Igice cya 117

Agirira Umubabaro Mwinshi mu Busitani

IGIHE Yesu yari arangije gusenga, we n’intumwa ze 11 zizerwa baririmbye indirimbo zo gusingiza Yehova. Hanyuma, baramanutse bava mu cyumba cyo hejuru, basohoka hanze mu ijoro rihehereye, ricuze umwijima, maze bongera kwambukiranya Ikibaya cya Kidironi bagana i Betaniya. Ariko bari mu nzira bagenda, bahagaze ahantu bakundaga cyane, hari ubusitani bwa Getsemani. Ubwo busitani bwari buri ku Musozi wa Elayono cyangwa mu nkengero zawo. Incuro nyinshi, Yesu yajyaga ahurira n’intumwa ze aho ngaho mu biti bya elayo.

Yasize intumwa umunani—wenda ku muryango w’ubwo busitani—maze arazibwira ati “nimube mwicaye aha, nigire hariya nsenge.” Hanyuma, yafashe izindi ntumwa eshatu—ari zo Petero, Yakobo na Yohana—maze barakomeza binjirana mu busitani. Yesu yagize agahinda kenshi kandi ahagarika umutima mu buryo bukomeye. Yarababwiye ati “umutima wanjye ufite agahinda kenshi kenda kunyica: mugume hano, mubane maso nanjye.”

Yesu amaze kwigira imbere ho gato, yarapfukamye maze yubika umutwe hasi atangira gusenga abigiranye umwete ati “Data, niba bishoboka, iki gikombe kindenge; ariko bye kuba uko jyewe nshaka, ahubwo bibe uko wowe ushaka.” Yashakaga kuvuga iki? Kuki yari ‘afite agahinda kenshi, kenda kumwica’? Yaba se yari yisubiyeho ku bihereranye n’icyemezo yari yarafashe cyo gupfa no gutanga incungu?

Reka da! Yesu ntiyasabye ko yarindwa kugerwaho n’urupfu. Ndetse n’igitekerezo ubwacyo cyari cyarigeze gutangwa na Petero cyo kwirinda gupfa urupfu rw’igitambo, kuri we cyari ikizira rwose. Ahubwo, yari afite umubabaro mwinshi kuko yatinyaga ko uburyo yari agiye kwicwamo—nk’umugizi wa nabi usuzuguritse—bwatukisha izina rya Se. Icyo gihe noneho, yatekereje ukuntu mu masaha make yari agiye kumanikwa ku giti nk’umuntu mubi hanyuma y’abandi bose—nk’umuntu watutse Imana! Ibyo ni byo byari bimuhangayikishije cyane.

Yesu amaze umwanya muremure asenga, yasubiyeyo asanga za ntumwa eshatu zirasinziriye. Yesu yabwiye Petero ati “harya ntimubashije kubana maso nanjye isaha imwe? Mube maso, musenge, mutajya mu moshya.” Ariko kandi, yazirikanye ukuntu bari bahangayitse kandi n’amasaha akaba yari akuze, nuko aravuga ati “umutima ni wo ukunze ariko umubiri ufite intege nke.”

Hanyuma, Yesu yongeye kugenda ubwa kabiri maze asaba Imana ngo imurenze ‘icyo gikombe,’ ni ukuvuga icyo Yehova yari yaramuhaye gukora, cyangwa icyo yashakaga ko akora. Igihe yagarukaga, yongeye gusanga za ntumwa uko ari eshatu zisinziriye, kandi icyo gihe zaragombaga kuba zirimo zisenga kugira ngo zitagwa mu moshya. Yesu azivugishije, zayobewe icyo zamusubiza.

Hanyuma noneho, Yesu yongeye kugenda ku ncuro ya gatatu, ajya ahantu nk’aho watera ibuye, maze arapfukama, asenga ataka cyane arira ati “Data, nubishaka, undenze iki gikombe.” Yesu yumvaga ababajwe cyane n’uko urupfu yari gupfa nk’urw’umugizi wa nabi rwari gushyira igitutsi ku izina rya Se. Kuba yararegwaga ko yatutse Imana—ko yayivumye—urebye, byari ibintu atashoboraga kwihanganira!

