IMIBEREHO IKWIRIYE ABAKRISTO
Ibanga ryo gusobanukirwa Ijambo ry’Imana
Ese urifuza kuba indahemuka mu bigeragezo nka Daniyeli? Daniyeli yacukumburaga Ijambo ry’Imana, harimo n’ubuhanuzi (Dn 9:2). Kwiga Bibiliya ubishishikariye bishobora gutuma uba indahemuka. Mu buhe buryo? Bishobora gutuma urushaho kwiringira ko amasezerano ya Yehova azasohora (Ys 23:14). Nanone bishobora gutuma urushaho gukunda Imana, maze bikagushishikariza gukora ibyiza (Zb 97:10). Ariko se watangirira he? Reka turebe zimwe mu nama zagufasha.
Ni iki wagombye kwiga? Gutegura amateraniro bidufasha kwiyigisha. Nanone gusoma Bibiliya buri cyumweru bitugirira akamaro, iyo dukoze ubushakashatsi ku bintu tudasobanukiwe. Ushobora no gukora ubushakashatsi ku buhanuzi bwo muri Bibiliya, ku mbuto z’umwuka, ku ngendo za Pawulo, cyangwa ku byo Yehova yaremye. Niba hari ikibazo ugize, uge ucyandika kugira ngo ubutaha uzagikoreho ubushakashatsi.
Ni hehe wakora ubushakashatsi? Reba zimwe mu nama zabigufashamo, muri videwo ivuga ngo Ibikoresho by’ubushakashatsi bidufasha kubona ubutunzi bwo mu buryo bw’umwuka. Kugira ngo wisuzume, kora ubushakashatsi ku butegetsi bw’isi bugereranywa n’inyamaswa, buvugwa muri Daniyeli igice cya 7.
Wagombye kumara igihe kingana iki wiyigisha? Kwiyigisha buri gihe bituma ukura mu buryo bw’umwuka. Ushobora gutangira wiga igihe gito, nyuma yaho ukagenda wongera igihe. Kwiga Ijambo ry’Imana ni nko gushakisha ubutunzi buhishwe. Uko ugenda ububona ni ko urushaho gucukura ubushaka (Img 2:3-6). Uzarushaho gukunda Ijambo ry’Imana kandi ugire akamenyero ko kwiyigisha.—1Pt 2:2.
INYAMASWA ZIVUGWA MURI DANIYELI IGICE CYA 7 ZIGERERANYA IKI?
IKINDI KIBAZO:
Ubuhanuzi bwo muri Daniyeli 7:8, 24 bwasohoye bute?
IBYO NZIGA UBUTAHA:
Inyamaswa zivugwa mu Byahishuwe igice cya 13 zigereranya iki?