Nukorane na Yehova buri musi

1. Ni mu buryo butandukanye ubuhe dushobora gukorana na Yehova?

UMUREMYI yashaka gukorana n’abantu batunganye mu kurangura umugambi wiwe. Naho muri iki gihe abantu badatunganye, abizigirwa barakorana na Yehova buri musi. Nk’akarorero, igihe twamamaza inkuru nziza y’Ubwami kandi tugahindura abantu abigishwa, tuba turi “abakozi bakorana n’Imana.” (1 Kor. 3:5-9) Iyumvire nawe agateka dufise ko kubonwa ko tubereye gukorana n’Umuremyi Mushoboravyose muri ico gikorwa gihambaye cane! Yamara rero, kwamamaza no guhindura abantu abigishwa, si bwo buryo bwonyene dukorana na Yehova. Muri iki kiganiro turihweza ubundi buryo dushobora kubigira, ni ukuvuga mu gufasha imiryango yacu be n’abo dusangiye ukwemera, mu kuba abakiranyi, mu kwitanga mu bikorwa vy’Ubwami be no mu kwagura umurimo wacu mweranda.​—Kol. 3:23.

2. Kubera iki tudakwiye kugereranya ivyo dukora mu murimo wa Yehova be n’ivyo abandi bakora?

² Uko turimbura iki kiganiro, ntugereranye ivyo ukora mu murimo wa Yehova be n’ivyo abandi bakora. Niwibuke ko abantu batandukanye bivanye n’imyaka, amagara, uko ivyabo vyifashe be n’ububangukirwe bwabo. Intumwa Paulo ahumekewe yavuze ati: “Umwe wese yerekane ico igikorwa ciwe bwite kimaze, ni ho azogira imvo yo kwirata ku bimuraba ubwiwe wenyene, atari mu kwigereranya n’uwundi.”​—Gal. 6:4.

NUFASHE UMURYANGO WAWE BE N’ABO MUSANGIYE UKWEMERA

3. Kubera iki twovuga ko uwitwararika umuryango wiwe aba ariko akorana n’Imana?

³ Yehova yiteze ko abasavyi biwe bitwararika imiryango yabo. Nk’akarorero, hari aho woba utegerezwa gukora kugira uronse abawe ivyo bakeneye. Abakenyezi benshi baraguma muhira kugira barere abana babo. Abakuze bamwebamwe na bo bategerezwa kwitwararika abavyeyi babo bafise amagara make. Ivyo ni ibintu vya nkenerwa. Ijambo ry’Imana rivuga riti: “Nimba umuntu ataronsa abiwe ivyo bakeneye, na canecane abo mu rugo rwiwe, aba yihakanye ukwizera kandi aba abaye mubi kurusha uwutagira ukwizera.” (1 Tim. 5:8) Nimba ufise amabanga nk’ayo, birashoboka ko utoronka umwanya munini wo kurangura ibikorwa vy’Imana nk’uko wavyipfuza. Ariko nureme! Yehova arahimbarwa igihe uronsa umuryango wawe ivyo ukeneye.​—1 Kor. 10:31.

4. Abavyeyi boshira gute imbere ivyungura Ubwami, kandi ni ivyiza ibihe bivamwo?

⁴ Abavyeyi bakirisu barakorana na Yehova igihe bafasha abana babo kwishingira imigambi yo mu vy’impwemu. Abavyeyi benshi babigize, mu nyuma abana babo baragiye gukorera umurimo w’igihe cose kure y’i muhira. Bamwe ni abamisiyonari, abandi bakorera ubutsimvyi ahakenewe abamamaji kuruta, abandi na bo ni Abanyabeteli. Kubera ko bakorera kure, hari aho batoba baronka kenshi umwanya wo kuba bari kumwe n’imiryango yabo nk’uko bavyipfuza. Ariko rero, abavyeyi bemera kugira ivyo bahevye bararemesha abana babo kwumira ku murimo wabo. Uti kubera iki? Birabahimbara cane igihe abana babo bashira imbere ivyungura Ubwami. (3 Yoh. 4) Kumbure benshi muri abo bavyeyi biyumva nka Hana, uwavuze ko ‘yatije’ Yehova agahungu kiwe Samweli. Abo bavyeyi babona ko gukorana n’Imana ari agateka kadasanzwe batogisha.​—1 Sam. 1:28.

