Ku w’Iyinga mu gitondo ca kare Mariya Magadalena nyina wa Yakobo hamwe na Salome, Yowana be n’abandi bagore bazana ibimota ku mva gusiga ikiziga ca Yezu. Mu nzira babwirana bati: “Ni nde adutembagariza ikibuye co ku munwa w’imva?” Ariko bashitseho, basanga hashitse ikinyamugigima hanyuma umumarayika wa Yehova atembagaza ca kibuye. Ba barinzi nta bahari, uruhafu na rwo rurera! Matayo 27:57–28:2; Mariko 15:42–16:4; Luka 23:50–24:3, 10; Yohana 19:14, Yh 19:31–20:1; Yh 12:42; Abalewi 23:5-7; Gusubira mu Vyagezwe 21:22, 23; Zaburi 34:20; Zekariya 12:10.

Ikigabane ca 128

Yezu Ni Muzima!

BA BAGORE basanze uruhafu rwa Yezu rwera, Mariya Magadalena yirukanga kubwira Petero na Yohani. Ariko rero abandi bagore bisa n’uko basigaye ku ruhafu. Bidatevye haseruka umumarayika, abasaba kwinjira.

Ngaho ba bagore bahabona uwundi mumarayika, hanyuma umwe muri nya bamarayika ababwira ati: “Mweho ntimutinye, kuko nzi ko murondera Yesu, umwe [“yamanikwa,” NW]; ntari hano, kuko yazutse, nk’uko yavuze. Ngo murābe aho Umwami yar’aryamye. Ni mukwakwanye mubgire abigishwa biwe yuko yazutse mu bapfuye.” Nuko abo bagore na bo nyene, n’ubwoba hamwe n’umunezero, barirukanga.

Muri ico gihe, Mariya yatoye Petero na Yohani, hanyuma abamenyesha ati: “Bakuye Umwami Yesu mu mva, kandi ntituzi aho bamushize.” Buno nyene za ntumwa zibiri barahafata birukanga. Yohani ku maguru ni umunyarutsi—kumbure kubera ari we yari mutoyi—aba uwa mbere mu gushika ku ruhafu. Iki gihe ba bagore bagiye, nta n’umwe ahari. Yohani arunama, arunguruka mu ruhafu hanyuma abona za mpuzu, ariko aguma hanze.

Petero ashitse, ntagonanwa ahubwo yirongozayo. Abona nya mpuzu yari azingiriyemwo ari ho zirambaraye hamwe n’impuzu yakoreshejwe mu gutenga umutwe wa Yezu. Izingiriwe ahantu hamwe. Yohani na we nyene arinjira mu ruhafu, abona kwemera ivyo Mariya yavuze. Ariko yaba Petero canke Yohani, ntibategera yuko Yezu yazutse, naho nyene yari yarababwiye kenshi yuko yozutse. Abo babiri bibabera ubupfindo, basubira i muhira. Ariko Mariya, uwagarutse ku ruhafu we arasigara.

Muri ako kanya, ba bagore bandi baranyaragasa baja kubwira abigishwa yuko Yezu yazuwe, nk’uko nya bamarayika babategetse. Mu gihe bariko birukanga cane uko bashoboye, Yezu ahura na bo, avuga ati: ‘Amahoro!’ Bikubita imbere y’ibirenge vyiwe, baramwunamira. Maze Yezu avuga ati: “Ntimutinye: ni mugende mubgire bene Data ngo baje i Galilaya, ni ho tuzobonanira.”

Imbere yaho, hamwe nyamugigima cashika hanyuma abamarayika bagaseruka, abasoda bacunze baguye igihumura bacika nk’abapfuye. Aho bagaruriye akenge, baciye buno nyene baja mu gisagara babwira abaherezi bakuru ivyabaye. Bamaze guhanuza “abashingantahe” b’Abayuda, hapfundikwa ingingo y’ukugerageza gupfumanganya ico kintu mu guha igiturire abasoda. Babategetse bati: “Muze muvuge, mut’Abigishwa biwe baje mw ijoro, baramutwibana dusinziriye.”

