Samweli Wakutoma
14 Ntsiku inango, Yonatani+ mwana wa Sauli apanga ntumiki wace akhanʼthukulira pida pyace pya nkhondo kuti: “Tende ku misasa ya anyankhondo a Afilisti yakuti iri kukhundu inango.” Mbwenye iye nee adziwisa babace. 2 Sauli akhali dhuzi na ku Jibheya,+ pantsi pamuti wa romaa ku Migironi, pontho iye akhali pabodzi na amuna cifupi na 600.+ 3 (Aiya ndiye akhabvala efodhi.+ Iye akhali mwana wa Aitubhe,+ mʼbale wace Ikabhodhi,+ mwana wa Fineya,+ mwana wa Eli,+ nyantsembe wa Yahova ku Silo.)+ Mbwenye anyankhondo nee akhadziwa kuti Yonatani akhadabuluka. 4 Panjira ikhafuna kupita na Yonatani toera kuenda ku misasa ya Afilisti, pakhali na mwala wakulandana na dzino kukhundu ibodzi, unango wakulandana na dzino kukhundu inango; ubodzi ukhacemerwa Bhozezi, unango ukhacemerwa Sene. 5 Mwala ubodzi ukhali ninga nzati, kunkwiriro kutsogolo kwa Mikimasi, unango ukhali kunterero kutsogolo kwa Jebha.+
6 Natenepa, Yonatani apanga ntumiki wace akhanʼthukulira pida pya nkhondo: “Tende ku misasa ya anthu akukhonda kusidzwa.+ Panango Yahova anatiphedza, thangwi nkhabepo cinthu cinafuna kupingiza Yahova toera kupulumusa mbumba yace na anthu azinji peno akucepa.”+ 7 Natenepa ntumiki wace unoyu ampanga: “Citani pyonsene pinafuna ntima wanu. Ndokoni konsene kunafuna imwe. Kunaenda imwe, ine ndinaendambo.” 8 Buluka penepo, Yonatani alonga: “Tende kuna amuna anewa toera iwo atione. 9 Iwo angatipanga kuti: ‘Limirani penepo mpaka ife kufika pana imwe!’ ife tinalimira mbatikhonda kuenda kuna iwo. 10 Mbwenye iwo angalonga: ‘Bwerani mudzamenyane na ife!’ ife tinaenda, thangwi ceneci ndi cidzindikiro+ cakuti Yahova anaapereka mʼmanja mwathu.”
11 Buluka penepo, uwiri wawo aenda kabulukira ku misasa ya Afilisti. Natenepa Afilisti alonga: “Onani! Ahebheri akubwera buluka mʼmadzimba akhadabisala iwo.”+ 12 Natenepa, anyankhondo a Afilisti apanga Yonatani na ntumiki wace: “Bwerani kuno, ife tinakutsukani nsolo!”+ Penepo Yonatani apanga ntumiki wace: “Nditowere, thangwi Yahova anaapereka mʼmanja mwa Izraeli.”+ 13 Yonatani akwira pa nthunda mbakakambadza, ntumiki wace akhantowera; Yonatani atoma kumenya Afilisti, mbwenye ale akhasiya iye nee kuapha, ntumiki wace akhaamalisa. 14 Ulendo wakutoma, Yonatani na ntumiki wace, apha amuna cifupi na 20 pa mbuto ingʼono.*
15 Natenepa, anyankhondo akhali mʼmisasa na ale akhali pa nthunda akhagopa kakamwe, kuphatanizambo ale adatumwa+ toera kamenyana na Izraeli. Mataka atoma kutekenyeka, pontho Mulungu acitisa kuti Afilisti agope kakamwe. 16 Anyakuonera a Sauli ku Jibheya+ wa ku Bhenjamini aona kuti uviyaviya ukhamwazika ku misasa ya anyamalwa awo.+