Nyamara kandi, Yesu yarakomeje arasenga ati “bye kuba uko jyeweho nshaka, ahubwo bibe uko wowe ushaka.” Yesu abigiranye ukumvira, yakoze ibyo Imana yashakaga aho gukora ibyo we yashakaga. Icyo gihe, umumarayika wari uturutse mu ijuru yaramubonekeye maze amukomeresha amagambo atera inkunga. Birashoboka ko uwo mumarayika yabwiye Yesu ko Se yari amwishimiye.

Nyamara se, mbega umutwaro Yesu yari yikoreye! Yashoboraga kubura ubuzima bw’iteka, we ubwe, n’ubwoko bwa kimuntu bwose uko bwakabaye. Yari ahagaritse umutima mu buryo bukomeye. Bityo, Yesu yakomeje gusengana umwete, ku buryo ibyuya bye byari bimeze nk’ibitonyanga by’amaraso igihe byatonyangaga hasi. Ikinyamakuru cyitwa Journal de l’Association des médecins américains cyaravuze kiti “n’ubwo ibyo bidakunze kubaho, umuntu ashobora . . . kubira ibyuya by’amaraso mu gihe yaba ari mu mimerere ituma ahagarika umutima mu buryo bukomeye.”

Nyuma y’aho, Yesu yarongeye ajya kureba intumwa ze ku ncuro ya gatatu, nanone asanga zasinziriye. Bari banegekajwe n’agahinda kenshi bari bafite. Yaravuze ati “noneho nimusinzire, muruhuke. Birarangiye. Igihe kirasohoye; dore, Umwana w’umuntu agambaniwe mu maboko y’abanyabyaha. Nimubyuke tugende: dore, ungenza ari hafi.”

Igihe yari atararangiza kuvuga, Yuda Isikaryota yaje amusanga, aherekejwe n’imbaga y’abantu bari bafite imuri n’amatara kandi bitwaje intwaro. Matayo 26:30, 36-47; 16:21-23; Mariko 14:26, 32-43; Luka 22:39-47; Yohana 18:1-3; Abaheburayo 5:7.

▪ Ni hehe Yesu yajyanye intumwa ze igihe bari bavuye mu cyumba cyo hejuru, kandi se, ni iki yakoze bari aho ngaho?

▪ Mu gihe Yesu yari arimo asenga, intumwa ze zakoraga iki?

▪ Kuki Yesu yari afite umubabaro mwinshi, kandi se, ni iki yasabye Imana?

▪ Kuba Yesu yarabize ibyuya bimeze nk’ibitonyanga by’amaraso byagaragazaga iki?

Igice cya 118

Agambanirwa Hanyuma Agafatwa

HARI mu gicuku gishyira mu nkoko ubwo Yuda yajyanaga imbaga y’abasirikare, abatambyi bakuru, Abafarisayo ndetse n’abandi bantu mu busitani bwa Getsemani. Abatambyi bari bemeye guhemba Yuda ibice by’ifeza 30 kugira ngo agambanire Yesu.

Mbere y’aho, ubwo Yuda yahezwaga ku ifunguro rya Pasika, uko bigaragara yahise ajya kureba abatambyi bakuru. Bahise bateranya abakuru babo bwite, kimwe n’agatsiko k’abasirikare. Yuda ashobora kuba yarabanje kubajyana aho Yesu n’intumwa ze bari bizihirije Pasika. Babonye ko bari bahavuye, iyo mbaga y’abantu bari bitwaje intwaro kandi bafite amatara n’imuri basohotse muri Yerusalemu bakurikiye Yuda maze bambuka Ikibaya cya Kidironi.

Mu gihe Yuda yajyanaga abo bantu ku Musozi wa Elayono, yari azi neza aho yari gusanga Yesu. Mu cyumweru cyabanjirije icyo, igihe Yesu n’intumwa ze bakoraga ingendo hagati ya Betaniya na Yerusalemu bagenda bagaruka, incuro nyinshi bahagararaga mu busitani bwa Getsemani kugira ngo baruhuke kandi baganire. Ariko se, icyo gihe noneho ko Yesu ashobora kuba ataragaragaraga bitewe n’uko hari umwijima kandi akaba yari munsi y’ibiti bya elayo, abasirikare bari kumumenya bate? Bashobora kuba batari barigeze bamubona mbere y’aho. Kubera iyo mpamvu, Yuda yabahaye ikimenyetso, avuga ati “uwo ndi busome, ni we uwo; mumufate, mumujyane mumukomeje.”

