Deouje Ge To Kuramar Allah Lé Ra Né Ge Maji

Kuramari ge i ndigi ta lea qe i ted kagee lé, i sang reou mba tana sea. Bible pana: “Njéshiqenean lé to njémeemaji qe njéra nédannasur.” (Pakosje 25:8). Mba to kuramar Allah lé, maji kari to njemeemaji lem njeranédannasur lem to. Bible pana: “Telje ro si ndajije ne kem Allah raje to ge ngannee ge yeen unda dee dann kemeeˈg. Osje ro si bbad ge ketté-ketté do meenojiˈg.” (Njé ge Éphèse 5:1, 2). Goso ge nanje kan ra né bba nee:

La se deouje ge rang. “Maji kar ci jˈwaje noji qe deouje lai.”​—Njé ge Galatie 6:10.

Ra kula qe togi. “Yeen ge to ge njebbogo ketté lé maji karee to ge njebbogo el nga; nê maji karee uru kula ge majiˈg mbidi ra qe jia ya.”​—Njé ge Éphèse 4:28.

Daro ge ar ngat qe tar kenji ge ar ngat to. “Ar cije nˈtogoje néje ge minan ge qe ria-ria ge tian daro ciˈg qe ndil ciˈg lem, ar ci mˈbbelje Allah mba kar meenda le ci maji or njorong lem to.”​—2 Njé ge Corinthe 7:1.

Ndigi njémeekeije lei qe tedkag dee to. “Maji kar nana kârâ mbuna siˈg unda denné lea dann kemeeˈg to ge yeen ra qe darea-yeen nja bèe lem, denné kârâ maji karee tedkag ngabeeje to. Ngannje, illaje ngonnkoji do njékoji sijeˈg.”​—Njé ge Éphèse 5:33–6:1.

Kwa noji qe deouje. “Ar ci jˈundaje nan dann kem nanˈd mbata meenoji in ro Allahˈg ya.”​—1 Jean 4:7.

Killa koji do godnduˈg le bbee. “Maji kar deouje kara-kara lai dˈoso kul non njékonbbeejeˈg ya . . . Nana kârâ areeje né ge woji dea ya: deou ge to njetaa négedbbee ndaà areeje négedbbee.”​—Njé ge Rome 13:1, 7.