Yesu yinjira i Yerusalemu ari ku ndogobe

Ese ubuhanuzi buvuga ibya Mesiya bwaba bugaragaza ko Yesu ari we wari Mesiya?

Icyo Bibiliya ibivugaho

Yego. Igihe Yesu yari ku isi, yashohoje ubuhanuzi bwinshi buvuga ibya “Mesiya Umuyobozi,” wari kuba “Umukiza w’isi” (Daniyeli 9:25; 1 Yohana 4:14). Na nyuma y’urupfu rwe, yashohoje ubundi buhanuzi buvuga ibya Mesiya.—Zaburi 110:1; Ibyakozwe 2:34-36.

Izina “Mesiya” risobanura iki?

Ijambo ry’Igiheburayo Ma·shiʹach ryahinduwemo Mesiya hamwe n’iry’Ikigiriki Khri·stos ryahinduwemo Kristo, yombi asobanura “Uwatoranyijwe.” Ubwo rero, “Yesu Kristo” bisobanura “Yesu watoranyijwe,” cyangwa “Yesu Mesiya.”

Mu bihe bya Bibiliya, akenshi iyo umuntu yatoranywaga ngo ahabwe inshingano yihariye, bamusukagaho amavuta ku mutwe (Abalewi 8:12; 1 Samweli 16:13). Yesu na we yatoranyijwe n’Imana kugira ngo abe Mesiya; uwo akaba ari umwanya wihariye cyane (Ibyakozwe 2:36). Icyakora Yesu we ntiyasutsweho amavuta, ahubwo yasutsweho umwuka wera.—Matayo 3:16.

Ese birashoboka ko ubuhanuzi buvuga ibya Mesiya bwari gusohorera ku bantu benshi?

Oya. Kimwe n’uko buri muntu agira ikimuranga kihariye, ni na ko ubuhanuzi bwo muri Bibiliya bwerekezaga kuri Mesiya gusa cyangwa Kristo. Icyakora, Bibiliya iduha umuburo w’uko hari kuzaduka ba ‘Kristo b’ibinyoma hamwe n’abahanuzi b’ibinyoma bakazakora ibimenyetso bikomeye n’ibitangaza kugira ngo bayobye abantu, ndetse byabashobokera bakayobya n’abatoranyijwe.’—Matayo 24:24.

Ese twaba tugitegereje Mesiya?

Oya. Bibiliya yari yaravuze ko Mesiya yari gukomoka mu muryango wa Dawidi umwami wa Isirayeli (Zaburi 89:3, 4). Birashoboka ko inyandiko zigaragaza ibisekuru by’Abayahudi kugeza kuri Dawidi zabuze igihe Abaroma bigaruriraga Yerusalemu mu mwaka wa 70.a Ubwo rero, kuva icyo gihe nta muntu ushobora kwemeza ko akomoka mu muryango w’Umwami Dawidi. Icyakora, nubwo igihe Yesu yari hano ku isi izo nyandiko zari zikiriho, nta muntu n’umwe ndetse n’abanzi be wigeze ahakana ko yari uwo mu muryango wa Dawidi.—Matayo 22:41-46.

Muri Bibiliya harimo ubuhanuzi bungahe buvuga ibya Mesiya?

Ntibyoroshye kumenya umubare nyawo w’ubuhanuzi buvuga ibya Mesiya. Ibyo biterwa n’uko abantu babara ubuhanuzi buvuga ibya Mesiya mu buryo butandukanye. Urugero, muri Yesaya 53:2-7 havugwamo ibintu byinshi byari kuranga Mesiya. Hari abantu bamwe babona ko ubuhanuzi buvugwamo ari bumwe, mu gihe abandi bo babona ko hakubiyemo ubuhanuzi bwinshi.