Yuda yajyanye icyo kivunge cy’abantu muri ubwo busitani, abona Yesu n’intumwa ze maze ahita agenda amusanga. Yaramubwiye amusoma cyane ati “ni amahoro, Mwigisha!”

Yesu yahise amubaza ati “uzanywe n’iki hano mugenzi wanjye?” Hanyuma, mu gusubiza ikibazo we ubwe yari amaze kubaza, yaravuze ati “Yuda, uragambanishiriza Umwana w’umuntu kumusoma?” Ariko kandi, ntiyari afite byinshi byo kuvugana n’uwo mugambanyi! Yesu yigiye imbere mu mucyo w’amatara yakaga cyane maze arabaza ati “murashaka nde?”

Barashubije bati “ni Yesu w’i Nazareti.”

Yesu yagize ubutwari bwo guhagarara imbere yabo bose, maze arababwira ati “ni jye.” Kubera ko abo bagabo batangajwe n’ukuntu yari afite ubushizi bw’amanga kandi bakaba batari bazi ibyari bigiye kuba, basubiye inyuma bikubita hasi.

Yesu yarakomeje arababwira atuje ati “mbabwiye ko ari jye; nuko rero niba ari jye mushaka, mureke aba bagende.” Mbere y’aho gato, bakiri mu cyumba cyo hejuru, Yesu yari yabwiye Se mu isengesho ko yari yararinze intumwa ze zizerwa, kandi ko nta n’imwe muri zo yazimiye “keretse umwana wo kurimbuka.” Bityo rero, kugira ngo ijambo rye risohore, yasabye ko abigishwa be babareka bakagenda.

Igihe abo basirikare bari bamaze gutuza, bagahaguruka maze bagatangira kuboha Yesu, intumwa zahise zimenya ibyendaga kuba. Zaramubajije ziti “Databuja, tubakubite inkota?” Mbere y’uko Yesu asubiza, Petero yafashe imwe mu nkota ebyiri intumwa zari zazanye, yadukira Maluko, umugaragu w’umutambyi mukuru. Petero yahushije umutwe w’uwo mugaragu ariko amuca ugutwi kw’iburyo.

Yesu yahise atabara maze aravuga ati “rekera aho.” Yakoze ku gutwi kwa Maluko, amukiza igikomere. Aho yahise ahatangira isomo ry’ingenzi, ategeka Petero ati “subiza inkota yawe mu rwubati rwayo; kuko abatwara inkota bose bazicwa n’inkota. Mbese wibwira yuko ntabasha gusaba Data, akanyoherereza abamarayika nonaha basāga legiyoni cumi n’ebyiri?”

Yesu yari yiteguye kwemera ko bamufata, kuko yavuze ati “ibyanditswe byasohora bite, kandi ari ko bikwiriye kuba?” Kandi yongeyeho ati “mbese igikombe Data ampaye, ne kukinyweraho?” Yemeranyaga mu buryo bwuzuye n’ibyo Imana yashakaga ku birebana na we!

Hanyuma, Yesu yagize icyo abwira imbaga y’abantu bari aho. Yarababajije ati “harya muhurujwe no kumfata, nk’uko muzira umwambuzi, mufite inkota n’inshyimbo? Nicaraga mu rusengero iminsi yose nigisha, ko mutamfashe? Ariko ibi byose bibereyeho, kugira ngo ibyanditswe n’abahanuzi bisohore.”

Abasirikare n’umugaba w’ingabo n’abakuru b’Abayahudi bumvise ibyo, bafashe Yesu baramuboha. Intumwa zibibonye, zataye Yesu zirahunga. Ariko kandi, hari umusore umwe—wenda akaba ari umwigishwa Mariko—wagumye muri iyo mbaga y’abantu. Ashobora kuba yari muri rwa rugo Yesu yizihirijemo Pasika, maze nyuma y’aho akaza gukurikira iyo mbaga y’abantu aturutse aho muri urwo rugo. Nyuma y’aho ariko, baje kumumenya maze bashaka kumufata. Basigaranye umwenda w’ihariri yari yambaye maze we arabacika. Matayo 26:47-56, gereranya na NW; Mariko 14:43-52; Luka 22:47-53; Yohana 17:12; 18:3-12.

▪ Kuki Yuda yari yizeye adashidikanya ko yari busange Yesu mu busitani bwa Getsemani?

