Ezekiyeli

2 Penepo iye andipanga: “Iwe mwana wa munthu, khala dzololo toera ine ndilonge na iwe.”+ 2 Pidalonga iye na ine, nzimu wace wapita muna ine, mbundilimirisa dzololo,+ toera ndikwanise kubva Ule akhalonga na ine.

3 Iye andipanga: “Iwe mwana wa munthu, ine ndinakutuma toera uende kuna mbumba ya Izraeli,+ yakuti ndi madzindza akukhonda bvera, adandisandukira.+ Iwo na ambuyawo asapitiriza kundidawira mpaka lero.+ 4 Ine ndinakutuma toera uende kuna mbumba yakusowa manyadzo na yakuuma ntima.+ Apange kuti: ‘Ipi ndi pidalonga Yahova, Mbuya Wankulu Kakamwe.’ 5 Nakuti iwo ndi mbumba yakukhonda bvera, angakubvesera peno angakhonda kukubvesera,+ mwandimomwene iwo anadzadziwa kuti pakati pawo pakhali mprofeta.+

6 “Mbwenye iwe mwana wa munthu, leka kuagopa,+ pontho leka kugopa mafala awo, maseze iwe wazungulirwa na miti ya minga,*+ mbukhala pakati pa makongʼa. Leka kugopa mafala awo,+ pontho leka kugopa maonekero a nkhope zawo,+ thangwi iwo ndi mbumba yakukhonda bvera. 7 Apange mafala anga, mwakukhonda tsalakana khala iwo anakubvesera peno nkhabe, thangwi iwo ndi mbumba yakukhonda bvera.+

8 “Mbwenye iwe mwana wa munthu, bvesera pinakupanga ine. Leka kukhala munthu wakukhonda bvera, ninga mbumba iyi yakukhonda bvera. Fungula mulomo wako, pontho usafunika kudya pinakupasa ine.”+

9 Pidayangʼanisa ine, ndaona djanja idafuthukira kuna ine,+ mu djanja ineyi, ndaona tsamba* yakuti ikhadalembwa.+ 10 Iye aifuthula pamaso panga, pontho tsamba ineyi ikhadalembwa mʼmakhundu mawiri ene.+ Pa tsamba ineyi, pakhadalembwa nyimbo zaciliro, nyimbo zakupangiza kutsukwala na madzedze.+