Ubuhanuzi buvuga ibya Mesiya Yesu yashohoje

Ubuhanuzi	Aho bugaragara	Uko bwasohoye
Yari uwo mu rubyaro rwa Aburahamu	Intangiriro 22:17, 18	Matayo 1:1
Yari uwo mu rubyaro rwa Isaka umuhungu wa Aburahamu	Intangiriro 17:19	Matayo 1:2
Yari gukomoka mu muryango wa Yuda	Intangiriro 49:10	Matayo 1:1, 3
Yari gukomoka mu muryango w’Umwami Dawidi	Yesaya 9:7	Matayo 1:1
Yari kubyarwa n’umukobwa w’isugi	Yesaya 7:14	Matayo 1:18, 22, 23
Yari kuvukira i Betelehemu	Mika 5:2	Matayo 2:1, 5, 6
Yari kwitwa Emanwelib	Yesaya 7:14	Matayo 1:21-23
Yari kuvukira mu muryango ukennye	Yesaya 53:2	Luka 2:7
Igihe yavukaga, abana bato bari kwicwa	Yeremiya 31:15	Matayo 2:16-18
Yari guhamagarwa akava muri Egiputa	Hoseya 11:1	Matayo 2:13-15
Yari kwitwa Umunyanazaretic	Yesaya 11:1	Matayo 2:23
Yari kubanzirizwa n’intumwa	Malaki 3:1	Matayo 11:7-10
Yari gutoranywa akaba Mesiya mu mwaka wa 29.d	Daniyeli 9:25	Matayo 3:13-17
Imana yari kwemeza ko ari Umwana wayo	Zaburi 2:7	Ibyakozwe 13:33, 34
Yari kugirira ishyaka Inzu y’Imana	Zaburi 69:9	Yohana 2:13-17
Yari kwamamaza ubutumwa bwiza	Yesaya 61:1	Luka 4:16-21
Yari kubwiriza muri Galilaya ikabona umucyo	Yesaya 9:1, 2	Matayo 4:13-16
Yari gukora ibitangaza nka Mose	Gutegeka kwa Kabiri 18:15	Ibyakozwe 2:22
Yari kuvuga ibyavaga ku Mana nka Mose	Gutegeka kwa Kabiri 18:18, 19	Yohana 12:49
Yari gukiza abarwayi benshi	Yesaya 53:4	Matayo 8:16, 17
Ntiyari kwishakira ikuzo	Yesaya 42:2	Matayo 12:17, 19
Yari kugirira impuhwe ababaye	Yesaya 42:3	Matayo 12:9-20; Mariko 6:34
Yari kuzana ubutabera bw’Imana	Yesaya 42:1, 4	Matayo 12:17-20
Yari kuba umujyanama uhebuje	Yesaya 9:6, 7	Yohana 6:68
Yari kumenyekanisha izina rya Yehova	Zaburi 22:22	Yohana 17:6
Yari kwigisha akoresheje imigani	Zaburi 78:2	Matayo 13:34, 35
Yari kuba Umuyobozi	Daniyeli 9:25	Matayo 23:10
Abantu benshi ntibari kumwizera	Yesaya 53:1	Yohana 12:37, 38
Yari kuba nk’ibuye rigusha	Yesaya 8:14, 15	Matayo 21:42-44
Abantu ntibari kumwemera	Zaburi 118:22, 23	Ibyakozwe 4:10, 11
Abantu bari kumwanga nta mpamvu	Zaburi 69:4	Yohana 15:24, 25
Yari kwinjira i Yerusalemu nk’umwami ari ku cyana k’indogobe	Zekariya 9:9	Matayo 21:4-9
Yari kubonera ishimwe mu kanwa k’abana bato	Zaburi 8:2	Matayo 21:15, 16
Yari kuza mu izina rya Yehova	Zaburi 118:26	Yohana 12:12, 13
Yari kugambanirwa n’inshuti ye	Zaburi 41:9	Yohana 13:18
Yari kugurishwa ibiceri by’ifeza 30e	Zekariya 11:12, 13	Matayo 26:14-16; 27:3-10
Incuti ze zari kumutererana	Zekariya 13:7	Matayo 26:31, 56
Yari gushinjwa n’abagabo b’ibinyoma	Zaburi 35:11	Matayo 26:59-61
Bari kumurega ntabasubize	Yesaya 53:7	Matayo 27:12-14
Bari kumucira amacandwe	Yesaya 50:6	Matayo 26:67; 27:27, 30
Bari kumukubita mu mutwe	Mika 5:1	Mariko 15:19
Yari gukubitwa	Yesaya 50:6	Yohana 19:1
Ntiyari kurwanya abamukubise	Yesaya 50:6	Yohana 18:22, 23
Abayobozi bari kumugambanira	Zaburi 2:2	Luka 23:10-12
Bari kumutera imisumari mu maboko no mu birenge	Zaburi 22:16	Matayo 27:35; Yohana 20:25
Bari gukorera ubufindo imyenda ye	Zaburi 22:18	Yohana 19:23, 24
Yari kumanikanwa n’ibisambo	Yesaya 53:12	Matayo 27:38
Baramunnyeze kandi baramutuka	Zaburi 22:7, 8	Matayo 27:39-43
Yari gupfira abanyabyaha	Yesaya 53:5, 6	1 Petero 2:23-25
Yari gusa n’aho yatereranywe n’Imana	Zaburi 22:1	Mariko 15:34
Bari kumuha divayi y’umushari ivanze n’ibintu birura	Zaburi 69:21	Matayo 27:34
Mbere gato yo gupfa, yari kugira inyota	Zaburi 22:15	Yohana 19:28, 29
Yari gushyira umwuka we mu maboko y’Imana	Zaburi 31:5	Luka 23:46
Yari gutanga ubuzima bwe	Yesaya 53:12	Mariko 15:37
Yari gutanga incungu yo gukuraho icyaha	Yesaya 53:12	Matayo 20:28
Amagufwa ye ntiyari kuvunwa	Zaburi 34:20	Yohana 19:31-33, 36
Yari guterwa icumu	Zekariya 12:10	Yohana 19:33-35, 37
Yari guhambanwa n’abakire	Yesaya 53:9	Matayo 27:57-60
Yari gupfa akazuka	Zaburi 16:10	Ibyakozwe 2:29-31
Uwamugambaniye yari gusimbuzwa	Zaburi 109:8	Ibyakozwe 1:15-20
Yari kwicara iburyo bw’Imana	Zaburi 110:1	Ibyakozwe 2:34-36

