Samweli Wakutoma
13 Sauli akhali na pyaka . . .* pyakubalwa pidakhazikiswa iye ninga mambo,+ iye atonga Izraeli mu pyaka piwiri. 2 Sauli asankhula amuna a Izraeli akukwana 3.000; mwa amuna anewa, 2.000 akhali pabodzi na Sauli ku Mikimasi na kucisa ca mapiri ca ku Bheteli, pontho amuna 1.000 akhali na Yonatani+ ku Jibheya+ wa ku Bhenjamini. Iye apanga anthu anango toera abwerere ku misasa yawo. 3 Buluka penepo, Yonatani apha nsoka wa anyankhondo a Afilisti+ wakuti ukhali ku Jebha,+ pontho Afilisti abva pyenepi. Sauli aimbisa tuluka+ mu dziko yonsene, mbalonga: “Ahebheri mbabve!” 4 Aizraeli onsene abva mphangwa zakuti: “Sauli apha nsoka wa anyankhondo a Afilisti, pontho Afilisti aipirwa na Aizraeli.” Natenepa anthu acemereswa toera atowere Sauli ku Jiligale.+
5 Afilisti agumanyikanambo toera kumenyana na Aizraeli, iwo akhali na ngolo za nkhondo zakukwana 30.000 na anyamakavalo 6.000, pontho akhali na anyankhondo azinji kakamwe ninga tcetca ya nʼkhundu mwa bara;+ iwo aenda mbamanga misasa yawo ku Mikimasi kumabulukiro a dzuwa a Bheti-Aveni.+ 6 Amuna a Izraeli pidaona iwo kuti ali pa nyatwa, pontho kuti ali mʼmakhaliro akunentsa kakamwe, iwo athawa mbaenda kabisala mʼmphako,+ mʼmadzimba, mʼmapiri, mʼmakwartu a pantsi na mʼmicera yakusowa madzi. 7 Ahebheri anango awambuka Yordani mbathawira ku dziko ya Gadhi na ya Jiliyadhi.+ Mbwenye Sauli apitiriza ku Jiligale, pontho anthu onsene akhali na iye akhadzadzamira na kugopa. 8 Iye adikhira ntsiku zinomwe mpaka ndzidzi wakuthema udakhazikisa* Samweli, mbwenye Samweli adembuka kufika ku Jiligale, penepo anthu akhali na Sauli atoma kubalalika. 9 Na thangwi ineyi, Sauli alonga: “Ndipaseni cinyama cinafuna kuperekwa ninga ntsembe yakupiswa, pontho ndipaseni ntsembe toera kupereka takhuta.” Buluka penepo iye apereka ntsembe yakupiswa.+
10 Mbwenye pidamala iye kwene kupereka ntsembe yakupiswa, Samweli afika. Natenepa, Sauli aenda kuna iye mbamʼmwanyika. 11 Penepo Samweli ambvundza: “Thangwi yanji wacita pyenepi?” Sauli atawira: “Thangwi ndaona kuti anthu akhabalalika,+ imwe mwadembuka kufika, pontho Afilisti akhagumanyikana ku Mikimasi.+ 12 Penepo ine ndanyerezera: ‘Cincino Afilisti anabwera ku Jiligale toera kumenyana na ine, mbwenye ine ndidzati kuphemba ciphedzo ca Yahova.’ Natenepa ndakakamizika toera kupereka ntsembe yakupiswa.”
13 Samweli apanga Sauli: “Wacita pinthu mwakusowa ndzeru. Iwe nee wabvera ntemo udakupasa Yahova Mulungu wako.+ Mbudabvera, Yahova mbadawangisa umambo wako mu Izraeli kwenda na kwenda. 14 Mbwenye cincino, umambo wako nee unakhala kwenda na kwenda.+ Yahova anasankhula munthu anacita pinafuna ntima wace,+ pontho Yahova anadzanʼkhazikisa toera atsogolere mbumba yace,+ thangwi iwe nee wabvera pidakupanga Yahova.”+
15 Natenepa Samweli abuluka ku Jiligale, mbaenda ku Jibheya wa Bhenjamini. Sauli alengesa anthu akhali na iye mbaona kuti akhali amuna 600.+ 16 Sauli na mwanace anacemerwa Yonatani pabodzi na anthu akhali na iwo, akakhala ku Jebha+ wa Bhenjamini. Afilisti amanga misasa yawo ku Mikimasi.+ 17 Pontho misoka mitatu ya anyankhondo ikhabuluka mʼmisasa ya Afilisti. Nsoka ubodzi ukhaenda na nseu unaenda ku Ofra, ku dziko ya Suwali; 18 nsoka waciwiri ukhaenda na nseu unaenda ku Bheti-Oroni;+ nsoka wacitatu ukhaenda na nseu unaenda kumadire anayangʼanisana na gowa ya Zebhoimu, khundu ya kuthando.
19 Mu dziko yonsene ya Izraeli nee mukhalibve na munthu wakufula utale, thangwi Afilisti akhalonga: “Ife nkhabe funa kuti Ahebheri asasanye masupada peno madipa.” 20 Na thangwi ineyi, Aizraeli onsene akhaenda kuna Afilisti kanozesa mapaza awo anakweiwa na ngʼombe, mapaza anango, macado na masikeya.* 21 Ntengo wakunozesa* mapaza anakweiwa na ngʼombe, mapaza anango, magarfu makulu a mano matatu, macado na ntengo wakunozesa ntsonga ya cakudzokonya naco ngʼombe, ukhali pimu* ibodzi. 22 Pa ntsiku ya nkhondo, anthu akhali na Sauli na ale akhali na Yonatani nee akhali na masupada peno madipa; basi ene Sauli na mwanace wakuti ndi Yonatani+ ndiwo akhali na pida pya nkhondo.
23 Nsoka ubodzi wa anyankhondo a Afilisti waenda kunjira ya ku Mikimasi+ yakuti ikhali pakati pa mapiri.