Дьиҥнээх итэҕэли хайдах булуохха сөбүй?

1. Дьиҥнээх итэҕэл биир эрэ баар дуу, эбэтэр хас да баар дуу?

Иисус биир эрэ дьиҥнээх итэҕэли олохтообута. Дьиҥнээх итэҕэли бараммат олоххо тириэрдэр суолу кытта тэҥниэххэ сөп. Иисус ол суолу аҕыйах эрэ киһи булар диэбитэ (Матфей 7:14). Таҥара кини Тылыгар, Биибилийэҕэ, эрэ олоҕурар сүгүрүйүүнү ылынар. Таҥара дьиҥнээх сулууспалааччыларын биир итэҕэл түмэр. (Иоанн 4:23, 24; 14:6; Эфесяннарга 4:4, 5 ааҕыҥ.)

Видеоролигы көрүҥ «Таҥара итэҕэллэри барыларын биһириир дуо?»

2. Иисус сымыйа христианнар тустарынан туох диэбитэй?

Иисус сымыйа пророктар кини үөрэҕэр тосту уларыйыылары киллэриэхтэрэ диэн сэрэппитэ. Кинилэри дьиҥнээх христианнартан араарарга сороҕор уустук буолар. Тоҕо диэтэххэ кинилэр бэйэлэрин Иисус батыһааччыларынабыт дэнэллэр уонна сиэркэптэрин христианскай диэн ааттыыллар. Ол эрээри кимин-ханныгын өйдүүр кыаллыан сөп. Хайдах? Дьиҥнээх эрэ итэҕэл үчүгэй аһы аҕалар — христианскай дьыалалары уонна хаачыстыбалары. (Матфей 7:13—23 ааҕыҥ.)

3. Таҥара дьиҥнээх сулууспалааччыларын хайдах билиэххэ сөбүй?

Туох уратылаах буолалларын өйдүүргэ биэс бэлиэлэри көрүөххэйиҥ.

• Дьиҥнээх христианнар Биибилийэ Таҥара Тыла диэн итэҕэйэллэр. Кинилэр Биибилийэ үөрэхтэрин тутуһан олоро сатыыллар. Итинэн дьиҥнээх итэҕэл дьон үөрэхтэригэр уонна санааларыгар олоҕурар итэҕэллэртэн барыларыттан тосту уратылаах буолар (Матфей 15:7—9). Дьиҥнээх христианнар тыллара дьыалаларын кытта арахсыспат. (Иоанн 17:17; 2 Тимофейга 3:16, 17 ааҕыҥ.)



• Христос дьиҥнээх батыһааччылара Иегова диэн Таҥара аатын айхаллыыллар. Иисус дьону кытта кэпсэтэригэр Таҥара аатын мэлдьи туттара. Кини оннук гынан Аҕатын аатын айхаллыыра. Кини Таҥара туһунан дьоҥҥо кэпсиир этэ уонна кинилэри Таҥара аата сырдыырын туһугар үҥэргэ үөрэппитэ (Матфей 6:9). Эһиги куораккытыгар Таҥара аатын туһунан ким кэпсиирий? (Иоанн 17:26; Римляннарга 10:13, 14 ааҕыҥ.)

• Дьиҥнээх христианнар Таҥара Саарыстыбатын туһунан үтүө сураҕы тарҕаталлар. Таҥара Саарыстыбатын туһунан үтүө сураҕы кэпсииргэ анаан Иегова Иисуһу ыыппыта. Киһи-аймах кыһалҕаларын Саарыстыба эрэ быһаарар кыахтаах. Иисус ол туһунан олоҕун устата тиһэх күнүгэр диэри кэпсээбитэ (Лука 4:43; 8:1; 23:42, 43). Кини бэйэтин батыһааччылара эмиэ кини курдук гыныахтара диэн эппитэ. Таҥара Саарыстыбатын туһунан ханнык итэҕэллэр дьоҥҥо кэлэн кэпсииллэрий? (Матфей 24:14 ааҕыҥ.)

• Иисус батыһааччылара бу куһаҕан аан дойдуга туох да сыһыаннара суох. Кинилэри политикаҕа уонна дьон уун-утары харсыһыыларыгар кыттыспаттарынан билиэххэ сөп (Иоанн 17:16; 18:36). Ону таһынан кинилэр сиэр-майгы өттүнэн ыраастарынан уонна бу аан дойдуга тарҕаммыт содур быһыыга итиэннэ куһаҕан дьаллыктарга сыстыбаттарынан ураты буолаллар. (Иаков 4:4 ааҕыҥ.)

• Дьиҥнээх христианнар ортолоругар бырааттыы таптал баар. Таҥара Тыла кинилэри бар дьону барытын омугунан араарбакка ытыктыырга үөрэтэр. Сымыйа итэҕэллэр үксүгэр сэриилэри өйүүллэр уонна өрө турууларга кыттыһаллар, оттон дьиҥнээх христианнар оннук гынартан аккаастаналлар (Михей 4:1—3). Ол үрдүнэн кинилэр дьоҥҥо көмөлөһөөрү уонна кинилэри уоскутаары бириэмэлэрин итиэннэ үптэрин харыһыйбакка барыыллар. (Иоанн 13:34, 35; 1 Иоанн 4:20 ааҕыҥ.)

4. Дьиҥнээх итэҕэли хайдах билиэххэ сөбүй?

Ханнык итэҕэл үөрэҕэ барыта Таҥара Тылыгар олоҕурарый, Таҥара аатын айхаллыырый уонна Таҥара Саарыстыбата эрэ дьон кыһалҕатын быһаарыа диэн кэпсиирий? Таҥараҕа итэҕэйээччилэртэн бырааттыы тапталы ким көрдөрөрүй уонна сэриилэргэ кыттыспатый? Эһиги санааҕытыгар бу этиллибиккэ барытыгар ханнык итэҕэл сөп түбэһэрий? (1 Иоанн 3:10—12 ааҕыҥ.)