5. Ni ibiki wofasha abo mw’ishengero urimwo? (Raba ishusho itangura.)

⁵ Nimba udafise amabanga aremereye cane mu muryango, ubona gute ufashije abo musangiye ukwemera bafise abo bitwararika, abafise amagara make, abageze mu zabukuru canke abandi bafise ivyo bakeneye? Ubona gute uravye mw’ishengero uwoba akeneye gufashwa? Kumbure woshobora gusahiriza mushiki wacu yitwararika umuvyeyi wiwe yitereye mu myaka kugira ngo na we ashobore kurangura utundi dukorwa. Canke woshobora kugira uwo ufashije mu kumujana ku makoraniro, gusuma canke ukamujana gusuhuza uwurwaye. Ubigenjeje gutyo, hari aho woba uriko urakorana na Yehova kugira yishure isengesho kanaka.​—Soma 1 Abakorinto 10:24.

NUBE UMWAKIRANYI

6. Twogaragaza gute ubwakiranyi?

⁶ Abakorana n’Imana barangwa no kuba abakiranyi. Mu Vyanditswe vy’ikigiriki, ijambo ryahinduwe ngo “ubwakiranyi” risobanura “kugirira ubuntu abo utazi.” (Heb. 13:2) Ijambo ry’Imana ririmwo inkuru zitwigisha kugaragaza urwo rukundo. (Ita. 18:1-5) Turakwiye kutagisha uturyo two kwama dufasha abandi, baba ari “incuti zacu mu kwizera” canke atari bo.​—Gal. 6:10.

7. Kubera iki ukwiye kugaragariza ubwakiranyi abari mu murimo w’igihe cose?

⁷ Woba wokorana n’Imana mu kugaragariza ubwakiranyi abari mu murimo w’igihe cose bagendeye ishengero? (Soma 3 Yohani 5, 8.) Uturyo nk’utwo akenshi turatuma haba “uguhanahana indemesho.” (Rom. 1:11, 12) Rimbura akarorero k’uwitwa Olaf. Akiri muto, umucungezi w’umuzunguruko atarubaka urwiwe yaragendeye ishengero ryabo, ariko ntiyaronse uwumwakira. Olaf yaciye abaza abavyeyi biwe batari basanzwe ari Ivyabona nimba uwo mucungezi yoshikira iwabo. Baravyemeye ariko baca babwira Olaf ko aza kurara ku ntebe muri salo. Ako kigoro Olaf yagize ntikabaye impfagusa. Yigana ati: “Iyo ndwi yabaye nziza pe! Jewe n’uwo mucungezi twavyuka hakiri kare mu gatondo tukayaga ku bintu vyinshi bishimishije, turiko turanywa icayi. Indemesho naronse zarakomeje icipfuzo nari mfise co gukora umurimo w’igihe cose.” Muri iyi myaka 40 iheze, Olaf yarakoreye mu bihugu bitandukanye ari umumisiyonari.

8. Kubera iki dukwiye kugaragaza umutima mwiza n’igihe nyene abandi badashotse babishima? Tanga akarorero.

⁸ Urashobora kugaragariza urukundo abo utazi mu buryo butandukanye, n’igihe nyene babanje kutavyakira neza. Rimbura aka karorero. Igihe umwamamaji umwe wo muri Espanye yariko arayobora inyigisho ya Bibiliya, yarabonye ko uwo yariko arigisha ari we Yesica aturuka muri Équateur yaguma arira. Uwo mwamamaji yaramubajije igituma. Yesica yaciye amwiganira ko imbere yuko yimuka yari akenye cane ku buryo umusi umwe yabuze ivyo afungura. Ikintu conyene yari ashoboye guha agakobwa kiwe yari amazi. Igihe yariko aragerageza kugasinziriza, yarasavye Imana ngo imufashe. Ivyabona babiri baciye bamugendera, ariko Yesica yabakiriye nabi aca aratabagura n’ikinyamakuru bamuhaye. Yababajije ati: “Izo ni zo mfungurwa noha agakobwa kanje?” Abo bashiki bacu baragerageje kumuremesha ariko biba ivy’ubusa. Mu nyuma, barazanye igapo irimwo ibifungurwa bayisiga imbere y’umuryango. Yesica yarakozwe ku mutima n’ico kintu bamukoreye. Igihe yariko ariga Bibiliya rero, yarumva yiyanse yibutse ko Imana yishuye isengesho ryiwe ariko ntabibone. Ico gihe hoho, yari yiyemeje gukorera Yehova. Ese ingene ubwakiranyi bw’abo bashiki bacu bwavuyemwo ikintu ciza!​—Umus. 11:1, 6.

