ABADANDAZA ntibahengeshanya kumenyesha abaguzi ivyerekeye ibidandazwa vyabo. None abo badandaza baba bafise intumbero iyihe? Baba bashaka ko abaguzi babona yuko ivyo bipfuza vyose babikeneye. Abadandaza barazi yuko ahanini abaguzi bagura ibintu kubera gusa bavyipfuza. Ivyo guhayanisha ibidandazwa be n’ingene bigurishwa, bitunganijwe ku buryo bituma abantu bipfuza cane kubigura.

Igitabu kimwe citwa ngo Igituma abantu bagura ibintu badakeneye (mu congereza) kivuga giti: “Igihe umuguzi ategekanya kugura ikintu gishasha, usanga akenshi yiha ishusho mu bwenge agiye kukirondera, akakironka, kigaca kimwegukira.” Abahinga bamwebamwe biyumvira yuko igihe umuguzi aba ariko ararondera ikintu ashobora kuryoherwa cane ku buryo ubwonko bwiwe burekura inkabuzo nyinshi zitwa adrénaline. Umuhinga mu vy’urudandaza yitwa Jim Pooler asigura ati: “Umudandaza amenye ko umuguzi yipfuza cane kugura ikintu, yoshobora guca afatira kuri ico cipfuzo gikomeye afise no ku kuntu ataba agishoboye kwigumya.”

None wokwikingira gute ngo ntugwe mu mutego w’abadandaza b’amayeri? Aho gutwarwa n’ivyipfuzo, nusuzume ko ivyo abadandaza bagusezeranira ari ukuri.

IVYO BASEZERANA: “Gira ubuzima bwiza”

Ni ibisanzwe ko umuntu yipfuza kugira ubuzima bwiza. Abahaya ibidandazwa batwereka ko ibintu vyose twipfuza, nk’amagara meza, ugutekanirwa, kwiremurura imyitwarariko be no kurushiriza kugiranira ubucuti bwiza n’abandi, dushobora kubironka hamwe twogura ibintu kanaka.

UKURI:

Uko twongereza amatungo ni ko ubuzima bwacu bushobora gutera bujamwo ingorane. Uko umuntu arushiriza kugira amatungo ni ko arushiriza gukenera umwanya n’amahera vyo kuyitwararika. Ararushiriza kugira imyitwarariko kubera amadeni, kandi n’umwanya wo kuba kumwe n’umuryango be n’abagenzi uragabanuka.

Iciyumviro co muri Bibiliya cofasha: “No mu gihe umuntu afise umurengera, ubuzima bwiwe ntibuva ku bintu atunze.”—Luka 12:15.

IVYO BASEZERANA: “Iheshe iteka n’icubahiro”

Abantu bakeyi ni bo bokwemera ko bagura ibintu kugira batangaze abandi. Ariko rero, wa muhinga mu vy’urudandazwa Jim Pooler agira ati: “Iyo abantu bagiye kugura ibintu, ikintu gihambaye usanga kibaranga ni uguhiganwa n’incuti n’abagenzi, ababanyi be n’abo bakorana.” Ni co gituma mw’ihayanishwa ry’ibidandazwa usanga berekana ivyo bidandazwa bifiswe n’abantu bamerewe neza, b’abatunzi. Ni nk’aho abahayanisha ibidandazwa baba bariko bakubwira bati: “Weho kuki? Wobuzwa n’iki kumera nk’uyo!”

UKURI:

Kugerageza kwerekana ico tumaze mu kwigereranya n’abandi bituma tutigera twumva ko dushize ipfa. Igihe dushitse ku co twipfuza, duca twipfuza gushika ku kindi.

Iciyumviro co muri Bibiliya cofasha: “Inkunzi y’ifeza ntizohaga ifeza.”—Umusiguzi 5:10.

IVYO BASEZERANA: “Erekana ico uri”

Igitabu citwa ngo Ibintu bikayangana (mu congereza) gisigura giti: “Akenshi twereka abandi ico turi (canke ico twipfuza kuba) biciye ku kuntu dukoresha ivyo dutunze be n’ukuntu tuvyereka abandi.” Ivyo abadandaza barabizi, akaba ari co gituma bagerageza kwereka abantu ko ibihingurwa n’amahinguriro kanaka y’ibidandazwa, na canecane amahinguriro akomakomeye, bigenewe umugwi w’abantu kanaka.

