See A Ndoo Né Bann Bba Mba Ger Né Allah Wa

Kari ndoo né ger Jehova ndaà tura Bible. Leou ba ketté par-par, Allah or deouje ar dee ndang takenjije lea. Taje ge ndang neelé bbaree Bible. Bbogenè, jeen ndoo ger Allah mbol do Bible. Bible lé ta le Jehova bba to meeˈg. To mbér le Jehova, to ge bee bba bbaree ne ta le Allah. Jeen jˈas kˈundaje mee ci do taˈg ge Bible pa mbata Jehova pa ta ngom ndan el. “Allah a koo loo mba pel ta doˈg el.” (Hébreuje 6:18). Ta le Allah lé kankemta to kenneng.​—Jean 17:17.

Bible lé to nékarnoji le Allah ge ged-ged dann mareeje ge yeen ar ci. To asena ge mbeté ge bau ngannje ge ndigi dee ula ne ar dee bèe. Bible ula ci ta ge woji do ndukunn le Allah ge pana: do nang nee a tel to Paradis, loo ge maji dum. Yee ula ci néje ge Allah ra ketté leou, néje ge aou ra bacinè, bba néje ge yeen a ra ndo ge rang bei mba la ne qe nganneeje ge njékillakojije. Yee woji ci reou gol néje ge aou tôo ro ci lem see bann bba jˈa kingaje rolel lem to.​—2 Timothée 3:16, 17.

Témoinje le Jehova lé to kuramar Allah. Dˈa la sei kar kemi inja do tar ge Bible pa. I ula témoinje to ge i ndigi ndoo Bible. I a kˈôga dee lar el (Matthieu 10:8). Tobei i as kaou loo-kwadonanˈg le dee lem to. Dˈaou dwadonan looje ge bbar dee “Salle du Royaume”. Boo lee i aou loo-kwadonanˈg le dee ndaà, i a ger Allah kalang lem to.

I as ger Allah mbol do néje ge yeen ra lem to. Bible pana: “Allah unda dara qe nang nee to.” (Ginn-Néje 1:1). Loo ge Jehova unda “dara” lé, yeen ra kàr to. See ri bba néje nee dˈaou toji ci woji do Allah wa. Néje neelé toji ci to ge Jehova lé to nje singamong ge bôo yaan. Yeen ya kara ba askem ra né ge to bbel yaan to ge kàr bèe. Tobei néje nee toji ci to ge Jehova lé aou qe kemkàr yaan. Bèe bba yeen ra kàr aree os ar ci lem, aree ndogo do ciˈg jol-jol lem, ar peree wei misi ndo kara el lem to.

Néje lai ge Jehova unda dee lé toji ci to ge yeen ndigi ci. Enji do kand kagje ge qe gel dee-gel dee lai do nang nee oo. Bbo lé Jehova ndigi ndaà a kar ci kand kag kara ba kiao esé a kar ci el to. Nê yeen ar ci kand-kagje bula qe ridee-ridee. Kand kagje neelé to bbed bbed. Bindee, bôo le dee, bbal dee, lel le dee tana el. Néje neelé toji ci to ge Jehova lé to Allah ge ndigi deouje tobei to njekwanoji pë-pë lem, njegosonéger ge bôo lem bba, to njemeemaji lem to.​—Pakosje 104:24.