Sezari Ogusito, umutware w’inganji y’Uburoma, yarategetse ko Abayuda bose baja kwiyandikisha mu bisagara bavukamwo. Yozefu na Mariya baciye baja i Betelehemu, aho Yozefu yari yaravukiye. Mariya yari mu kuvyara.

Bashitse i Betelehemu barabuze aho barara, baca baja kurara mu ruhongore rw’ibitungwa. Aho ni ho Mariya yavyariye Yezu. Yaciye amuzingira mu dutambara maze amuryamika mu bwato ibitungwa vyariramwo.

Hafi y’i Betelehemu hariho abungere barara hanze bacunze ibitungwa vyabo. Bagiye babona umumarayika ahagaze imbere yabo, umuco w’ubwiza bwa Yehova uca urakayangana irya n’ino yabo. Baragize ubwoba, ariko uwo mumarayika aca ababwira ati: ‘Ntimutinye. Ndabazaniye inkuru nziza. Uno musi Mesiya yavukiye i Betelehemu.’ Abo bungere baciye babona abandi bamarayika benshi mw’ijuru bariko bavuga ngo: ‘Haninahazwe Imana mw’ijuru, kw’isi na ho habe amahoro.’ Abo bamarayika baciye bakamangana. None abo bungere baciye bakora iki?

Baciye babwirana bati: ‘Tugende i Betelehemu ubu nyene.’ Baranyarukiyeyo, basanga Yozefu na Mariya muri rwa ruhongore bari kumwe n’uwo mwana yavutse.

Abantu bose baratangara bumvise ivyo umumarayika yari yabwiye abo bungere. Mariya ntiyigeze yibagira ivyo uwo mumarayika yavuze. Abo bungere barasubiye inyuma kuraba ibitungwa vyabo, bagenda barashimira Yehova kubera ivyo bari babonye n’ivyo bari bumvise vyose.

Mu gihugu kimwe co mu buseruko bwa Isirayeli, hariho abantu bemera ko inyenyeri zishobora kubayobora. Umusi umwe mw’ijoro, hari abantu bo muri ico gihugu babonye mu kirere ikintu kimeze nk’inyenyeri yaka cane kiriko kiragenda, baca baragikurikira. Ico kintu carabayoboye kibashikana i Yeruzalemu. Baciye batangura kubaza abantu bati: ‘Uwo mwana azoba umwami w’Abayuda ari hehe? Twaje kumwunamira.’

Herodi yari umwami w’i Yeruzalemu. Yumvise ivy’uwo mwami mushasha, yaciye agira ubwoba. Yabajije abakuru b’abaherezi ati: ‘Uwo mwami yovukiye hehe?’ Na bo bati: ‘Abahanuzi bavuze ko azovukira i Betelehemu.’ Herodi yaciye ahamagara ba bagabo ababwira ati: ‘Nimuje i Betelehemu murondere uwo mwana. Muzoce mugaruka mumbwire aho ari. Na jewe nshaka kuja kumwunamira.’ Ariko yariko arababesha.

Ca kintu kimeze nk’inyenyeri caciye gisubira kugenda. Ba bagabo baragikurikiye gushika i Betelehemu. Gishitse hejuru y’inzu imwe carahagaze, na bo baca barinjira muri iyo nzu. Basanzeyo Yezu na nyina wiwe Mariya. Barunamiye uyo mwana baca baramuha inzahabu n’ibintu bimota bita imibavu n’imira. Yehova yoba ari we yarungitse abo bagabo kurondera Yezu? Oya.

Muri iryo joro, Yehova yabwiye Yozefu mu ndoto ati: ‘Herodi ashaka kwica Yezu. Tora umugore wawe n’umwana wawe muhungire mu Misiri. Muzogumeyo gushika ndababwiye ngo mugaruke.’ Ubwo nyene Yozefu n’umuryango wiwe baciye baja mu Misiri.

Yehova yari yabujije ba bagabo gusubira kwa Herodi. Herodi abonye ko batagarutse, yaciye ashavura cane. Kubera ko atari gushobora kumenya aho Yezu ari, yaciye ategeka ko bica abana bose b’abahungu b’i Betelehemu bangana na Yezu. Yezu we yari yibereye mu Misiri.

Herodi yahavuye apfa. Yehova yaciye abwira Yozefu ati: ‘Ubu urashobora guhunguka.’ Yozefu, Mariya na Yezu baciye basubira muri Isirayeli, baja kuba mu gisagara ca Nazareti.