Isaka amaze kugira imyaka 40, yashakanye na Rebeka. Isaka yakundaga Rebeka cyane. Baje kubyara abahungu babiri b’impanga.

Umukuru yitwaga Esawu naho umuto akitwa Yakobo. Esawu yakundaga kwibera mu gasozi, kandi yari azi guhiga cyane. Ariko Yakobo we yakundaga kwibera mu rugo.

Muri icyo gihe, umwana w’imfura ni we wahabwaga isambu nini n’amafaranga menshi, iyo papa we yapfaga. Ibyo ni byo byitwaga umurage. Mu muryango wa Isaka, umurage wari kuba urimo n’amasezerano Yehova yagiranye na Aburahamu. Esawu ntiyitaga kuri ayo masezerano, ariko Yakobo we yari azi ko afite agaciro cyane.

Igihe kimwe, Esawu yatashye ananiwe cyane avuye guhiga. Ageze mu rugo, yumvise ukuntu ibyokurya Yakobo yari atetse byahumuraga cyane, maze aramubwira ati: “Inzara iranyishe. Wampaye kuri ibyo biryo bitukura utetse.” Yakobo yaramubwiye ati: “Ndaguhaho, ariko ubanze unyemerere ko umpa umurage wawe.” Esawu yaramubwiye ati: “Umurage nta cyo umbwiye! Wutware. Icyo nishakira ni ibiryo.” Ese utekereza ko ibyo Esawu yakoze byari bikwiriye? Oya. Esawu yatanze ikintu cy’agaciro kenshi akigurana isahani y’isupu.

Igihe Isaka yari ashaje cyane, ni bwo yagombaga guha umugisha umwana w’imfura. Ariko Rebeka yafashije Yakobo wari muto aba ari we uhabwa umugisha. Esawu abimenye, yarakariye cyane murumuna we maze ashaka kumwica. Kubera ko Isaka na Rebeka bashakaga kurinda Yakobo, baramubwiye bati: “Genda ujye kwa Labani, musaza wa mama wawe, ugumeyo kugeza igihe uburakari bwa Esawu buzashirira.” Yakobo yumviye ababyeyi be maze arahunga kugira ngo Esawu atamwica.

Yehova yasezeranyije Yakobo ko azamurinda nk’uko yarinze Aburahamu na Isaka. Yakobo yatuye i Harani, ashaka umugore, abyara abana benshi kandi aba umukire cyane.

Hanyuma Yehova yabwiye Yakobo ati: “Haguruka usubire mu gihugu cyawe.” Nuko Yakobo n’umuryango we batangira urugendo rurerure basubira iwabo. Bakiri mu nzira, haje abantu babwira Yakobo bati: “Umuvandimwe wawe Esawu araje kandi ari kumwe n’abagabo 400.” Yakobo yatinyaga ko Esawu yamugirira nabi we n’umuryango we. Yasenze Yehova ati: “Ndakwinginze nkiza mukuru wanjye.” Ku munsi wakurikiyeho, Yakobo yoherereje Esawu intama nyinshi, ihene, inka, ingamiya n’indogobe.

Bigeze nijoro, igihe Yakobo yari wenyine, yabonye umumarayika. Uwo mumarayika yatangiye gukirana na we. Barakiranye bageza mu gitondo. Nubwo uwo mumarayika yababaje Yakobo, Yakobo yanze kumurekura. Uwo mumarayika yaramubwiye ati: “Ndekura ngende.” Ariko Yakobo yaramubwiye ati: “Oya, sinkurekura utampaye umugisha.”

Nyuma yaho uwo mumarayika yahaye Yakobo umugisha. Byatumye Yakobo amenya ko Yehova atari kwemera ko Esawu amugirira nabi.

Muri icyo gitondo, Yakobo yabonye Esawu aje amusanga akiri kure, ari kumwe n’abagabo 400. Yakobo yagiye imbere, maze apfukamira mukuru we inshuro zirindwi. Esawu yarirutse asanga Yakobo, aramuhobera. Abo bavandimwe bombi bararize cyane kandi bongera kubana amahoro. Utekereza ko Yehova yumvise ameze ate igihe yabonaga ukuntu Yakobo yitwaye muri icyo kibazo?

Nyuma yaho Esawu yatashye iwe, Yakobo na we akomeza urugendo. Yakobo yari afite abahungu 12. Abo bahungu ni Rubeni, Simeyoni, Lewi, Yuda, Dani, Nafutali, Gadi, Asheri, Isakari, Zabuloni, Yozefu na Benyamini. Umwe muri abo bahungu ari we Yozefu, ni we Yehova yaje gukoresha kugira ngo akize abantu be. Ese uzi uko yamukoresheje? Reka tubirebe.