a Hari igitabo cyagize kiti: “Nta washidikanya ko inyandiko z’Abayahudi zigaragaza ibisekuruza byabo zabuze igihe Yerusalemu yarimburwaga, aho kuba mbere yaho.”

b Izina ry’Igiheburayo Emanweli risobanura ngo “Imana iri kumwe natwe,” rigaragaza neza inshingano Yesu afite yo kuba Mesiya. Ibyo yakoze igihe yari hano ku isi bigaragaza ko Imana yita ku bayisenga.—Luka 2:27-32; 7:12-16.

c Ijambo “Umunyanazareti” rikomoka ku ijambo ry’Igiheburayo neʹtser, risobanura “umushibu.”

d Niba ushaka kumenya ibihamya bigaragaza ko Mesiya yari kugaragara mu mwaka wa 29, reba ingingo ivuga ngo “Uko ubuhanuzi bwa Daniyeli bugaragaza igihe Mesiya yari kuzazira.”

e Ibivugwa muri ubu buhanuzi biboneka mu gitabo cya Zekariya, ariko Matayo we yavuze ko ‘byavuzwe binyuze ku muhanuzi Yeremiya’ (Matayo 27:9). Uko bigaragara igitabo cya Yeremiya cyabanje gushyirwa mu kiciro k’ibitabo by’“Abahanuzi” (Luka 24:44). Birashoboka ko ari yo mpamvu Matayo yakoresheje izina rya “Yeremiya” yerekeza ku kiciro k’ibyo bitabo, harimo n’igitabo cya Zekariya.