17 Sauli apanga anyankhondo akhali na iye kuti: “Lengesani toera muone kuti mbani adabuluka pano.” Pidalengesa iwo, aona kuti Yonatani na ntumiki wace nee akhali penepo. 18 Natenepa Sauli apanga Aiya:+ “Bweresa Bokosi ya Mulungu wandimomwene!” (Thangwi pa ndzidzi unoyu* Bokosi ya Mulungu wandimomwene ikhali na Aizraeli.) 19 Pikhalonga Sauli na nyantsembe, uviyaviya ukhathimizirika kakamwe mʼmisasa ya Afilisti. Buluka penepo, Sauli apanga nyantsembe: “Leka kucitabve pyenepi.”* 20 Sauli na anyankhondo onsene akhali na iye, agumanyikana mbaenda kunkhondo, kweneko iwo agumana Afilisti ali kuphana okha-okha na masupada, pontho uviyaviya ukhali ukulu kakamwe. 21 Pontho Ahebheri akuti akhali kukhundu ya Afilisti, mbakhala pabodzi na iwo ku misasa yawo, adzakhala kukhundu ya Aizraeli mbatsogolerwa na Sauli pabodzi na Yonatani. 22 Amuna onsene a Izraeli akuti akhadabisala+ kucisa ca mapiri ca ku Efraimu pidabva iwo kuti Afilisti athawa, iwo apitambo mu nsoka wa anyankhondo mbaatowera. 23 Natenepa, Yahova apulumusa Izraeli pa ntsiku ineyi,+ pontho nkhondo yafika mpaka ku Bheti-Aveni.+
24 Mbwenye amuna a Izraeli akhadaneta kakamwe pa ntsiku ineyi, thangwi Sauli akhadadumbira kuna iwo kuti: “Mbapaswe dzedze munthu anadya cinthu* dzuwa mbidzati kudoka, ine mbandidzati kutcunyusa anyamalwa anga!” Natenepa nkhabepo munthu adadya cinthu.+
25 Anyankhondo onsene apita mu nsitu, pontho mwenemo agumana uci pantsi. 26 Anyankhondo pidapita iwo mu nsitu, aona uci mbukadjodja, mbwenye nee mʼbodzi audya, thangwi akhagopa dumbiro idacita Sauli. 27 Mbwenye Yonatani nee akhadziwa dumbiro+ idacita babace, natenepa iye apfeka ntsonga ya ndodo yace pa khana ya uci. Pidadya iye uci unoyu, akhala pontho na mphambvu.* 28 Natenepa, mʼbodzi wa anyankhondo alonga: “Babako adumbira kuna anyankhondo mbalonga: ‘Mbapaswe dzedze munthu anadya cinthu lero!’+ Na thangwi ineyi, anyankhondo aneta kakamwe.” 29 Natenepa, Yonatani alonga: “Babanga abweresa nyatwa ikulu kakamwe kuna mbumba. Ine ndakhala pontho na mphambvu* pidadya ine uci pangʼono. 30 Lero, mbapidakhala mwadidi kakamwe anyankhondo mbadadya+ pinthu pidakwatira iwo anyamalwa awo! Afilisti mbadaphiwa kakamwe.”
31 Pa ntsiku ineyi iwo apitiriza kupha Afilisti kutomera ku Mikimasi mpaka ku Aijaloni,+ natenepa anyankhondo adzaneta kakamwe. 32 Buluka penepo, anyankhondo atoma kuthamangira pinthu pya anyamalwa adakunda iwo, mbakwata mabira na ngʼombe. Iwo apiphera pantsi mbadya nyama na ciropa cene.+ 33 Sauli apangwa kuti: “Onani! Anyankhondo akudawira Yahova thangwi akudya nyama na ciropa cene.”+ Penepo iye alonga: “Imwe mwacita pinthu mwakukhonda khulupirika. Bulumundisani mwakucimbiza mwala ukulu mubwere nawo kuno.” 34 Buluka penepo, Sauli alonga: “Ndokoni kuna anyankhondo, mbamuapanga: ‘Mʼbodzi na mʼbodzi wa imwe asafunika kubweresa ngʼombe imuna na bira toera adzaphere pamwala uyu, angamala adye. Lekani kudawira Yahova thangwi yakudya nyama na ciropa cene.’”+ Natenepa, masiku anewa iwo abweresa ngʼombe zawo zimuna mbaziphera pamwala unoyu. 35 Pontho Sauli amangira guwa Yahova.+ Ineyi ikhali guwa yakutoma idamangira iye Yahova.
