Amambo Waciwiri

8 Elizeu apanga nkazi ule adalamusira iye mwanace muli akufa kuti:+ “Lamuka, iwe pabodzi na banja yako toera muende kakhala ninga alendo konsene kwene kunafuna imwe, thangwi Yahova alonga kuti mu dziko ino munadzaoneka njala,+ pontho njala ineyi inadzamala pyaka pinomwe.” 2 Natenepa nkazi unoyu acita pidapangwa iye na ntumiki wa Mulungu wandimomwene. Iye abuluka pabodzi na banja yace mbaenda kakhala pyaka pinomwe mu dziko ya Afilisti.+

3 Pidamala pyaka pinomwe, nkazi abwerera buluka ku dziko ya Afilisti mbaenda kaphemba mambo toera ampase nyumba yace na munda wace. 4 Mambo akhalonga na Djehazi ule akhatumikira ntumiki wa Mulungu wandimomwene, mbampanga: “Ndaphata miyendo, ndipange pinthu pyonsene pikulu pidacita Elizeu.”+ 5 Mu ndzidzi ukhapanga iye mambo kuti Elizeu alamusa tani munthu muli akufa,+ nkazi wakuti mwanace akhadalamuswa afika pana mambo, mbaphemba toera apaswe nyumba yace na munda wace.+ Penepo pene Djehazi alonga: “Mbuyanga mambo, nkazi ule ndi uyu, pontho mwanace adalamuswa muli akufa na Elizeu ndi uyu.” 6 Natenepa mambo abvundza nkazi kuti pyenepi pyacitika tani, iye mbampanga pyonsene. Buluka penepo mambo acemera nkulu wa utongi mbampanga: “Bwezera nkazi uyu pinthu pyace pyonsene, pontho mpase kobiri yonsene ikhafuna kukhala na iye mbadagulisa cakudya ca m’munda mwace kutomera ntsiku idabuluka iye mpaka lero.”

7 Elizeu afika ku Dhamasku+ mu ndzidzi ukhaduwala Bheni-Adhadhi+ mambo wa ku Sirya. Natenepa mambo apangwa: “Ntumiki wa Mulungu wandimomwene+ ali kuno.” 8 Penepo mambo apanga Azaeli:+ “Kwata muoni uende kaonana na ntumiki wa Mulungu wandimomwene.+ Mpange toera abvundzise Yahova khala ndinawanga peno nkhabe.” 9 Azaeli aenda kaonana na Elizeu, iye akhadakwata muoni wa pinthu pyonsene pyadidi pya ku Dhamasku, mitolo ikhadakwatwa na makamelo 40. Iye afika pamaso pace mbampanga: “Mwananu Bheni-Adhadhi mambo wa ku Sirya, andituma toera ndidzakubvundzeni khala iye anawanga peno nkhabe.” 10 Elizeu antawira: “Ndoko kampange tenepa: ‘Mwakukhonda penula iwe unadzawanga,’ mbwenye Yahova andipangiza kuti mwandimomwene iye anadzafa.”+ 11 Elizeu amuyang’ana soo mpaka Azaeli kukhala na manyadzo. Buluka penepo ntumiki wa Mulungu wandimomwene atoma kulira. 12 Azaeli ambvundza: “Mbuyanga, thangwi yanji mukulira?” Iye atawira: “Thangwi ine ndisadziwa pinthu pyakuipa pinafuna iwe kudzacita kuna mbumba ya Izraeli.+ Unadzapisa na moto mizinda yawo yakuwanga, unadzapha amuna amphambvu na supada, unadzanyedza anawo, pontho unadzapandula akazawo akuti ali na mimba.”+ 13 Azaeli abvundza: “Ine ntumiki wanu wakuti ndine ninga mwanambwa, ndinakwanisa tani kucita pyenepi?” Mbwenye Elizeu alonga: “Yahova andipangiza kuti iwe unadzakhala mambo wa ku Sirya.”+

