Néndoo ge 10

Kularaje ge to kenji kem Allah’d

Ta ribba enjije do néje’d ge majal kem Allah’d wa. (1)

Turaje kuji néje bula ge majal woji do sang-nan lo kaiya’d. (2)

See ta ribba Chrétien enji do ta ngom’d. (3) do kos mbaré lar’d. (3) do bbogo’d. (3) do nèra kerm-kerm’d. (4) do ra mbeen’d. (5) do kai kido k’aou reb-reb lem wa. (6)

See a raje bann bba a korje ne ro si dann kularaje’d ge majel neelé wa. (7)

1. Ngannjékishije le Allah ndigi né ge maji. Nê deen d’as kos né ge majal ngeren’d rang to. (Psaumes 97:10) Yee neelé méee pana kularaje ge to kenji kem Allah’d lé kem mbat. See néraje ge nanje ge majel lé to rije wa.

2. Modkaiya: Too qe nan ketté bba taa nan bei, sang ngao esé denné le deou, too qe da, ra nékob, too qe dingam mari esé denné mari lé to kaiyaje ge kedërë yaan kem Allah’d. (Lévije 18:6; Romainje 1:​26, 27; 1 Corinthienje 6:​9, 10) Boo lee deouje joo d’ ishi nan’d lal taa nan ndaà, maji kàr dee tin-nan esé d’aou taa-nan non Njékonbbeeje’d.​—Hébreuje 13:4.

3. Ngom, kos mbaré lar, bbogo: Allah Jéhovah lé as ngom el. (Tite 1:⁠2) Mba kari ta kemee ndaà maji kari os ta ngom reou ge rang. (Gosota 6:​16-19; Colossienje 3:​9, 10) Kos mbaré larje lai lé kemkein to kenneng. To ge bèe bba Chrétienje d’os mbaré lar el, to ge qe Tombolaje, ngod le kúndaje esé bana-bana el lem to. (Ephésienje 5:​3-5) Chrétienje bbogo el lem to. Né ge deen ger to ge deou bbogo’d-bbogo lé deen ndogo el lem, deen ndima né lal deji nja el lem to.​—Teen Raga 20:15; Ephésienje 4:⁠28.

4. Ong, qe néra kerm-kerm: Boo lee kwaro ngang do ong’d goto ndaà, ong a teen do néra kerm-kerm’d. (Ginn-né 4:​5-8) Deou ge njé ra nè kerm-kerm lé a to njeboakura le Allah el. (Psaumes 11:5; Gosota 22:​24, 25) Maji dal ban el lem, ra majel qe njé ra majel se si el lem to.​—Gosota 24:29; Romainje 12:​17-21.

5. K’illa yoo do deou’d esé ra mbeen: Deouje ge nanje deji tög ndilje bba mba kaji ne njeronkonje. Deen ge nanje d’illa ne tuji do njebanje’d le dee kàr d’oso moei esé d’wei ne lem to. Satan bba iya rea gir néraje’d ge majel nee lai. Chrétienje d’as k’unda ro dee néraje’d nee pai el to. (Godndu 18:​9-13) Lee d’illa yoo do si’d kârâ kuman ngem ro ge togero’d lé to shi ro Jéhovah’d deb.​—Gosota 18:⁠10.

6. Kai kido k’aou reb-reb: Kai vin séen, esé bière qe ges kidoje ge rang ge mi lé majel el. (Psaumes 104:15; 1 Timothée 5:23) Nê kai kàree al do léee esé karee rai lé majel kem Allah’d. (1 Corinthienje 5:​11-13; 1 Timothée 3:8) Kaiee ge yaan lé, banelle a tuji laphia le si lem a tuji mee kei le si lem to. Tobei a ra si kàr si yänje ro si kalang àrje nékerje ge nanje.​—⁠Gosota 23:​20, 21, 29-35.

7. Deen ge d’aou ra néje ge majel kem Allah’d lé “d’a killa gol dee Bbeekon’g le Allah pai goto.” (Galateje 5:​19-21) Boo lee togero’d sein ndigije Allah lem, boo lee sein ndigije taaje kemee ndaà, néraje ge neelé asje kyänje. (1 Jean 5:⁠3) Ndooje loo mbat né ge majel kem Allah’d. (Romainje 12:⁠9) Orje kura qe deouje ge kula ra dee taa kem Allah. (Gosota 13:20) Sein asje kingaje lasenan ro Chrétienje ge kem dee er. (Jacques 5:14) Goo néje’d nee lai lé sangje lasenan le Allah mbol do tamaji.​—Philippienje 4:​6, 7, 13.

[Foto ge to mee mbeteʼg 20, 21]

Kai kido k’aou reb-reb, bbogo, kos mbaré lar lem néra kerm-kerm lé Allah ndigi el