Samweli Waciwiri

20 Penepo pakhali na mamuna m’bodzi nyakucitisa uviyaviya wakuti akhacemerwa Sabha+ mwana wa Bhikri wa dzindza ya Bhenjamini. Iye aliza nyanga+ mbalonga: “Ife nkhabe ubale na Dhavidhi, pontho ife nkhabe unthaka na mwana wa Yese.+ Imwe Aizraeli,+ bwererani kuna alungu* anu!” 2 Natenepa amuna onsene a Izraeli asiya kutowera Dhavidhi mbatowera Sabha mwana wa Bhikri;+ mbwenye amuna onsene a Yuda apitiriza kutowera mambo wawo kutomera ku Yordani mpaka ku Yerusalemu.+

3 Mambo Dhavidhi pidafika iye kunyumba kwace* ku Yerusalemu,+ iye akwata akazi ace khumi apakhundu akhadasiya iye toera atsalakane nyumba,+ aaikha n’nyumba inango mbaikha munthu toera kuionera. Iye akhaapasa cakudya, mbwenye nee akhapita nawo m’mabonde.+ Iwo apitiriza n’nyumba ineyi mpaka ntsiku yakufa kwawo, akakhala ninga azice, maseze mamuna wawo akhali m’maso.

4 Natenepa mambo apanga Amasa:+ “Iwe uli na ntsiku zitatu toera kucemera amuna a Yuda kuti abwere kuna ine, iwe usafunikambo kukhalapo.” 5 Amasa aenda kacemera amuna a Yuda, mbwenye iye afika mwakudembuka kupiringana ndzidzi udapaswa iye na mambo. 6 Buluka penepo Dhavidhi apanga Abhisai:+ “Sabha+ mwana wa Bhikri panango anaticitira pinthu pizinji pyakuipa kupiringana pidaticitira Abhisaloni.+ Kwata atumiki anga* uende kansaka toera akhonde kupita m’mizinda yakutsidzikizwa mbatithawa.” 7 Natenepa amuna a Yoabhe,+ Akereti, Apeleti+ na amuna onsene amphambvu abuluka pabodzi na iye* ku Yerusalemu mbaenda kasaka Sabha mwana wa Bhikri. 8 Pidafika iwo ku Jibheyoni+ dhuzi na mwala ukulu, Amasa+ abwera toera kuonana na iwo. Yoabhe akhadabvala nguwo zace za nkhondo, pontho akhali na supada ncunu mwace pa mbuto inakoyerwa iyo. Pikhaenda iye kuna Amasa, supada yace yagwa.

9 Yoabhe abvundza Amasa: “M’bale wanga uli mwadidi?” Buluka penepo Yoabhe aphata ndebvu za Amasa na djanja yamadyo ninga asafuna kumpswompswona. 10 Amasa nee akhaona supada ikhali m’manja mwa Yoabhe, penepo Yoabhe antukumiza supada m’mimba,+ mautumbo ace mbagwa pantsi. Iye antukumiza kabodzi basi mbaferatu. Buluka penepo Yoabhe na m’bale wace Abhisai aenda kasaka Sabha mwana wa Bhikri.

11 M’bodzi wa aphale a Yoabhe alimira dhuzi na manungo a Amasa mbalonga: “Anthu onsene akuti ali kukhundu ya Yoabhe na ale anaphedzera Dhavidhi mbatowere Yoabhe!” 12 Mu ndzidzi ukhacitika pyenepi, Amasa akhali thasa pa ciropa cace mu nseu. Mamuna pidaona iye kuti anthu onsene akhalimira penepo, iye abulusa manungo a Amasa mu nseu mbaaikha ntsanga. Buluka penepo iye aaphimbira na nguwo, thangwi aona kuti anthu onsene akhalimira angafika pana manungo anewa. 13 Pidabuluswa manungo mu nseu, amuna onsene aenda pabodzi na Yoabhe kasaka Sabha+ mwana wa Bhikri.

14 Sabha apita na m’madzindza onsene a Izraeli mpaka ku Abheli wa ku Bheti-Maaka.+ Abhikri agumanyikana mbapita mu nzinda pabodzi na iye.

15 Yoabhe na amuna akhali na iye* afika mbanzungulira ku Abheli wa ku Bheti-Maaka. Iwo atutira mataka mpanda wa nzinda toera kumenyana nawo, thangwi nzinda ukhali nkati mwa mpanda. Pontho amuna onsene akhali na Yoabhe akhakumba pantsi pa mpanda toera kuugwisa. 16 Penepo nkazi unango wandzeru, akhuwa mu nzinda: “Amunamwe bveserani, bveserani! Ndaphata miyendo, pangani Yoabhe abwere pano toera ndicedze naye.” 17 Natenepa Yoabhe aenda kuna nkazi, iye mbabvundza: “Ndiwe Yoabhe?” Iye atawira: “Inde.” Nkazi ampanga: “Bvesera mafala anafuna kulonga ntumiki wako.” Yoabhe atawira: “Ndiri kubvesera.” 18 Nkazi apitiriza kulonga: “Kale anthu akhalonga kuti munthu angafuna kumalisa nyatwa zace, ‘mbaende kasaka uphungu mu nzinda wa Abheli.’ 19 Ine ndisaimirira anthu antendere na akukhulupirika a Izraeli. Imwe musafuna kufudza nzinda wakuti ndi ninga mama mu Izraeli. Thangwi yanji musafuna kufudza* mbumba ya* Yahova?”+ 20 Yoabhe atawira: “Ine cipo ndanyerezera pyakufudza nzinda unoyu. 21 Pinafuna ine si pyenepi tayu. Mbwenye pana mamuna m’bodzi anacemerwa Sabha+ mwana wa Bhikri adabuluka kucisa ca mapiri ca ku Efraimu+ wakuti asandukira* Mambo Dhavidhi. Imwe mungandipasa mamuna unoyu m’bodzi basi, ine ndinabuluka mu nzinda uno.” Penepo nkazi apanga Yoabhe: “Tinakuponyerani nsolo wace na padzulu pa mpanda!”

22 Mwakukhonda dembuka, nkazi wandzeru aenda kalonga na mbumba yonsene, na thangwi ineyi iwo agwanda nsolo wa Sabha mwana wa Bhikri mbauponyera Yoabhe. Penepo iye aliza nyanga, iwo mbabuluka mu nzinda, m’bodzi na m’bodzi mbabwerera kunyumba kwace;+ mbwenye Yoabhe abwerera kuna mambo ku Yerusalemu.

23 Yoabhe akhali ntsogoleri wa anyankhondo onsene a Izraeli;+ Bhenaya+ mwana wa Yeoyadha+ akhatsogolera Akereti na Apeleti.+ 24 Adhoramu+ akhaonera ale akhacemerwa toera kuphata basa yakukakamizwa; Yosafate+ mwana wa Ailudhi akhali nyakulemba pyonsene pikhacitika. 25 Seva akhali mulembi; Zadhoke+ na Abhiyatari+ akhali anyantsembe. 26 Pontho Ira wa dzindza ya Yaire adzakhalambo ntsogoleri wankulu* wa Dhavidhi.