Таҥара тэрилтэтэ тоҕо нааданый?

1. Таҥара былыр Израиль норуотун туохха анаан тэрийбитэй?

Авраам патриарх ыччатыттан Таҥара норуоту үөскэппитэ уонна сокуоннары биэрбитэ. Кини бу норуоту «Израиль» диэн ааттаабыта, итиэннэ дьиҥнээх сүгүрүйүүнү көмүскүүргэ уонна кини тылын харыстыырга соруйбута (Саалтыыр 147:8, 9). Ол көмөтүнэн бары норуоттартан дьоннор Таҥараҕа кэлэр кыахтаммыттара. (Айыллыы 22:18 ааҕыҥ.)

Таҥара Израиль норуотун бэйэтигэр туоһу гынаары талбыта. Былыргы Израиль историята Таҥара сокуоннарын тутуһан олоруу муударай буоларын илэ чахчы көрдөрбүтэ (Саалтыыр 110:9, 10). Израиль норуотун көрөн атын норуоттар эмиэ дьиҥнээх Таҥараны итэҕэйэр кыахтаммыттара. (Исаия 43:10, 12a, СД ааҕыҥ.)

2. Таҥара дьиҥнээх христианнар түмсүүлэрин тоҕо тэрийбитэй?

Кэмниэ-кэнэҕэс Израиль норуота Таҥара биһирэбилин сүтэрбитэ. Иегова ол норуоту туораппыта уонна христианнар түмсүүлэрин тэрийбитэ (Матфей 21:43; 23:37, 38). Өскөтүн урут Иегова туоһутунан Израиль норуота буолар эбит буоллаҕына, билигин дьиҥнээх христианнар буолаллар. (Апостоллар 15:14, 17 ааҕыҥ.)

Иисус бэйэтин батыһааччыларыгар үтүө сураҕы тарҕатарга уонна бары норуоттарга үөрэнээччилэри бэлэмнииргэ соруйбута (Матфей 10:7, 11; 24:14; 28:19, 20). Билиҥҥи кэмҥэ бу аан дойду урусхалланаары турдаҕына, үтүө сураҕы тарҕатар үлэ хаһааҥҥытааҕар да күүскэ ыытыллар. Иегова аан маҥнайгынан киһи-аймах историятыгар бары норуоттартан мөлүйүөнүнэн дьону дьиҥнээх сүгүрүйүүгэ түмпүтэ (Арыллыы 7:9, 10). Дьиҥнээх христианнар бэйэ-бэйэлэрин өйөөрү уонна бөҕөргөтөөрү биир тэрилтэҕэ хомуллубуттара. Биибилийэни биир тэҥ программанан аан дойду үрдүнэн үөрэтэллэр. (Еврейдэргэ 10:24, 25 ааҕыҥ.)

3. Иегова Туоһуларын аныгы историята хайдах саҕаламмытай?

1870-с сыллардаахха Биибилийэни чинчийэр кыра бөлөх тэриллибитэ. Бу бөлөх умнулла сылдьыбыт Биибилийэ күндү кырдьыктарын кыралаан бииргэ түмэн саҕалаабыта. Кинилэр Саарыстыба туһунан кэпсииргэ анаан Иисус христианнар түмсүүлэрин тэрийбитин билэр этилэр. Ол иһин аан дойду үрдүнэн үтүө сураҕы тарҕатан саҕалаабыттара. Кинилэр 1931 сыллаахха Иегова Туоһулара диэн ааты ылыммыттара. (Апостоллар 1:8; 2:1, 4; 5:42 ааҕыҥ.)

4. Иегова Туоһулара хайдах тэрээһиннээхтэрий?

Бастакы үйэҕэ араас дойдуларга христианнар Иисуһу түмсүү Баһылыгынан билинэллэрэ. Түмсүүлэр бары салайар сэбиэккэ бас бэринэр этилэр (Апостоллар 16:4, 5). Ол курдук билигин Иегова Туоһуларыгар уопуттаах түмсүү аҕа баһылыктарыттан турар Салайар сэбиэт эмиэ баар. Салайар сэбиэт Иегова Туоһуларын филиалларын салайар. Онно Биибилийэни үөрэтэр литератураны 1 000-тан тахса тылга тылбаастыыллар уонна бэчээттииллэр. Ол көмөтүнэн Салайар сэбиэт аан дойду үрдүнэн 120 000-тан тахса түмсүүлэргэ баар христианнарга духуобунай үөрэтиини биэрэр кыахтаах. Хас биирдии түмсүүгэ духуобунай өттүнэн сиппит эр дьоннор түмсүү аҕа баһылыктарынан сулууспалыыллар. Кинилэр түмсүү атын чилиэннэрин туһугар кыһаллаллар. (1 Петр 5:2, 3 ааҕыҥ.)

Иегова Туоһулара үтүө сураҕы тарҕатаары уонна үөрэнээччилэри бэлэмнээри биир тэрилтэҕэ түмүллүбүттэр. Биһиги апостоллар холобурдарын батыһан дьиэттэн дьиэҕэ сылдьан үтүө сураҕы кэпсиибит (Апостоллар 20:20). Биһиги кырдьыгы билиэн баҕалаахтары барыларын Биибилийэни үөрэтэргэ ыҥырабыт. Ол эрээри Иегова Туоһулара аҥардас тэрилтэ эрэ буолбатах. Биһиги таптыыр Аҕалаах иллээх биир дьиэ кэргэн буолабыт. Биһиги бэйэ-бэйэлэрин туһугар кыһаллар убайдар уонна эдьиийдэр буолабыт (2 Фессалоникиецтарга 1:3). Иегова сулууспалааччылара Таҥара көҥүлүн толороору уонна атыттарга көмөлөһөөрү тэриллибит буоланнар, саамай дьоллоох дьиэ кэргэн буолаллар. (Саалтыыр 32:12; Апостоллар 20:35 ааҕыҥ.)