Kubera ko abasoda b’Abaroma bashobora gucirwa urw’ugupfa bitumwe n’uko basinziririye ku mapozisiyo yabo, abaherezi batanga uwu muhango: “Icegera ca Kayisari ni caramuka kivyumvise [ivy’uko mwasinziriye], tuzomuhwamika, namwe tuzobakiza amagorwa.” Kubera igiturire cari kinini bihagije, nya basoda bagize nk’uko babwirijwe. Ingaruka yavyo ni uko iyo nkuru y’ikinyoma yerekeye ukwibwa kw’ikiziga ca Yezu yakwiragiye henshi mu Bayuda.

Mariya Magadalena, uwasigaye inyuma ku ruhafu, intuntu iri mu kumwica. Mbega Yezu ashobora kuba ari hehe? Uwo mukenyezi arunama ngo arabe mu ruhafu, abona ba bamarayika babiri bambaye izera basubiye kuboneka! Umwe yicaye ku mutwe uwundi epfo y’aho ikiziga ca Yezu cari kirambaraye! Baramubaza bati: “Mbega nyina wanje, urizwa n’iki?”

Mariya arishura ati: “N’uko bakuyeh’Umwami wanje, nanje nkaba ntazi aho bamushize.” Maze uwo mugore arakebuka abona umuntu asubiramwo nya kibazo ati: “Mbega nyina wanje, urizwa n’iki?” Uwo yongera kandi arabaza ati: “Urondera nde?”

Uno mugore yiyumvira ko uwo muntu ari umurimyi w’itongo riherereyemwo nya ruhafu, amubwira ati: “Mugenzi, namb’ari wewe wamukuye hano, ndangira aho wamushize, ndamukureyo.”

Nya muntu aravuga ati: “Mariya.” Buno nyene uwo mugore arabiye ku buryo amuvugishije nk’uko yari amenyereye kumuvugisha, amenya ko ari Yezu. Nya mugore aratangara ati: “Rabuni!” (bisobanura ngo “Mwigisha!”). (Ni twe tubihiritse.) N’umunezero utagira uko ungana, uwo mugore aramufata cane. Ariko Yezu aravuga ati: “Ntukoreko, kuko ntaradūga kwa Data; ariko genda kwa bene Data, ubabarire, ut’Agira adūge kwa Se ari we So, uti ku Mana yiwe ari yo Mana yanyu.”

Mariya ubu yirukanga aja aho intumwa na bagenzi babo b’abigishwa bakoraniye. Yongera inkuru yiwe ku makuru abandi bagore bamaze gutanga y’uko babonye Yezu yazutse. Yamara abo bagabo batari bemeye ivyavuzwe n’abagore ba mbere, bisa n’uko n’ivyo Mariya avuze batavyemera. Matayo 28:3-15; Mariko 16:5-8; Luka 24:4-12; Yohana 20:2-18.

▪ Aho Mariya Magadalena asangiye uruhafu rwera yagize iki, kandi n’ibiki abandi bagore biboneye?

▪ Petero na Yohani bagira iki aho basangiye uruhafu rwera?

▪ Abandi bagore bahuye n’ibiki mu nzira bagiye kubwira abandi bigishwa ivy’izuka rya Yezu?

▪ Ni ibiki vyari vyashikiye umusoda w’umurinzi, kandi inyishu baronse ni inki ku vyo babwiye abaherezi?

▪ Ni ibiki vyashitse igihe Mariya Magadalena yari wenyene ku ruhafu, kandi abigishwa bakiriye gute amakuru abagore bashikirije?

ABIGISHWA baracavunitse umutima. Ntibatahura ico kuba uruhafu rugaragara bisigura, eka mbere ntibemera n’amakuru ba bagore bashikirije. Nuko rero mu nyuma ku w’Iyinga, Kileyopa be n’uwundi mwigishwa bava i Yeruzalemu baja i Emawusi, ahantu hari ku birometero nka 11.

Mu nzira, igihe bariko bayaga ivyabaye uwo musi, umuntu batazi yifatanya na bo. Ababaza ati: “Mbega ivyo mugenda murabazanya n’ibiki?”

Nya bigishwa barahagarara, bijiriwe, hanyuma Kileyopa asubizayo ati: “Mbega ni wewe gusa watse indāro i Yerusalemu, utazi ivyabayeyo mur’iyi misi?” Abaza ati: “N’ibiki?”

