Uburyo bwo kuyungurura bw’ifi yitwa Manta Ray

Ifi yitwa manta ray ikoresha umunwa wayo igafata uruvange rw’amazi n’utunyabuzima duto cyane tuba hasi mu nyanja. Urwo ruvange rwikubita ku kayunguruzo k’iyo fi, bigatuma utwo tunyabuzima tujya mu muhogo wayo, ubundi ikatumira. Amazi yo anyura muri ako kayunguruzo agasohokera aho iyo fi ihumekera. Iyo fi iyungurura utwo tunyabuzima, ntidusohokane n’amazi, nubwo ari duto cyane ugereranyije n’utwenge tw’akayunguruzo k’iyo fi. Hari umunyamakuru uvuga ibijyanye na siyanse witwa Ed Yong, wavuze ko ibyo bintu ubusanzwe bisa n’ibidashoboka.

Tekereza kuri ibi bikurikira: Uburyo bwo kuyungurura bw’iyo fi bumeze nk’imiheto itanu, ikozwe nk’igisokozo gifite amenyo ku mpande zombi. Ayo menyo aba asa nk’ateranye umugongo, atandukanya amazi, amwe agaca hejuru y’ayo menyo, andi agaca hagati y’ayo menyo, noneho bigakora akantu kameze nk’umuvumba.

Utunyabuzima, iyo dukubise kuri ayo menyo nk’ay’igisokozo, duhita twinjira mu muyoboro uba wihuta cyane, ukatugeza mu muhogo w’iyo fi, maze ikatumira. Ubundi utwo tunyabuzima twagombye guhagama hagati y’ayo menyo, ariko wa muvumba uhita udusunika ukatwohereza muri uwo muyoboro. Ubu buryo bwo kuyungurura iyi fi ikoresha, butuma ibasha gufata utunyabuzima two mu mazi ikaturya ubundi twashoboraga guca hagati y’ayo menyo nk’ay’igisokozo tukisubirira mu nyanja.

Ikindi nanone, ubwo buryo bwo kuyungurura ibyokurya iyo fi ikoresha, butuma imyenge iri hagati y’ayo menyo itaziba kandi igahora ifite isuku. Ibyo ibikora niyo yaba iri koga yihuta cyangwa utwo tunyabuzima two mu mazi ari twinshi.

Abashakashatsi bafite icyizere ko ubu buryo iyi fi ya manta ray ikoresha iyungurura, bushobora kubafasha gushyiraho uburyo bwo kuyungurura amazi akarushaho gusa neza kandi bakayakuramo uduce duto tw’imyanda ya pulasitike tutaboneshwa amaso.

Ubitekerezaho iki: Ese uburyo ifi ya manta ray ikoresha iyungurura bwabayeho biturutse ku bwihindurize cyangwa bwararemwe?