Numero
23 Penepo Bhalamu apanga Bhalaki: “Sasanya pano maguwa+ manomwe, mbundikhunganyira ngʼombe zinomwe na mabira manomwe.” 2 Penepo pene Bhalaki acita pidalonga Bhalamu. Bhalaki na Bhalamu apereka ngʼombe na bira pa guwa ya ntsembe+ ibodzi na ibodzi. 3 Buluka penepo, Bhalamu apanga Bhalaki: “Sala pano dhuzi na ntsembe yako yakupiswa, ine ndiri kuenda kule. Panango Yahova analonga na ine. Ndinakudziwisa pyonsene pinafuna kundipanga iye.” Natenepa iye akwira pa nthunda yakuti nee ikhali na miti.
4 Penepo Mulungu aonekera kuna Bhalamu,+ iye apanga Mulungu: “Ine ndasasanya maguwa manomwe mbandipereka ntsembe ya ngʼombe na ya bira pa guwa ibodzi na ibodzi.” 5 Yahova aikha mafalace pamulomo wa Bhalamu,+ mbampanga: “Bwerera kuna Bhalaki, ipi ndipyo pinafunika iwe kumpanga.” 6 Natenepa iye abwerera mbaona kuti Bhalaki na akulu onsene a ku Moabhe akhali dhuzi na ntsembe yace yakupiswa. 7 Penepo iye alonga mafala awa:+
“Bhalaki mambo wa ku Moabhe andicemera buluka ku Aramu,+
Andicemeresa buluka ku mapiri a kumabulukiro a dzuwa:
‘Bwera undipasire dzedze* Yakobe.
Inde, bwera usandike Izraeli.’+
8 Ndinapasa tani dzedze anthu adakhonda kupaswa dzedze na Mulungu?
Ndinasandika tani anthu adakhonda kusandikwa+ na Yahova?
9 Ine ndiri kuaona na padzulu pa miyala,
Ndiri kuaona na padzulu pa mapiri.
10 Mbani anakwanisa kulengesa dzindza ya Yakobe+ yakuti ndi yakunjipa ninga pfumbi ya mataka?
Peno kulengesa khundu yacinai ya Aizraeli?
Mbandife ninga anthu anewa akulungama,
Kumala kwa umaso wanga mbakukhale ninga kwawo.”
11 Penepo Bhalaki apanga Bhalamu: “Ninji pidandicitira iwe? Ine ndakubweresa kuno toera upase dzedze anyamalwa anga, mbwenye basi ene iwe waapasa+ nkhombo.” 12 Iye atawira: “Kodi nee ndisafunika kulonga basi ene pire pidaikha Yahova pamulomo+ panga?”
13 Bhalaki ampanga: “Ndaphata miyendo, tende pabodzi pa mbuto inango yakuti unakwanisa kuaona na penepo. Unaona khundu ibodzi basi ya mbumba ineyi; nee unaona yonsene. Apase dzedze na penepo.”+ 14 Bhalaki ankwata mbaenda naye ku Zofimu, pa ntsonga ya Phiri ya Pisga.+ Iye asasanya maguwa manomwe mbapereka ntsembe ya ngʼombe na ya bira pa guwa+ ibodzi na ibodzi. 15 Penepo Bhalamu apanga Bhalaki: “Sala pano dhuzi na ntsembe yako yakupiswa, ine ndiri kuenda kule kalonga na Mulungu.” 16 Yahova alonga na Bhalamu mbaikha mafala awa pamulomo+ pace: “Bwerera kuna Bhalaki, ipi ndipyo pinafunika iwe kumpanga.” 17 Iye abwerera kuna Bhalaki mbaona kuti iye akhadikhira dhuzi na ntsembe yace yakupiswa, pontho akulu a ku Moabhe akhali pabodzi na iye. Bhalaki ambvundza: “Ninji pidalonga Yahova?” 18 Penepo Bhalamu alonga mafala awa:+
“Lamuka Bhalaki, bvesera.
Ndibvesere, iwe mwana wa Zipori.
19 Mulungu si munthu tayu toera alonge uthambi,+
Kodi iye angalonga cinthu, nee asacicita?
Iye angalonga, kodi nee asacita pidalonga+ iye?
20 Ona, ine ndabwereswa kuno toera kupasa nkhombo;
Iye aapasa nkhombo,+ natenepa nee ndinakwanisa kucinja pyenepi.+
21 Iye nkhabe kutawirisa mphambvu zakupasa dzedze kuna Yakobe,
Pontho iye nkhabe kutawirisa kuti Izraeli aoneswe nyatwa.*
Yahova Mulungu wace ali na iwo,+
Iye asakuzwa ninga mambo pakati pawo.
22 Mulungu ali kuabweresa buluka ku Ejitu.+
Iye ndi ninga nyanga za nyati* kuna iwo.+
Pa ndzidzi uno anthu anakwanisa kulonga kuna Yakobe na Izraeli:
‘Onani pinthu pidacita Mulungu!’
24 Ineyi ndi mbumba yakuti inadzalamuka ninga nkhalamu,
Pontho ninga nkhalamu, mbumba ineyi inadzalamuka.+
Iyo nkhabe kudzagona mbidzati kudya cinyama cidaluma iyo
Mbimwa ciropa ca ale adaphiwa.”
25 Penepo Bhalaki apanga Bhalamu: “Khala wacimwana kuapasa dzedze, nee usafunikambo kuapasa nkhombo.” 26 Bhalamu apanga Bhalaki: “Kodi ine nee ndakupanga kuti ‘ndinadzacita pinthu pyonsene pinafuna kulonga+ Yahova’?”
27 Bhalaki apanga Bhalamu: “Ndaphata miyendo, tende pontho ku mbuto inango. Panango kweneko+ Mulungu wandimomwene anaona kuti mphyadidi undipasire dzedze mbumba ineyi.” 28 Penepo Bhalaki akwata Bhalamu mbaenda naye pa ntsonga ya Phiri ya Peori, pakuti na penepo mbadakwanisa kuona ku Yesimoni.*+ 29 Bhalamu apanga Bhalaki: “Sasanya pano maguwa manomwe, mbundikhunganyira+ ngʼombe zinomwe na mabira manomwe.” 30 Natenepa Bhalaki acita ninga mudapangwa iye na Bhalamu, mbapereka ngʼombe na bira pa guwa ya ntsembe ibodzi na ibodzi.