NIWITANGE MU BIKORWA ISHIRAHAMWE RIRANGURA

9, 10. (a) Muri Isirayeli ya kera, ni uturyo utuhe two kwitanga twaboneka? (b) Abagabo bo mw’ishengero bafise uturyo utuhe two kwitanga muri iki gihe?

⁹ Muri Isirayeli ya kera haraboneka uturyo dutandukanye two kwitanga. (Kuv. 36:2; 1 Ngo. 29:5; Neh. 11:2) No muri iki gihe, turashobora gutanga umwanya wacu, ivyo dutunze be n’ububangukirwe bwacu kugira dufashe abavukanyi na bashiki bacu. Igihe tubigize, turironkera umunezero mwinshi n’imihezagiro itari mike.

¹⁰ Ijambo ry’Imana rihimiriza abagabo bo mw’ishengero gukorana na Yehova mu kurondera gushikira amabanga. (1 Tim. 3:1, 8, 9; 1 Pet. 5:2, 3) Ababigenza gutyo baba bipfuza gufasha abandi mu buryo buboneka be no mu vy’impwemu. (Ivyak. 6:1-4) Abakurambere boba bamaze kugusaba nimba wokwitanga mu bijanye no kwakira abantu, ibijanye n’ibisohokayandikiro, ivyibare, kubungabunga Ingoro canke ibindi nk’ivyo? Abitanga muri ubwo buryo baravuga ko bironkera umunezero mwinshi igihe bafashije abandi.

11. Mushiki wacu umwe yungukiye gute ku bagenzi yaronkeye mu bikorwa vy’ubwubatsi?

¹¹ Abitanga mu bikorwa vy’ubwubatsi akenshi barironkera abagenzi bashasha. Rimbura akarorero ka mushiki wacu Margie, akaba amaze imyaka 18 afasha mu bwubatsi bw’Ingoro z’Ubwami. Muri iyo myaka, yarafashije cane bashiki bacu bakiri bato mu kubamenyereza. Yarabonye ko kari akaryo keza ko kuremeshanya na bo mu vy’impwemu. (Rom. 1:12) Mu bihe vy’ingorane Margie yaciyemwo, abagenzi yari yarironkeye muri ico gikorwa c’ubwubatsi baramuremesha cane. Woba umaze kwitanga mu bwubatsi? Waba ufise ubuhanga canke utabufise, woba wokwitanga?

12. Wofasha gute igihe hateye icago c’icaduka?

¹² Igihe hateye ivyago vy’ivyaduka, abasavyi b’Imana baca baronka uturyo two gukorana na yo mu gufasha abavukanyi. Nk’akarorero, baratanga intererano z’amahera. (Yoh. 13:34, 35; Ivyak. 11:27-30) Ubundi buryo bwo kubafasha ni ukubasukurira amazu canke kuyabasanurira. Uwitwa Gabriela ni mushiki wacu wo muri Polonye, inzu yiwe ikaba yari yononywe n’umwuzure. Yarahimbawe cane igihe abavukanyi bo mu mashengero yo mu micungararo baza kumufasha. Yigana ati: “Sinipfuza kuvuga ivyo natakaje, kuko ari ivy’umubiri gusa. Nipfuza nyabuna kubiganira ingene nahungukiye cane. Ivyabaye vyarankuye amazinda ko kuba mu bagize ishengero rya gikirisu ari agateka kadasanzwe be n’uko bituma tugira umunezero n’agahimbare.” Abenshi bafashijwe inyuma y’icago c’icaduka bavuga ko biyumva gutyo nyene. Abakorana na Yehova mu gufasha abandi na bo nyene barironkera agahimbare kenshi.​—Soma Ivyakozwe 20:35; 2 Abakorinto 9:6, 7.

13. Kwitanga bishobora gute gukomeza ubucuti dufitaniye na Yehova? Tanga akarorero.

¹³ Uwitwa Stephanie be n’abandi bamamaji barironkeye agahimbare ko gukorana n’Imana mu gufasha Ivyabona bahungiye muri Leta Zunze Ubumwe za Amerika bavuye mu bihugu vyasinzikajwe n’intambara. Barafashije izo mpunzi kuronka aho ziba be n’ibikoresho vyo mu nzu. Stephanie avuga ati: “Twarakozwe cane ku mutima tubonye umunezero n’ugukenguruka bagaragaje biboneye urukundo ruranga umuryango w’abavukanyi ukwiye kw’isi yose. Iyo miryango yiyumvira ko ari twe twabafashije, ariko mu vy’ukuri ni bo badufashije cane. Urukundo, ubumwe, ukwizera no kwizigira Yehova twababonanye vyatumye turushiriza gukunda Yehova no gukenguruka ivyo aturonsa vyose abicishije kw’ishirahamwe ryiwe.”

