Amambo Waciwiri
24 Mu ntsiku za Yeowakimu, Mambo Nabhukodhonozore+ wa ku Bhabhilonya abwera kudzamenyana na Yerusalemu, pontho Yeowakimu adzakhala ntumiki wace mu pyaka pitatu. Buluka penepo iye ansandukira. 2 Yahova acitisa kuti misoka ya anyakutapata ya Akaldheya,+ ya ku Sirya, ya Amoabhe na ya Aamoni iende kuna Yeowakimu. Iye apitiriza kutuma misoka ineyi toera ikafudze Yuda, mwakubverana na mafala adalonga Yahova+ kubulukira kuna atumiki ace, aprofeta. 3 Mwandimomwene, pyenepi pyacitika kuna Yuda thangwi adapitonga ndi Yahova toera kuabulusa pamaso pace+ thangwi ya madawo onsene adacita Manase,+ 4 pontho iye apha anthu akusowa mulando+ mbadzadza Yerusalemu na ciropa ca anthu akusowa mulando. Natenepa Yahova nee afuna kulekerera Yuda.+
5 Mphangwa zinango zinalonga pya umaso wa Yeowakimu na pyonsene pidacita iye, pyalembwa m’bukhu inalonga pinthu pidacitika mu ndzidzi wa amambo a ku Yuda.+ 6 Pakumalisa, Yeowakimu afa ninga pidacita ambuyace;+ pontho mwanace akhacemerwa Yeowakini adzakhala mambo pa mbuto yace.
7 Mambo wa ku Ejitu nee abulukabve mu dziko yace gopa kuikha umaso wace pangozwi, thangwi mambo wa ku Bhabhilonya akhadakwata pinthu pyonsene pya mambo wa ku Ejitu+ kutomera ku Gowa* ya Ejitu+ mpaka ku Nkulo wa Eufrate.+
8 Yeowakini+ akhali na pyaka 18 pyakubalwa pidatoma iye kutonga ninga mambo, pontho iye atonga miyezi mitatu mu Yerusalemu.+ Mai wace akhacemerwa Neusita mwana wa Elnatani wa ku Yerusalemu. 9 Iye apitiriza kucita pinthu pyakuipa pamaso pa Yahova, mwakubverana na pyonsene pidacita ambuyace. 10 Mu ndzidzi unoyu, atumiki a Mambo Nabhukodhonozore wa ku Bhabhilonya abwera kudzamenyana na Yerusalemu, pontho nzinda unoyu wazungulirwa.+ 11 Mambo Nabhukodhonozore wa ku Bhabhilonya apita mu nzinda mu ndzidzi wakuti nzinda ukhadazungulirwa na atumiki ace.
12 Yeowakini mambo wa ku Yuda, pabodzi na mai wace, atumiki ace, anthu ace a pidzo* na atsogoleri a mu umambo wace+ aperekeka kuna mambo wa ku Bhabhilonya;+ pontho mambo wa ku Bhabhilonya ankwata mbaenda naye ku ubitcu mu caka cacisere ca utongi wace.+ 13 Mwakubverana na pidalonga Yahova, iye akwata mpfuma yonsene ya n’nyumba ya Yahova na mpfuma ya n’nyumba mwa mambo,+ mbagwanda-gwanda pyombo pyonsene pya ouro pidacita mambo Salomoni pyakuti pikhali mu templo ya Yahova.+ 14 Iye aendesa ku ubitcu anthu onsene a mu Yerusalemu, anthu onsene a pidzo,*+ anyankhondo onsene a mphambvu, amesiri onsene na amesiri anaphata basa na utale;*+ onsene adaendeswa ku ubitcu akhali akukwana 10.000. Nkhabepo munthu adasiyiwa, kusiyapo atcerengi a mu dziko ineyi.+ 15 Natenepa iye akwata Yeowakini+ mbaenda naye ku ubitcu ku Bhabhilonya.+ Iye akwatambo mai wace mambo, akazace, atsogoleri a mu umambo wace na amuna akulemedzwa a mu dziko ineyi, abuluka nawo mu Yerusalemu mbaenda nawo ku ubitcu ku Bhabhilonya. 16 Mambo wa ku Bhabhilonya aendesambo ku ubitcu ku Bhabhilonya anyankhondo onsene akukwana 7.000, kuphatanizambo amesiri na amesiri anaphata basa na utale* akukwana 1.000, onsene akhali amuna amphambvu na akupfundziswa kumenya nkhondo. 17 Mambo wa ku Bhabhilonya akwata Mataniya ng’ono wace babace Yeowakini,+ mban’khazikisa ninga mambo pa mbuto ya Yeowakini, pontho iye ancinja dzina yace mbikhala Zedhekiya.+
18 Zedhekiya akhali na pyaka 21 pyakubalwa pidatoma iye kutonga ninga mambo, pontho iye atonga pyaka 11 mu Yerusalemu. Mai wace akhacemerwa Amutali+ mwana wa Yeremiya wa ku Libhina. 19 Iye apitiriza kucita pinthu pyakuipa pamaso pa Yahova, mwakubverana na pyonsene pidacita Yeowakimu.+ 20 Pinthu pyenepi pyacitika ku Yerusalemu na ku Yuda, thangwi Yahova akhadaipirwa, pontho pakumalisa iye aathamangisa pamaso pace.+ Buluka penepo, Zedhekiya asandukira mambo wa ku Bhabhilonya.+