Yeremiya

24 Hanyuma Yehova anyereka ibitebo bibiri birimo imbuto z’umutini biteretse imbere y’urusengero rwa Yehova. Icyo gihe Umwami Nebukadinezari* w’i Babuloni yari yarajyanye ku ngufu Yekoniya,*+ umuhungu wa Yehoyakimu+ umwami w’u Buyuda n’abatware b’i Buyuda, abanyabukorikori n’abakora ibintu mu byuma.* Yabavanye i Yerusalemu abajyana i Babuloni.+ 2 Mu gitebo kimwe harimo imbuto z’umutini nziza cyane, zimeze nk’imbuto z’umutini zeze bwa mbere. Naho mu kindi gitebo harimo imbuto z’umutini mbi cyane. Zari mbi cyane ku buryo zitaribwa.

3 Nuko Yehova arambaza ati: “Yeremiya we, urabona iki?” Ndamusubiza nti: “Ndabona imbuto z’umutini; inziza ni nziza cyane, imbi na zo ni mbi cyane ku buryo zitaribwa, kuko ari mbi.”+

4 Yehova arongera arambwira ati: 5 “Yehova Imana ya Isirayeli aravuga ati: ‘kimwe n’izi mbuto z’umutini nziza, nanjye nzita ku bantu b’i Buyuda bajyanywe ku ngufu, abo nirukanye aha hantu nkabohereza mu gihugu cy’Abakaludaya. 6 Nzabitaho mbagirire neza kandi nzatuma bagaruka muri iki gihugu.+ Nzabubaka aho kubasenya kandi nzabatera aho kubarandura.+ 7 Nzabaha umutima wo kumenya, bamenye ko ndi Yehova.+ Bazaba abantu banjye nanjye mbe Imana yabo,+ kuko bazangarukira n’umutima wabo wose.+

8 “‘Ariko Yehova aravuga ati: “Sedekiya+ umwami w’u Buyuda, abatware be, abasigaye b’i Yerusalemu bakiri muri iki gihugu n’abatuye mu gihugu cya Egiputa,+ nzabafata nk’imbuto z’umutini zitaribwa kuko ari mbi.+ 9 Nzabahindura ikintu gitera ubwoba ubwami bwose bwo mu isi,+ kandi mu duce twose nabatatanyirijemo,+ abantu bazabatuka, babasuzugure,* babaseke kandi babavume.*+ 10 Nzabateza inkota,+ inzara n’icyorezo,*+ kugeza aho bazashirira mu gihugu nabahaye bo na ba sekuruza.”’”