17 Buluka penepo, Yoswa apanga ana a Zuze, akuti ndi dzindza ya Efraimu na ya Manase: “Imwe ndimwe azinji, pontho muli na mphambvu kakamwe. Nee munadzapaswa khundu ibodzi basi ya dziko,+ 18 mbwenye cisa ca mapiri cinadzakhalambo canu.+ Maseze cisa ceneci ndi nsitu, imwe munadzagwanda miti ya nsitu unoyu, mbukhala madire a cisa canu. Thangwi imwe munadzathamangisa Akanani, maseze iwo ndi amphambvu, pontho ali na ngolo za nkhondo zakuti ziri na masikeya a utale.”*+