Samweli Waciwiri
24 Yahova aipirwa pontho na Izraeli,+ thangwi munthu m’bodzi akakamiza Dhavidhi* mbampanga: “Ndoko kalengese anthu+ a ku Izraeli na a ku Yuda.”+ 2 Natenepa mambo apanga Yoabhe+ nkulu wa anyankhondo wakuti akhali pabodzi na iye: “Ndoko kalengese anthu* m’madzindza onsene a Izraeli kutomera ku Dhani mpaka ku Bhersebha+ toera ine ndidziwe kuti alipo angasi.” 3 Mbwenye Yoabhe apanga mambo: “Yahova Mulungu wanu, mbanjipise mbumba m’maulendo 100, pontho mbacitise kuti maso a mbuyanga mambo aone pyenepi, mphapo thangwi yanji mbuyanga mambo musafuna kucita pinthu pyenepi?”
4 Mbwenye mambo akhonda kubvera Yoabhe na akulu a anyankhondo. Natenepa Yoabhe pabodzi na akulu a anyankhondo abuluka pamaso pa mambo mbaenda kalengesa mbumba ya Izraeli.+ 5 Iwo awambuka Yordani mbamanga misasa yawo ku Aroeri,+ amangambo misasa yawo dhuzi na* nzinda wakuti uli pakati pa gowa,* pontho aenda ku dziko ya dzindza ya Gadhi, buluka penepo iwo apitiriza mpaka ku Yazeri.+ 6 Pidamala iwo, aenda ku Jiliyadhi+ na ku dziko ya Tatimu-Odhisi, pidabuluka iwo kweneko aenda mpaka ku Dhani-Jani, mbafika ku Sidhoni.+ 7 Buluka penepo iwo aenda ku mbuto yakutsidzikizika ya ku Tiro+ na m’mizinda yonsene ya Aeveu+ na ya Akanani; pakumalisa iwo afika ku Bhersebha+ mu Nejebhu+ ku dziko ya Yuda. 8 Natenepa iwo apakasa dziko yonsene mbabwerera ku Yerusalemu pidapita miyezi mipfemba na ntsiku 20. 9 Yoabhe apereka kuna mambo numero ya anthu adalengeswa. Izraeli akhali na amuna 800.000 akuti mbadakwanisa kuphata supada, pontho amuna a Yuda akhali akukwana 500.000.+
10 Mbwenye ntima wa* Dhavidhi ukhampasa mulando+ pidamala iye kulengesa mbumba. Buluka penepo Dhavidhi apanga Yahova: “Ine ndadawa+ kakamwe pidacita ine pinthu pyenepi. Ndaphata miyendo Yahova, lekererani madawo a ntumiki wanu,+ thangwi ine ndacita pinthu mwakusowa ndzeru.”+ 11 Dhavidhi pidalamuka iye namacibese, Yahova alonga na mprofeta Gadhi,+ nyakuona masomphenya wa Dhavidhi mbampanga: 12 “Ndoko kapange Dhavidhi kuti: ‘Yahova alonga: “Ndiri na pinthu pitatu, sankhula cinafuna iwe toera ine ndicite kuna iwe.”’”+ 13 Natenepa Gadhi aenda kuna Dhavidhi mbampanga: “Ninji cinafuna iwe? Pyaka pinomwe pya njala mu dziko yako?+ Kuthawa anyamalwa ako m’miyezi mitatu mu ndzidzi unakusaka iwo?+ Peno ntsiku zitatu za muliri mu dziko yako?+ Cincino nyerezera mwadidi toera undipange pinafunika ine kuenda kalonga kuna Ule adandituma.” 14 Penepo Dhavidhi apanga Gadhi: “Pyenepi pisanditsukwalisa kakamwe. Ndaphata miyendo, lekani tawirisa kuti titcunyuswe na anthu,+ mbwenye tawirisani kuti titcunyuswe na Yahova+ thangwi ntsisi zace ndi zikulu kakamwe.”+
15 Buluka penepo, Yahova abweresa muliri+ kuna Izraeli kutomera macibese mpaka pa ndzidzi udakhazikiswa, natenepa anthu 70.000 afa+ kutomera ku Dhani mpaka ku Bhersebha.+ 16 Anju pidafuthula iye nkono wace toera kupha anthu a mu Yerusalemu, Yahova atsukwala* thangwi ya muliri udabweresa iye,+ pontho iye apanga anju akhapha anthu kuti: “Pyakwana! Gwisa nkono wako.” Anju wa Yahova akhali dhuzi na mbuto yakububudira pinthu* ya Arauna+ wakuti ndi Muyebusi.+
17 Dhavidhi pidaona iye anju akhapha anthu, apanga Yahova: “Adadawa ndine, pontho adacita pinthu pyakuipa ndine; mphapo anthu* awa,+ ninji pidacita iwo? Ndaphata miyendo, tcunyusani pyanu ine na anthu a panyumba ya babanga.”+
18 Natenepa pa ntsiku ineyi Gadhi aenda kuna Dhavidhi mbampanga: “Ndoko kamangire guwa Yahova pa mbuto yakububudira pinthu* ya Arauna wakuti ndi Muyebusi.”+ 19 Dhavidhi aenda mwakubverana na pidapangwa iye na Gadhi, ninga mudapilongera Yahova. 20 Arauna pidayang’ana iye mbaona mambo na atumiki ace akubwera kuna iye, mwakukhonda dembuka Arauna abuluka, agodama pamaso pa mambo mbakotamisa nsolo wace mpaka pantsi. 21 Arauna abvundza: “Mbuyanga mambo, thangwi yanji mwabwera kuna ine ntumiki wanu?” Dhavidhi atawira: “Ndabwera kudzagula mbuto yako yakububudira pinthu.* Ndisafuna kumangira Yahova guwa toera muliri umale pakati pa mbumba.”+ 22 Mbwenye Arauna apanga Dhavidhi: “Mbuyanga mambo, nkhabe funika kugula, ikwateni pyanu, pontho perekani ntsembe pire pinaona imwe kuti ndi pyadidi.* Kwatani ng’ombe izi toera muzipereke ninga ntsembe zakupiswa, kwatanimbo cakububuda naco na goli ya ng’ombe toera mucite nkhuni. 23 Ine Arauna ndiri kupereka pinthu ipi kuna imwe mambo.” Buluka penepo Arauna apanga mambo: “Yahova Mulungu wanu mbakupaseni nkhombo.”
24 Mbwenye mambo apanga Arauna: “Nkhabe, ine ndinaigula! Nee ndinapereka ntsembe zakupiswa kuna Yahova Mulungu wanga na pinthu pidakhonda ine kugula.” Natenepa Dhavidhi akwata masiklo* 50 a parata+ mbagula mbuto yakububudira pinthu* na ng’ombe. 25 Dhavidhi amangira Yahova guwa+ pa mbuto ineyi, mbapereka ntsembe zakupiswa na ntsembe zakupereka takhuta. Buluka penepo Yahova abva kudembetera kukhacita iwo,+ mbamalisa muliri mu Izraeli.