Ezekiyeli
26 Pa caka 11, pa ntsiku yakutoma ya mwezi, ine ndatambira mafala awa a Yahova: 2 “Iwe mwana wa munthu, anthu a ku Tiro asingirira Yerusalemu,+ mbalonga: ‘Aha, pyakoma!’ Nsuwo wa mbumba wagwiswa pantsi!+ Nakuti cincino iye afudzwa, pinthu pyonsene pinadzakhala pyanga, pontho ine ndinadzapfuma.’ 3 Na thangwi ineyi, ipi ndi pidalonga Yahova, Mbuya Wankulu Kakamwe: ‘Ine ndine nyamalwa wako iwe Tiro, ine ndinadzabweresa mbumba zizinji toera zimenyane na iwe, mbumba zenezi zinabwera kuna iwe ninga mabimbi a mʼbara. 4 Anthu anewa anadzagomola mipanda ya Tiro, anadzagwisa nyumba zace za ndzulu,+ ine ndinadzapala mataka awo, pontho ndinadzacitisa dziko ineyi kukhala mwala ukulu wakuzwerera. 5 Dziko ineyi inadzakhala mbuto yakuumisira makokota pakati pa bara.’+
“‘Thangwi ine ndine adapilonga, pontho iyo inadzatapatwa na anthu a madzindza anango;’ alonga Yahova, Mbuya Wankulu Kakamwe. 6 ‘Anthu a pisa pyace pya kuntunda anadzaphiwa na supada; natenepa, iwo anadzadziwa kuti ine ndine Yahova.’
7 “Thangwi ipi ndi pidalonga Yahova, Mbuya Wankulu Kakamwe: ‘Ine ndinabweresa Nabhukodhonozore mambo wa ku Bhabhilonya, buluka kunkwiriro+ toera kumenyana na Tiro; iye ndi mambo wa amambo,+ ali na makavalo,+ ngolo za nkhondo,+ anyamakavalo na nsoka wa anyankhondo azinji. 8 Iye anadzapha na supada anthu a mupisa pyako pya kuntunda, anadzamanga mpanda nʼkhundu mwako toera kukufungira, anadzacita nthunda toera kumenyana na iwe, pontho iye anadzatsidzikizika na xango ikulu. 9 Iye anadzadhima mipanda yako na pyakugomola napyo mpanda, pontho anadzagwisa nyumba zako za ndzulu na macado. 10 Makavalo ace anadzakhala mazinji kakamwe akuti pfumbi yawo inadzakuphimbira, iye angadzapita na pa misuwo yako ninga anthu anapita mu nzinda na pa mipanda idagomolwa, mititi ya makavalo, ya maroda na ya ngolo za nkhondo inadzatekenyesa mipanda yako. 11 Nyondo za makavalo ace zinadzaponda-ponda mʼmiseu yako yonsene,+ iye anadzapha mbumba yako na supada, pontho iye anadzagwisa mizati yako yakuwanga. 12 Iwo anadzatapata pinthu pyako, anadzakukwatira pinthu pya malonda ako,+ anadzagwisa mipanda yako, pontho anadzagomola nyumba zako zakubalika; penepo iwo anadzaponya mʼmadzi miyala yako, matabwa ako na mataka ako.’
13 “‘Ine ndinadzamalisa mikhuwo yakuimbwa kwa nyimbo zako, pontho nkhabe kudzabvekabve kulira kwa maarpa ako.+ 14 Ine ndinadzakucitisa kukhala mwala ukulu wakuzwerera, pontho unadzakhala mbuto yakuumisira makokota.+ Iwe cipo unadzamangwa pontho, thangwi ine Yahova, ndine adapilonga;’ alonga Yahova, Mbuya Wankulu Kakamwe.
15 “Ipi ndi pidalonga Yahova, Mbuya Wankulu Kakamwe kuna nzinda wa Tiro: ‘Kodi ntsuwa nee zinadzatetemera thangwi ya ntiti wakugwa kwako, mu ndzidzi wakuti ale anafuna kuphekeswa anadzabulira, anthu azinji mbaphiwa pakati pako?+ 16 Atsogoleri onsene anadzatcita pa mipando yaumambo, anadzadula matunika awo, anadzadula nguwo zawo zakulukwa, pontho anadzakundwa na kugopa. Iwo anadzakhala pa mataka, anapitiriza kutetemera, mbayangʼana kuna iwe mwakudzumatirwa.+ 17 Iwo anadzakuimbira nyimbo yaciliro,+ mbakupanga:
“Iwe wafudzwa kakamwe,+ nzinda wakusimbwa, wakuti anthu akakhala mwenemu ndi a ku bara;
Iwe na anthu ako akhali mwenemu, mukhali a mphambvu mʼbara,+
Anthu onsene pa dziko yapantsi akhakugopani!
18 Ntsuwa zinadzatetemera pa ntsiku yakufudzwa kwako,
Ntsuwa za mʼbara zinadzagopa thangwi yakufudzwa kwako.”’+
19 “Thangwi ipi ndi pidalonga Yahova, Mbuya Wankulu Kakamwe: ‘Ine ndingadzakufudza, mbukhala sawasawa na mizinda yakusowa anthu, ine ndingadzakudzadza na madzi amphambvu, pontho ungadzabizwa na madzi mazinji,+ 20 iwe na ale anafuna kutcitira munthumbi pabodzi na iwe, ndinadzakuendesani kuna anthu a mʼmidzidzi yakale. Ndinadzakucitisa kuti ukhale pa mbuto yakuzika kakamwe, ninga mbuto zakale zidamala kufudzwa, pabodzi na anthu anatcitira munthumbi,+ toera ukhonde kukhala pontho na anthu. Penepo ine ndinadzapasa mbiri dziko inakhala anthu akuti aciri na umaso.
21 “‘Ine ndinadzakubweresera nyatwa mwakututumusa, iwe unadzazambazika,+ anthu anadzakusaka, mbwenye iwe cipo unadzaoneka pontho;’ alonga Yahova, Mbuya Wankulu Kakamwe.”