Таҥара куһаҕаны уонна эрэйи тоҕо көҥүллүүрүй?

1. Куһаҕан хайдах баар буолбутай?

Сатана бастакы сымыйаны этиэҕиттэн ыла сиргэ куһаҕан баар буолбута. Сатана бастаан эҥкилэ суох аанньал этэ, ол эрээри «кини кырдьыкка тирэҕирбэтэҕэ» (Иоанн 8:44). Кини барытын айбыт Айааччыга буолбакка, киниэхэ Таҥараҕа курдук сүгүрүйэллэрин баҕарбыта. Сатана бастакы дьахтары Еваны албыннаабыта. Ева ол тыллары итэҕэйбитэ уонна Таҥараны буолбакка, кини эппитин истэр буолбута. Адам Ева диэки буолбута. Адам быһаарыныыта эрэйгэ уонна өлүүгэ тиэрдибитэ. (Айыллыы 3:1—6, 19 ааҕыҥ.)

Сатана Еваны Таҥара көҥүлүн кэһэргэ итэҕэтэн Таҥара былааһын утары өрө турбута. Дьон үгүс өттө Сатана диэки буолбуттара уонна Таҥараны Баһылык быһыытынан туораппыттара. Онон Сатана «бу дойду баһылыга буолбута». (Иоанн 14:30; 1 Иоанн 5:19 ааҕыҥ.)

2. Таҥара айбыта итэҕэстээх этэ дуо?

Таҥара оҥорбута барыта эҥкилэ суох. Ол иһин маҥнай дьоннор уонна аанньаллар Таҥараҕа толору истигэн буолар кыахтаах этилэр (Второзаконие 32:4, 5). Ол эрээри Таҥара биһиги араас түбэлтэлэргэ бэйэбит быһаарынарбытыгар көҥүл биэрбитэ. Бу көҥүл киниэхэ тапталтан истигэн буоларбытыгар кыах биэрэр. (Иаков 1:13—15; 1 Иоанн 5:3 ааҕыҥ.)

3. Таҥара тоҕо баччааҥҥы диэри куһаҕаны көҥүллүүрүй?

Кылгас кэмҥэ Иегова бэйэтин салайыытын утары өрө турууну көҥүллээбитэ. Тоҕо буолуой? Таҥарата суох салайа сатааһын дьоҥҥо дьолу аҕалбатын көрдөрөөрү (Экклезиаст 7:29; 8:9). Ону киһи-аймах 6 000 сыл усталаах историята бигэргэппитэ. Биир да салайааччы сэриини, буруйу оҥорууну, кырдьыга суох быһыыны уонна ыарыыны кыайан тохтоппотоҕо. (Иеремия 10:23a; Римляннарга 9:17 ааҕыҥ.)

Киһи салайыыта баттыыр, оттон Таҥара салайыыта дьолу аҕалар (Исаия 48:17, 18). Иегова сотору кэминэн киһи салайыытын барытын тохтотуоҕа. Таҥараны Баһылыгынан талбыт эрэ дьоннор сиргэ олоруохтара (Исаия 11:9). (Арыллыы 11:15 ааҕыҥ.)

Видеоролигы көрүҥ «Таҥара дьон эрэйдэнэрин тоҕо көҥүллүүрүй?»

4. Таҥара тулуура ханнык кыаҕы биэрбитэй?

Сатана биир да киһи Иеговаҕа үтүө санааттан уонна тапталтан сулууспалаабат диэбитэ. Эһиги бу албын этиигэ хардарыаххытын баҕарыа этигит дуо? Эһиэхэ оннук кыах баар! Таҥара тулуурун көмөтүнэн хас биирдиибит ким салайыытын таларын көрдөрүөн сөп: дьон салайыытын эбэтэр Таҥара салайыытын. Биһиги тугу талбыппытын олохпутунан көрдөрөбүт. (2 Петр 3:9; Арыллыы 12:10 ааҕыҥ.)

5. Таҥараны бэйэбит Баһылыкпытынан хайдах талыахпытын сөбүй?

Таҥараны бэйэбит Баһылыкпытынан таларбытыгар дьиҥнээх итэҕэли булуохпутун наада. Ол итэҕэл Кини Тылыгар, Биибилийэҕэ, олоҕуруохтаах уонна бэйэбит Биибилийэ үөрэхтэрин тутуһан олоруохтаахпыт (Иоанн 4:23). Сатана салайыытын туоратарга политикаттан тэйэ туттуохтаахпыт уонна сэриигэ кыттыһыа суохтаахпыт. Иисус бэйэтэ оннук быһыыланар этэ. (Иоанн 17:14 ааҕыҥ.)

Сатана бэйэтин былааһын туһанан, кэрээнэ суох буолууну уонна да атын содур быһыыны үчүгэй курдук көрдөрөр. Биһиги оннук олоҕунан олорбот буоллахпытына сорох доҕотторбут эбэтэр аймахтарбыт биһигини күлүү-элэк оҥостуохтарын сөп, уонна оннооҕор Биибилийэни үөрэтэрбитигэр мэһэйдиэхтэрин сөп (1 Петр 4:3, 4). Ол иһин биһиги кимниин доҕордоһор ордук буоларын талыахпытын наада. Доҕоттору Таҥараны таптыыр дьоннор истэриттэн талыахпыт дуо? Кини муударай сокуоннарыгар бас бэриниэхпит дуо? Өскөтүн биһиги сөптөөҕү таллахпытына, Сатана сымыйаччы буоларын уонна дьоннор ыарахан да балаһыанньаҕа Таҥараҕа эрэллээх хаалыахтарын сөбүн дакаастыахпыт. (1 Коринфяннарга 6:9, 10; 15:33 ааҕыҥ.)

Таҥара дьоҥҥо таптала туох баар куһаҕан барыта уонна эрэйдэнии булгуччу суох буолуо диэн мэктиэлиир. Таҥара ыйбыт суолунан олоруу саамай ордук буолар диэн итэҕэйээччилэр ырай сиригэр үйэлэр тухары олоруохтара. (Иоанн 3:16 ааҕыҥ.)