▪ Ni gute Yesu yagaragaje ko yari ahangayikishijwe n’intumwa ze?

▪ Ni iki Petero yakoze ashaka kurengera Yesu, ariko se, ni iki Yesu yamubwiye ku bihereranye n’ibyo?

▪ Ni gute Yesu yerekanye ko yemeranyaga mu buryo bwuzuye n’ibyo Imana yashakaga ku birebana na we?

▪ Igihe intumwa zasigaga Yesu, ni nde wagumanye na we, kandi se, ni iki cyamubayeho?

Igice cya 119

Ajyanwa kwa Ana, Hanyuma Akajyanwa kwa Kayafa

YESU yaboshywe nk’umugizi wa nabi ajyanwa kwa Ana, wahoze ari umutambyi mukuru ukomeye. Ana yari umutambyi mukuru igihe Yesu wari ufite imyaka 12 yatangazaga cyane abigisha ba Rabi mu rusengero. Nyuma y’igihe runaka, bamwe mu bahungu ba Ana baje kuba abatambyi bakuru, ariko icyo gihe umukwe we Kayafa ni we wari uri muri uwo mwanya.

Birashoboka ko Yesu yaba yarabanje kujyanwa kwa Ana kubera ko uwo mutambyi mukuru yari amaze igihe kirekire afite uruhare rukomeye mu mibereho y’idini rya kiyahudi. Kuba baranyuze kwa Ana byatumye Umutambyi Mukuru Kayafa abona igihe cyo guteranya Sanhedrin, ni ukuvuga abantu 71 bari bagize urukiko rukuru rwa Kiyahudi, no gukorakoranya abagabo bo guhamya ibinyoma.

Uwo mutambyi mukuru Ana yabajije Yesu ibihereranye n’abigishwa be n’inyigisho yigishaga. Ariko kandi, Yesu yaramushubije ati “nigishaga ab’isi neruye: iteka nigishiriza mu masinagogi no mu rusengero, aho Abayuda bose bateranira; nta cyo navuze rwihishwa. Urambariza iki? Abumvaga ba ari bo ubaza ibyo nababwiye: ni bo bazi ibyo navuze.”

Akimara kuvuga atyo, umwe mu basirikare bakuru wari umuhagaze iruhande yamukubise urushyi mu maso, aravuga ati “uku ni ko usubiza umutambyi mukuru?”

Yesu yaramushubije ati “niba mvuze ikibi, kimpamye: ariko niba ari neza, umpoye iki?” Nyuma yo guterana amagambo batyo, Ana yohereje Yesu kwa Kayafa aboshye.

Icyo gihe, abatambyi bakuru, abakuru n’abanditsi, ni koko, abari bagize Urukiko Rukuru rwa Kiyahudi bose, batangiye kwisuganya. Uko bigaragara, mu rugo rwa Kayafa ni ho bateraniye. Guca urubanza nk’urwo mu ijoro rya Pasika byari binyuranyije rwose n’amategeko ya Kiyahudi. Nyamara kandi, ibyo ntibyabujije abayobozi ba kidini gukomeza imigambi yabo mibisha.

Ibyumweru runaka mbere y’aho, igihe Yesu yazuraga Lazaro, abari bagize Urukiko Rukuru rwa Kiyahudi, hagati yabo bari baramaze gufata umwanzuro w’uko yagombaga gupfa. Nanone kandi iminsi ibiri gusa mbere y’aho, ni ukuvuga ku wa Gatatu, abakuru b’idini bagiye inama yo gufata Yesu mu mayeri kugira ngo bamwice. Tekereza gato: yari yakatiwe mbere yo gucirwa urubanza!

Icyo gihe noneho, bari bahagurukiye ibyo gushaka abagabo bo guhamya Yesu ibinyoma kugira ngo acirwe urubanza. Ariko kandi, hari habuze abagabo bashoboraga guhuriza ku birego bimwe. Kera kabaye, abagabo babiri bagiye imbere maze baramushinja bati “twumvise avuga ati ‘nzasenya uru rusengero rwubatswe n’intoki, nubake urundi mu minsi itatu rutubatswe n’intoki.’”