Barishura bati: “N’ivya Yesu Umunyanazareti . . . Abaherezi bakuru n’abashingantahe bacu bāmutanze ngw acirwe urubanza rwo gupfa, [“bakamumanika,” NW]. Kandi twari twishimiye yukw ari we azocungura Abisirayeli.”

Kileyopa na mugenzi we basigura ibintu vy’igitangaza vyabaye uwo musi, ni ukuvuga amakuru yerekeye ukubonekerwa n’abamarayika gusiga ubwenge hamwe n’uruhafu basanze rugaragara, ariko rero baremera ko bavurunganiwe n’insobanuro y’ivyo bintu. Nya muntu batazi arabahambarira ati: “Yemwe mwa mburabgenge, imitima yanyu itevye cane kwizera ivyo abāvugishwa n’Imana bāvuze vyose! Mbega Kristo ntiyar’akwiye kubabazwa artyo ngw abone kuja mu bgiza bgiwe?” Maze abasobanurira ibihimba vyo mu gisomwa ceranda vyerekeye Kirisitu.

Amaherezo bashika i Emawusi, hanyuma nya muntu batazi amera nk’uwushishikara inzira. Kubera abo bigishwa bashaka kumenya n’ibindi, baramwinginga bati: “Gumana natwe, kuko bugira bgire kand’umusi ukuze cane.” Nuko rero agumaho ngo afungure. Atuye isengesho hanyuma akamanyura umukate maze akawubahereza, batahura ko ari Yezu vy’ukuri ari mu mubiri. Ariko rero aca arakamangana.

Ubu baratahuye ukuntu wa muntu batazi yari umuntu azi ibintu vyinshi cane! Barabaza bati: “Mbeg’imitima yacu ko yarikw iragurugumba, aho yarikw aravugana natwe mu nzira, aduhishurira ivyanditswe!” Bidatevye, barahaguruka baranyaragasa inzira yose basubira i Yeruzalemu, bahasanga intumwa hamwe n’abakoraniye hamwe na zo. Imbere y’uko Kileyopa na mugenziwe bagira ico bavuze, abandi bashikiriza aya makuru n’akamwemwe: “N’ukuri Umwami Yesu yāzutse, kandi yabonywe na Simoni.” Maze bano babiri bigana ukuntu Yezu kandi yababonekeye. Iryo rigize kane kuri uwo musi abonekera abigishwa biwe batandukanye.

Yezu buno nyene aboneka ubugira gatanu. Naho nyene inzugi zugaye kubera abigishwa batinya Abayuda, arinjira, ahagarara hagati yabo nyene, hanyuma avuga ati: “Amahoro abe muri mwebwe.” Baraterwa n’ubwoba, biyumvira yuko babonye umuzimu. Nuko rero, mu gusigura yuko atari umuzimu babonye, Yezu avuga ati: “Ikibahagaritse imitima n’iki? Kandi n’iki gitumye mubūranisha imitima? Ni murabe ibiganza vyanje n’ibirenge vyanje, mumenye kw ari jewe ubganje: ni munkorakore, murābe, kuk’umuzimu utagira inyama n’amagufa, nk’ivyo mumbonana.” N’ubu ukwemera kubari kure.

Kugira ngo bafashwe gutegera ko vy’ukuri ari Yezu, ababaza ati: “Har’utwo kurya mufise hano?” Amaze kwakira akamanyu k’ifi yokeje akakarya, avuga ati: “Aya n’amajambo yanje nababgira nkiri kumwe namwe [imbere y’urupfu rwanje], y’ingen’ivyanditswe kuri jewe vyose mu vyagezwe vya Mose no mu majambo y’abāvugishwa n’Imana no muri Zaburi bikwiye gushika.”

Mu kubandanya kubagirira icokwitwa inyigisho ya Bibiliya, Yezu yigisha ati: “Ni ko vyanditswe yuko Kristo akwiye kubabazwa no kuzuka mu bāpfuye ku musi ugira gatatu, kandi yuk’ukwihana no guharirwa ivyaha bikwiye kuvugwa mw izina ryiwe mu mahanga yose, uhereye i Yerusalemu. Namwe mur’ivyabona vyo kuvuga ivyo.”