NIWAGURE UMURIMO URANGURIRA YEHOVA

14, 15. (a) Ni agatima akahe umuhanuzi Yesaya yagaragaje? (b) Muri iki gihe, abamamaji bomwigana gute?

¹⁴ Woba wipfuza kurushiriza gukorana na Yehova? Woba wokwemera kwimuka kugira umukorere ahakenewe abamamaji kuruta? Ego ni ko, si ngombwa ngo abasavyi b’Imana baje kure yo muhira iwabo kugira bakorere Yehova. Yamara rero, hariho abavukanyi na bashiki bacu bashobora kubigira bivanye n’uko ivyabo vyifashe. Baragaragaza agatima nk’ak’umuhanuzi Yesaya. Igihe Yehova yabaza ati: “Ntume nde, kandi ni nde atugira?” yaciye yishura ati: “Ndi hano! Ntuma.” (Yes. 6:8) Bivanye n’uko ivyawe vyifashe, woba wipfuza kumwigana igihe hari inkenero mw’ishirahamwe? None ni ibiki bikeneye gukorwa?

¹⁵ Ku bijanye n’igikorwa co kwamamaza be no guhindura abantu abigishwa, Yezu yavuze ati: “Ivyimburwa ni vyinshi mugabo abakozi ni bake. Nimwinginge rero Umukuru w’iyimbura arungike abakozi mw’iyimbura ryiwe.” (Mat. 9:37, 38) Woba wokwitanga ugakorera aho abamamaji bakenewe kuruta, kumbure uri umutsimvyi? Canke na ho, hoba hari uwundi muntu wofasha kubigira? Abavukanyi na bashiki bacu benshi basanze uburyo bwiza kuruta ubundi bwose bwo kwerekana ko bakunda Imana na bagenzi babo ari ugukorera ubutsimvyi mu turere canke mu vyibare bikeneye abamamaji kuruta. Woba ubona ubundi uburyo wokwagura umurimo wawe? Niwabigira uzokwironkera umunezero mwinshi.

16, 17. Nimba wipfuza kwagura umurimo urangurira Yehova, ni utundi turyo utuhe ufise?

¹⁶ Woba woshima gukorera kuri Beteli canke mu bwubatsi, waba ukora igihe gito canke ukora utaha? Mw’ishirahamwe rya Yehova hama hakenewe abomukorera aho barungitswe hose be n’igikorwa cose bahawe. Vyoshobora gusaba ko bakorera ahari inkenero kanaka, naho nyene boba bafise ubuhanga mu wundi muce. Ariko rero, Yehova arashima cane agatima ko kwitanga kagaragazwa n’abemera kumukorera aho ari ho hose bikenewe.​—Zab. 110:3.

¹⁷ Woba wipfuza kuronka ukumenyerezwa kwiyongereye kugira ukorere Yehova bimwe bishitse? Nimba uvyipfuza, woshobora gukwiza ibisabwa ukitaba rya Shure ry’abamamaji b’Ubwami. Iryo shure riramenyereza abavukanyi na bashiki bacu bahumuye mu vy’impwemu kandi bari mu murimo w’igihe cose kugira barangure vyinshi mw’ishirahamwe rya Yehova. Abasaba kwitaba iryo shure bakwiye kuba bafise umutima ukunze wo gukorera aho borungikwa hose barangije ivyigwa. Woba none uzokwungukira kuri ako karyo ko gushikira uduteka twiyongereye tw’umurimo?​—1 Kor. 9:23.

18. Ni ivyiza ibihe wironkera mu gukorana na Yehova buri musi?

¹⁸ Twebwe abasavyi ba Yehova turemeshwa gutanga cane, kugaragaza ubuntu n’urukundo no kwitwararika abandi buri musi. Igihe tubigize, turironkera umunezero, amahoro n’agahimbare. (Gal. 5:22, 23) Uko ivyawe vyoba vyifashe kwose, urashobora kuronka umunezero mu kwigana ugutanga cane kwa Yehova no mu kuba umwe mu bantu b’agaciro bakorana na we.​—Imig. 3:9, 10.