Pawulo na Timoteyo

Timoteyo yari umuvandimwe ukiri muto wo mu itorero ry’i Lusitira. Papa we yari Umugiriki, mama we akaba Umuyahudikazi. Mama we witwaga Enise na nyirakuru witwaga Loyisi, bamwigishije ibyerekeye Yehova kuva akiri umwana.

Igihe Pawulo yageraga i Lusitira mu rugendo rwe rwa kabiri, yabonye ko Timoteyo yakundaga abavandimwe kandi ko yifuzaga kubafasha. Pawulo yasabye Timoteyo ngo bajyane mu rugendo rwo kubwiriza. Yatoje Timoteyo kubwiriza neza ubutumwa bwiza no kwigisha.

Umwuka wera wayoboraga Pawulo na Timoteyo aho bajyaga hose. Igihe kimwe ari nijoro, Pawulo yabonye mu iyerekwa umuntu wamusabaga ngo ajye i Makedoniya kubafasha. Pawulo, Timoteyo, Silasi na Luka bagiye kuhabwiriza no kuhashinga amatorero.

Abagabo n’abagore benshi bo mu mujyi wa Tesalonike muri Makedoniya, bahindutse Abakristo. Icyakora hari Abayahudi bagiriye ishyari Pawulo n’abo bari kumwe. Bashutse abantu bishyira hamwe, maze bakurubana abo bavandimwe babashyira abayobozi b’umujyi. Barasakuzaga bati: “Aba bagabo barwanya ubutegetsi bw’Abaroma.” Muri iryo joro, Pawulo na Timoteyo bahungiye i Beroya kubera ko bari bagiye kubagirira nabi.

Abantu b’i Beroya bifuzaga kumenya ukuri, kandi Abayahudi n’Abagiriki bahabaga bizeye Yesu. Ariko Abayahudi b’i Tesalonike baje kuhateza akavuyo maze Pawulo ahungira muri Atene. Timoteyo na Silasi bo bagumye i Beroya kugira ngo batere inkunga abavandimwe. Nyuma y’igihe, Pawulo yasabye Timoteyo gusubira i Tesalonike kugira ngo afashe abavandimwe baho batotezwaga cyane. Nyuma yaho, Pawulo yoherezaga Timoteyo gusura amatorero atandukanye kugira ngo ayatere inkunga.

Pawulo yabwiye Timoteyo ati: “Abashaka gukorera Yehova bazatotezwa.” Timoteyo na we yaratotejwe kandi afungwa azira ukwizera kwe. Ariko yari yishimye kuko yakomeje kubera Yehova indahemuka.

Pawulo yabwiye Abafilipi ati: “Nzaboherereza Timoteyo. Azabigisha uko abagaragu ba Yehova bakwiriye kubaho kandi abatoze kubwiriza.” Pawulo yari yizeye ko Timoteyo azasohoza neza iyo nshingano. Bamaze imyaka myinshi bafatanya gukorera Yehova kandi bari incuti magara.