Wewe wibona gute, kandi wipfuza ko abandi bakubona gute? Nk’umuntu azi ibigezweho? Nk’umuntu akomeye? Uko wipfuza ko abantu bakubona kwose, abahayanisha ibidandazwa bagusezeranira yuko niwagura gusa ikintu cahinguwe n’ihinguriro kanaka, uzoca uba ico wipfuza kuba.

UKURI:

Nta kintu na kimwe twogura cohindura ico turi vy’ukuri canke ngo gitume tugira kamere nziza, nk’ukuba imvugakuri n’intahemuka.

Iciyumviro co muri Bibiliya cofasha: “Ugushaza kwanyu ntikube . . . ukwo kwambara udusharizo tw’inzahabu canke ukwambara impuzu zo hejuru, ahubwo kube wa muntu yihishije wo mu mutima.”—1 Petero 3:3, 4.

Uretse akosho abadandaza batugirako, utumenyero twacu be n’ivyipfuzo vyacu birashobora gutuma dusesagura. Ng’ibi ibintu bitandatu vyogufasha kudasesagura amahera yawe.

1. Ntugure ikintu ngo ni uko gusa ukibonye. Woba uryoherwa cane no kuja kurondera ibintu wogura kuri make? Nimba ari ukwo, vyoshika ukaza uragura ibintu kubera gusa ubibonye. Kugira ngo ivyo ntibigushikire, banza utenyenye, wiyumvire ata kwihenda ingaruka z’igihe kirekire zoterwa no kugura ico kintu, kugitunga no kukibungabunga. Kubitiza agatima mpembero ku bintu wigeze kugura kubera gusa ubibonye mugabo mu nyuma ukicuza. Nufate umwanya wo kuzirikana imbere yo gufata ingingo y’ico wokora.

2. Ntugure ibintu kugira gusa wumve ko uryohewe. Igihe wumva utamerewe neza, kugura ikintu birashobora gutuma umara umwanya wumva uryohewe. Ariko hamwe wosubira kwumva utaryohewe, vyoshobora gutuma urushiriza kwumva ko icokuruhura ari ukuja kugura ibindi bintu. Aho kugura ibintu kugira ngo wumve ko uryohewe, nurondere abagenzi bokuremesha canke ukore igikorwa kanaka, nko kugendagenda n’amaguru.

3. Ntuje mu maduka kugira winezereze gusa. Amaduka akomakomeye asigaye arimwo utuntu dukwegera ku buryo abantu bajayo kugira ngo binezereze gusa. Naho woja muri ayo maduka canke ku muhora w’ivy’urudandaza wo kuri Internet kugira ngo winezereze gusa, vyinshi mu vyo uhasanga bigenewe kukuvyurira icipfuzo co kubigura. Ntuje mu maduka ata mugambi ufise wo kugura ikintu, kandi ntugure ico utategekanije.

4. Nuhitemwo abagenzi witonze. Ukuntu abagenzi bawe babayeho be n’ibiyago mugirana biragira akosho gakomeye ku vyo wipfuza. Nimba wama usesagura kugira ngo ugure nk’ivyo abagenzi bawe bafise, nuhitemwo rero abagenzi badashira imbere amahera canke amaronko.

5. Uraba maso mu bijanye n’amadeni. Biroroshe ko ugura ibintu kw’ideni utabanje kurimbura ingaruka zavyo. Nugerageze kwama uriha ideni wafashe, bishobotse uririhe ryose. Niwiyubare mu bijanye no gufata amadeni asaba inyungu. Aho kugura ibintu ku madeni, nuze uraziganya amahera igihe wipfuza kugura ikintu kizimvye.

6. Nugume uzi uko ubutunzi bwawe bwifashe. Igihe utazi uko ubutunzi bwawe bwifashe, usanga vyoroshe ko usesagura. Nuze urandika ayasohoka n’ayinjira, kandi ugume uzi ayo usigaranye uko angana. Ufatiye ku yo winjiza be no ku yo wagiye urakoresha mu misi iheze, nugire urutonde rubereye rw’ayo woza urakoresha buri kwezi. Nugume ukurikiranira hafi ayasohoka, urabe ko ahuye n’ivyo wari wategekanije. Nusabe umugenzi wizigiye agufashe gutahura ibintu utamenyereye bijanye n’ivy’amahera.