Kayafa yaramubajije ati “mbese ntiwiregura na hato? Ntiwumvise ibyo aba bakureze?” Ariko Yesu yaricecekeye. No muri icyo kirego cy’ikinyoma ariko, abo bagabo na bo ntibashoboye kuvuga rumwe, ibyo bikaba byarakojeje isoni Urukiko Rukuru rwa Kiyahudi. Nuko umutambyi mukuru agerageza ubundi buryo.

Kayafa yari azi ukuntu Abayahudi barakazwaga cyane n’umuntu wabaga yihandagaje akavuga ko ari Umwana w’Imana. Incuro ebyiri mbere y’aho, bari bafashe umwanzuro huti huti bavuga ko Yesu yigereranyaga, bityo akaba yari akwiriye gupfa, kubera ko bari bibeshye batekereza ko yihandagaje avuga ko angana n’Imana. Nuko Kayafa amubwirana uburyarya ati “nkurahirije Imana ihoraho, tubwire niba ari wowe Kristo, Umwana w’Imana.”

Uko Abayahudi baba baratekerezaga kose, Yesu yari Umwana w’Imana rwose. Kandi gukomeza kwicecekera byari gufatwa nk’aho ahakanye ko ari Kristo. Ni yo mpamvu Yesu yasubizanyije ubutwari ati “ndi we: kandi muzabona Umwana w’umuntu yicaye iburyo bw’ubushobozi bw’Imana aje ku bicu byo mu ijuru.”

Amaze kuvuga atyo, Kayafa, mu buryo bwo kwigaragaza, yagize atya ashishimura imyambaro ye, maze aravuga ati “arigereranije; turacyashakira iki abagabo? Dore noneho mwiyumviye kwigereranya kwe. Muratekereza iki?”

Urukiko Rukuru rwa Kiyahudi rwahise rutangaza ruti “akwiriye kwicwa.” Nuko batangira kumushinyagurira no kumutuka ibitutsi byinshi. Bamwe bamukubise inshyi banamucira mu maso. Abandi na bo bamupfutse mu maso maze bamukubita ibipfunsi bamuvugiraho bati “duhanure, Kristo, ni nde ugukubise?” Iyo myifatire y’urukozasoni, inyuranyije n’amategeko, yagaragajwe mu ijoro yaciriwemo urubanza. Matayo 26:57-68; 26:3, 4; Mariko 14:53-65; Luka 22:54, 63-65; Yohana 18:13-24; 11:45-53; 10:31-39; 5:16-18.

▪ Ni hehe Yesu yabanje kujyanwa, kandi byamugendekeye bite igihe yari ari yo?

▪ Hanyuma Yesu yajyanywe he, kandi kubera iki?

▪ Kayafa yabigenje ate kugira ngo ashobore gutuma Urukiko Rukuru rwa Kiyahudi rwemeza ko Yesu yagombaga gupfa?

▪ Ni iyihe myifatire y’urukozasoni, kandi inyuranyije n’amategeko, yagaragajwe mu gihe cyo gucira Yesu urubanza?

Igice cya 120

Petero Amwihakanira mu Rugo rw’Umutambyi Mukuru

PETERO na Yohana bamaze guta Yesu mu busitani bwa Getsemani maze bagahungana n’izindi ntumwa bahiye ubwoba, bo bageze aho barahagarara. Wenda baje gushyikira Yesu igihe bari bamujyanye mu rugo kwa Ana. Igihe Ana yamwoherezaga ku Mutambyi Mukuru Kayafa, Petero na Yohana baramukurikiye ariko bitaruye ho gato, uko bigaragara bakaba bari baheze mu rungabangabo batinya gushyira ubuzima bwabo mu kaga, nanone bakaba bari bahangayikishijwe cyane n’uko byari kugendekera Shebuja.

Mu gihe bari bageze mu rugo rugari cyane rwo kwa Kayafa, Yohana yashoboye kwinjiramo imbere, kubera ko yari azwi n’umutambyi mukuru. Petero we yasigaye ahagaze ku irembo. Ariko bidatinze, Yohana yaragarutse avugana n’umuja wari urinze irembo, maze yemerera Petero kwinjira.

Icyo gihe hari hamaze gukonja, kandi abakozi bo mu rugo n’abasirikare bakuru b’umutambyi mukuru bari bacanye umuriro w’amakara. Petero na we yagiye kota mu gihe yari ategereje umwanzuro w’urubanza rwa Yesu. Aho ngaho, umurinzi w’irembo wari winjije Petero yaje kumwitegerereza neza ku rumuri rw’umuriro wari urimo waka. Yariyamiriye ati “nawe wari kumwe na Yesu w’Umunyagalilaya.”

