Kumenya neza ico uri birashobora gutuma unanira ibihuhusi bikomeye
URWARUKA
9 Akaranga
ICO BISOBANURA
Izina ryawe be n’ukuntu usa si vyo gusa bikuranga. Mu bikuranga harimwo n’inyifato yawe, ivyiyumviro vyawe be n’ukuntu umeze. Mu yindi mvugo, akaranga kawe ni ivyo bintu vyose bidondora uko umeze.
IGITUMA BIHAMBAYE
Igihe uzi neza akaranga kawe, urumira ku vyiyumviro vyawe aho kugendera ku vyiyumviro vy’urunganwe rwawe.
“Abantu benshi bameze nka vya bishusho dusanga mu mamangazini y’impuzu. Si vyo vyihitiramwo impuzu vyambara, ahubwo abandi ni bo babihitiramwo.”—Adrian.
“Narize gukora ibigororotse no mu bihe bitoroshe. Ubu abagenzi nyakuri ndabamenyera ku kuntu bifata no ku kuntu nifata turi kumwe.”—Courtney.
ICO BIBILIYA IVUGA: “Mureke gushushanywa n’ivy’iki gihe, ahubwo muhindurwe mu guhindura umuzirikanyi wanyu ukaba musha.”—Abaroma 12:2.
ICO WOKORA
Niwiyumvire ukuntu umeze ubu n’ukuntu wipfuza kumera kugira ngo usuzume aho ukomeye, aho ufise intege nke be n’ivyo wemera. Kugira wisuzume neza, hera ku kwishura ibibazo bikurikira:
Aho ukomeye: Ni ibiki nshoboye? Ni ibiki nkora neza? (Nk’akarorero: Noba nubahiriza umwanya? Noba nigumya? Noba ndi umunyabikorwa? Noba ndi umuntu atanga?) Ivyiza nkora ni ibihe?
IVYOGUFASHA: Vyoba bitakworohera kubona ivyiza ukora? Baza umuvyeyi wawe canke umugenzi wizigiye akubwire ivyiza akubonako be n’ingene uhora ubigaragaza.
ICO BIBILIYA IVUGA: “Umwe wese yerekane ico igikorwa ciwe bwite kimaze, ni ho azogira imvo yo kwirata ku bimuraba ubwiwe wenyene, atari mu kwigereranya n’uwundi.”—Abagalatiya 6:4.
Aho ufise intege nke: Ni ibiki nkeneye gukosora? Ni ryari canecane vyoroshe ko ngwa mu nyosha mbi? Norushiriza kugaragaza ukwigumya mu mice iyihe?
ICO BIBILIYA IVUGA: “Iyo tuvuze ngo: ‘Nta gicumuro dufise,’ tuba turiko turizimiza.”—1 Yohani 1:8.
Ivyo wemera: Ni ingingo izihe nisunga mu buzima, kandi kubera iki? Noba nemera Imana? Nemezwa n’iki ko ibaho? Ni ibiki mbona ko bitabereye, kandi kubera iki? Ni ibiki nemera ko bizoba muri kazoza?
ICO BIBILIYA IVUGA: “Ubushobozi bwo kwiyumvira buzoguma bugucungereye, ugutahura kuzokuzigama.”—Imigani 2:11.