36 Buluka penepo, Sauli alonga: “Tendeni tikamenyane na Afilisti masiku ano, mbatiakwatira pinthu pyawo mpaka kunja kuca. Ife tisafunika kupha anthu onsene.” Penepo anyankhondo atawira: “Citani pyonsene pinaona imwe kukhala pyadidi.” Buluka penepo, nyantsembe alonga: “Tendeni tiphembe Mulungu wandimomwene pa mbuto ino.”+ 37 Sauli abvundza Mulungu: “Ndisafunika kuenda kuna Afilisti?+ Imwe munaapereka mʼmanja mwa Izraeli?” Mbwenye pa ntsiku ineyi Mulungu nee antawira. 38 Natenepa Sauli alonga: “Bwerani kuno, imwe monsene akulu a anyankhondo, toera tione kuti mbani adacita madawo lero. 39 Ndiri kudumbira mu dzina ya Yahova, ule adapulumusa Izraeli, maseze adacita pyenepi akhale mwananga Yonatani, iye asafunika kuphiwa.” Mbwenye nee mʼbodzi adantawira. 40 Buluka penepo, iye apanga Aizraeli: “Imwe munakhala kukhundu ibodzi, ine na mwananga Yonatani tinakhalambo kukhundu inango.” Penepo iwo apanga Sauli: “Citani pyonsene pinaona imwe kukhala pyadidi.”
41 Buluka penepo, Sauli alonga kuna Yahova: “Mulungu wa Izraeli, titawireni kubulukira mwa Tumimi!”+ Penepo asankhulwa Yonatani na Sauli, mbwenye anango nee akhali na mulando. 42 Sauli alonga: “Citani pidzindikiro+ kuna ine na kuna mwananga Yonatani.” Adasankhulwa ndi Yonatani. 43 Buluka penepo, Sauli abvundza Yonatani: “Ndipange, ninji pidacita iwe?” Natenepa Yonatani ampanga: “Basi ene ndalawira pangʼono uci na ntsonga ya ndodo yanga.+ Ndiri pano! Ndiri dzololo toera kufa!”
44 Penepo Sauli alonga: “Mulungu mbanditcunyuse kakamwe ungakhonda kufa thangwi ya pyenepi Yonatani.”+ 45 Mbwenye anyankhondo apanga Sauli: “Thangwi yanji Yonatani asafunika kufa? Siye tayu adapulumusa+ Izraeli? Pyenepi nkhabe citika! Tiri kudumbira mu dzina ya Yahova, nee tsisi ibodzi ya munsolo mwace isafunika igwe pantsi, thangwi iye aphedzwa na Mulungu lero toera acite pyenepi.”+ Munjira ineyi, anthu apulumusa Yonatani.
46 Natenepa Sauli asiya kutowera Afilisti, pontho Afilisti abwerera ku dziko yawo.
47 Sauli alikhisa umambo wace mu Izraeli, pontho amenyana na anyamalwa ace onsene: Amoabhe,+ Aamoni,+ Aedhomi,+ amambo a ku Zobha+ na Afilisti;+ konsene kukhaenda iye, akhaakunda. 48 Iye amenya nkhondo mwacipapo, akunda Amaleki,+ mbapulumusa Izraeli mʼmanja mwa anyamalwa awo.
49 Ana amuna a Sauli akhali Yonatani, Isivi na Malki-Suwa.+ Pontho iye akhali na ana awiri akazi; wankulu akhacemerwa Merabhi,+ wangʼono akhacemerwa Mikale.+ 50 Nkazace Sauli akhacemerwa Ainowamu, mwana wa Akimazi. Nkulu wa anyankhondo ace akhacemerwa Abhineri,+ mwana wa Neri, mʼbale wa babace Sauli. 51 Babace Sauli akhali Kisi,+ pontho babace Abhineri akhali Neri,+ mwana wa Abhiyeli.
52 Sauli akhamenyana kakamwe na Afilisti mu ndzidzi ukhatonga iye.+ Pontho Sauli angagumana mamuna wamphambvu peno wacipapo, akhankwata mbakhala nyankhondo wace.+