11 Pontho, Ayuda onsene akuti akhali ku Moabhe, ku Amoni, ku Edhomi na mʼmadziko anango onsene, abvambo kuti mambo wa ku Bhabhilonya akhadasiya anthu anango ku Yuda, pontho akhadasankhula Jedhaliya mwana wa Aikamu ndzukulu wa Safani toera akhale ntsogoleri wawo. 12 Natenepa, Ayuda onsene atoma kubwerera buluka mu mbuto zidabalaliswa iwo, mbapita mu dziko ya Yuda. Iwo aenda kuna Jedhaliya ku Mispa, pontho iwo agumanya vinyu na misapo ya mʼmalimwe, iwo agumanya pinthu pyenepi pizinji kakamwe.