Turyohore ubuhanga bwacu mu busuku—Kwerekana ukuntu inyigisho ya Bibiliya igirwa hakoreshejwe igitabu Ivyo Bibiliya yigisha

Igituma bihambaye: Abantu benshi boshobora kudatahura ico tuba dushaka kuvuga igihe tuvuze ko twigisha abantu Bibiliya ku buntu tubasanze iwabo. Boshobora kwiyumvira yuko babwirizwa kwifatanya n’umugwi kanaka canke gukurikirana ivyigwa bazoza bararungikirwa biciye kuri posita. Aho gupfa gusa kubabwira ko twigisha abantu Bibiliya, ubona gute uberetse ingene inyigisho ya Bibiliya igirwa? Mu minuta mikeyi gusa, naho woba uhagaze imbere y’umuryango, woshobora kwereka umuntu ukuntu kwiga Bibiliya vyoroshe kandi bifasha umuntu kurushiriza kuyitahura.

Uko twobigira:

Umaze kwidondora, nubaze uwo usanze ku muhana nimba hari ikintu kanaka coba kimuraje ishinga ku bijanye na kazoza.
Nuvuge yuko abantu benshi barajwe ishinga n’ibintu nk’ivyo, uheze umwereke urutonde rw’ibiganiro biri mu gitabu Ivyo Bibiliya yigisha. Nusigure yuko ico gitabu kirimwo ivyigwa vyoroshe gutahura vyerekana ico Bibiliya ivuga ku vyerekeye kazoza no ku vyerekeye ibindi bintu bitandukanye, maze umubaze ikigabane kimushimisha.
Numuhe ico gitabu muce muzingurura ku kigabane yahisemwo. Numusigurire yuko ibibazo biri mu ntango y’ico kigabane vyishurwa mu ngingo zica zikurikira.
Numubaze nimba yoshima gusoma ingingo ya mbere. Ahejeje, nusome ikibazo kijanye n’iyo ngingo, hanyuma murabire hamwe inyishu. Nimusome muri Bibiliya ivyanditswe vyatanzwe kandi mubiganireko kugira mushigikire inyishu. Numwereke mu gitabu cawe ko waciye imirongo ku nyishu.
Nimwihweze ingingo ikurikira, ariko ubu hoho umusabe agerageze kwishura ikibazo mu majambo yiwe.
Numukeze, maze muvugane igihe uzogaruka kugira mubandanye ico cigwa.
Nimba bibereye, numwereke ka kavidewo kari kuri jw.org kavuga ngo Ingene dufasha abantu kwiga Bibiliya.

Muri uku kwezi nugerageze iki kintu:

Nusabe Yehova aguhezagire utanguze inyigisho ya Bibiliya.—Flp. 2:13.
Nugerageze kwereka umuntu ukuntu inyigisho ya Bibiliya igirwa hakoreshejwe igitabu Ivyo Bibiliya yigisha, canke umwereke ya videwo Ingene dufasha abantu kwiga Bibiliya, ubigire n’imiburiburi rimwe igihe cose uri mu ndimiro.