ Umwihwezo twagize w’ubuhanuzi bwa Hoseya ukwiye kudufasha kubandanya tugendana n’Imana twiteze kubaho ibihe bidahera mw’isi nshasha yadusezeraniye (2 Petero 3:13; Yuda 20, 21). Ese ukuntu ico ari icizigiro c’akaroruhore! Tuzokwibonera iranguka ry’ico cizigiro nitwagaragaza mu mvugo no mu ngiro yuko tutavugana uburyarya igihe tuvuga duti: ‘Inzira za Yehova ziraroranye’.

Wokwishura gute?

• Nitwasenga Imana mu buryo butyoroye, izotugaragariza iki?

• Ni kubera iki dukwiye kwama twizigira Yehova?

• Ni igiki kikujijura yuko inzira za Yehova ziroranye?

• Dushobora gute kubandanya kugendera mu nzira za Yehova ziroranye?

[Ifoto ku rup. 28]

Niwemere gufashwa mu vy’impwemu n’abakurambere bakirisu

[Ifoto ku rup. 29]

Ubuhanuzi bwa Hoseya buraduha imvo yo kwizigira imihango Yehova yatanze yerekeye izuka

[Ifoto ku rup. 31]

Bandanya kugendana n’Imana witeze kuzoronka ubuzima budahera