Petero yabujijwe amahwemo n’uko bari bamenye uwo ari we, maze ahakanira imbere yabo bose ko atazi Yesu. Yaravuze ati “ibyo uvuze sinzi ibyo ari byo, kandi simbimenye.”

Petero amaze kuvuga atyo, yarasohotse ajya hafi y’irembo. Aho ngaho, undi mukobwa yaramubonye maze na we abwira abari bahagaze aho ati “n’uyu yari kumwe na Yesu w’i Nazareti.” Petero yongeye kubihakana, ararahira ati “uwo muntu simuzi.”

Petero yagumye aho mu rugo, agerageza kwihishahisha uko bishoboka kose. Wenda icyo gihe, yarashigutse ubwo inkoko yabikaga mu gitondo kare kare butari bwacya neza. Hagati aho, urubanza rwa Yesu rwari rugikomeza, uko bigaragara rukaba rwarimo rubera mu ruhande rumwe rw’inzu yo hejuru yari aho mu rugo. Nta gushidikanya, Petero hamwe n’abandi bari bategerereje aho hasi babonaga abahamya batandukanye bazanywe no kumushinja bacicikana.

Hari hashize nk’isaha bavuze ko Petero yari ari kumwe na Yesu. Noneho, bamwe mu bari bahagaze aho hafi baramwegereye maze baramubwira bati “ni ukuri nawe uri umwe muri bo, ndetse ni imvugo yawe ikumenyekanishije.” Muri iryo tsinda ry’abantu harimo mwene wabo wa Maluko, uwo Petero yari yaciye ugutwi. Yaravuze ati “harya sinakubonye, uri kumwe na we muri ka gashyamba?”

Petero yarihanukiriye ati “uwo muntu simuzi.” Mu by’ukuri, yagerageje kubemeza ko bose bari bibeshye, yivuma kandi arahira, ndetse rwose anisabira kugerwaho n’ibyago niba ataravugaga ukuri.

Petero akimara kwihakana Yesu ubwa gatatu, inkoko yahise ibika. Icyo gihe kandi, Yesu, uko bigaragara wari wavuye mu nzu ari hejuru ku ibaraza ry’inzu, yarahindukiye aramureba. Petero yahise yibuka amagambo Yesu yari yavuze mu masaha make yari ashize, bari mu cyumba cyo hejuru, igihe yavugaga ati “inkoko itarabika kabiri, wowe ubwawe uri bunyihakane gatatu.” Kubera ko Petero yashegeshwe n’icyaha gikomeye yari yakoze, yarasohotse maze ararira cyane.

Ni gute ibyo byashoboraga kubaho? Petero yashoboraga ate kwihakana Shebuja incuro eshatu yikurikiranya, kandi yari amaze kwemeza adashidikanya ko yari akomeye mu buryo bw’umwuka? Nta gushidikanya, ibyo byaramugwiririye. Barimo bagoreka ukuri, kandi bakavuga ko Yesu ari umugizi wa nabi ruharwa. Icyiza cyarimo kigaragazwa ko ari kibi, n’utariho urubanza akagirwa umunyamakosa. Bityo kubera iyo mimerere Petero yari arimo, yabuze amahitamo. Ibyiyumvo bikwiriye yari afite byo kuba indahemuka byarahungabanye mu buryo butunguranye; yatewe agahinda no kuba yaraneshejwe no gutinya abantu. Tujye twirinda kugira ngo ibyo bye kuzigera bitubaho! Matayo 26:57, 58, 69-75; Mariko 14:30, 53, 54, 66-72; Luka 22:54-62; Yohana 18:15-18, 25-27.

▪ Ni gute Petero na Yohana bashoboye kwinjira mu rugo rw’umutambyi mukuru?

▪ Mu gihe Petero na Yohana bari mu rugo, ni iki cyarimo kibera mu nzu?

▪ Inkoko yabitse kangahe, kandi se, Petero yahakanye ko atazi Kristo incuro zingahe?

▪ Kuba Petero yarisabiye imivumo kandi akarahira byasobanuraga iki?

▪ Ni iki cyatumye Petero ahakana ko atazi Yesu?