14 Buluka penepo iye abuluka pana Elizeu mbabwerera kuna mbuyace, wakuti ambvundza: “Elizeu akupanganji?” Iye atawira: “Iye andipanga kuti mwakukhonda penula imwe munawanga.”+ 15 Mbwenye mangwana mwace, Azaeli akwata manta mbaabvika m’madzi, buluka penepo iye aaikha kunkhope kwa mambo mpaka iye kufa.+ Azaeli adzakhala mambo pa mbuto yace.+

16 Mu caka cacixanu ca Yeoramu+ mwana wa Akabu mambo wa Izraeli, mu ndzidzi wakuti Yosafate akhali mambo wa Yuda, Yeoramu+ mwana wa Mambo Yosafate wa ku Yuda adzakhala mambo. 17 Iye akhali na pyaka 32 pyakubalwa mu ndzidzi udakhazikiswa iye ninga mambo, pontho iye atonga pyaka pisere mu Yerusalemu. 18 Iye afamba munjira za amambo a Izraeli,+ ninga pidacita anthu a panyumba ya Akabu,+ thangwi iye akhadasemba mwana wa Akabu;+ pontho iye apitiriza kucita pinthu pyakuipa pamaso pa Yahova.+ 19 Mbwenye Yahova nee akhafuna kufudza umambo wa Yuda thangwi ya ntumiki wace Dhavidhi,+ thangwi iye akhadapikira Dhavidhi kuti ndzidzi onsene mbadaoneka munthu wa dzindza yace+ toera kutonga.*

20 Mu ntsiku za Yeoramu, Aedhomi asandukira Yuda+ mbakhazikisa mambo wawo.+ 21 Natenepa Yeoramu aenda mpaka ku Zairi na ngolo zace zonsene za nkhondo, iye alamuka namasiku, atoma kumenya nkhondo na Aedhomi akuti akhadanzungulira, mbaakunda, kuphatanizambo atsogoleri a ngolo za nkhondo; mbwenye anyankhondo anango athawira ku misasa yawo. 22 Aedhomi asapitiriza kusandukira Ayuda mpaka lero. Pa ndzidzi unoyu, Libhina+ asandukirambo Ayuda.

23 Mphangwa zinango zinalonga pya umaso wa Yeoramu na pyonsene pidacita iye, pyalembwa m’bukhu inalonga pinthu pidacitika mu ndzidzi wa amambo a ku Yuda. 24 Buluka penepo, Yeoramu afa ninga pidacita ambuyace, mbaikhwa pabodzi na ambuyace mu Nzinda wa Dhavidhi.+ Mwanace anacemerwa Akaziya,+ adzakhala mambo pa mbuto yace.

25 Mu caka 12 ca Yeoramu mwana wa Akabu mambo wa Izraeli, Akaziya mwana wa Mambo Yeoramu wa ku Yuda, adzakhala mambo.+ 26 Akaziya akhali na pyaka 22 pyakubalwa mu ndzidzi udakhala iye mambo, pontho iye atonga caka cibodzi mu Yerusalemu. Mai wace akhali Ataliya,+ ndzukulu* wa Omiri,+ Mambo wa Izraeli. 27 Iye afamba munjira ya anthu a panyumba ya Akabu+ mbapitiriza kucita pinthu pyakuipa pamaso pa Yahova, ninga pidacita anthu a panyumba ya Akabu thangwi babace akhadasemba nkazi wa dzindza ya Akabu.+ 28 Iye aenda na Yeoramu mwana wa Akabu toera kamenyana na Azaeli Mambo wa ku Sirya ku Ramoti-Jiliyadhi,+ mbwenye anyankhondo a ku Sirya aphekesa Yeoramu.+ 29 Na thangwi ineyi Mambo Yeoramu abwerera ku Yezrieli+ toera pironda pidaphekeswa iye ku Rama* na anyankhondo a ku Sirya piwange. Iye aphekeswa mu ndzidzi ukhamenyana iye na Azaeli Mambo wa ku Sirya.+ Akaziya mwana wa Yeoramu mambo wa ku Yuda, aenda ku Yezrieli kaona Yeoramu mwana wa Akabu thangwi iye akhadaphekeswa.*