Kronika Wakutoma

26 Iyi ikhali misoka ya anyakuonera misuwo:+ Mu dzindza ya Kore akhali Meselemiya+ mwana wa Kore wa dzindza ya Azafe. 2 Awa akhali ana a Meselemiya: Wakutoma akhali Zakariya, waciwiri akhali Yedhieli, wacitatu akhali Zebhadhiya, wacinai akhali Yatiniyeli, 3 wacixanu akhali Elami, wacitanthatu akhali Yeowanani, wacinomwe akhali Eliyonai. 4 Awa akhali ana a Obhedhi-Edhomi: Wakutoma akhali Semaya, waciwiri akhali Yeozabhadhi, wacitatu akhali Yowa, wacinai akhali Sakari, wacixanu akhali Netaneli, 5 wacitanthatu akhali Amiyeli, wacinomwe akhali Isakari, wacisere akhali Peuletai; Mulungu ampasa nkhombo mbabala ana anewa.

6 Semaya mwana wa Obhedhi-Edhomi abala ana akuti akhali atsogoleri a mbumba zawo, iwo akhali amuna amphambvu na akunyindirika.* 7 Awa akhali ana a Semaya: Otini, Refayeli, Obhedhi na Elzabhadhi; pontho Eliyu na Semakiya abale ace Elzabhadhi akhalimbo amuna akunyindirika. 8 Anewa akhali ana onsene a Obhedhi-Edhomi; iwo, anawo na abale awo akhali akunyindirika na akuthema toera kuphata basa, anthu onsene a mbumba ya Obhedhi-Edhomi akhali 62. 9 Meselemiya+ akhali na ana, pontho akhali na abale ace, onsene akhali amuna 18 akunyindirika. 10 Awa akhali ana a Osa mwana wa Merari: Simiri wakuti akhali ntsogoleri wa mbumba, (maseze nee akhali mwana wakutoma kubalwa, pai wace ansankhula toera akhale ntsogoleri wa mbumba); 11 waciwiri akhali Hilkiya, wacitatu akhali Tebhaliya, wacinai akhali Zakariya. Ana onsene a Osa pabodzi na abale ace akhali 13.

12 Atsogoleri a misoka ineyi ya anyakuonera misuwo akhali na basa toera kuiphata panyumba ya Yahova, ninga pikhacita abale awo. 13 Natenepa iwo asaka pidzindikiro+ thangwi ya mbumba zawo, mbumba zikulu na zing’ono zene toera kudziwa kuti mbani akhafunika kukhala pansuwo ubodzi na ubodzi. 14 Cidzindikiro capangiza Selemiya toera aonere khundu yakumabulukiro a dzuwa. Buluka penepo, iwo asaka cidzindikiro thangwi ya Zakariya mwana wa Osa, wakuti akhali phungu waudziwisi, iye asankhulwa toera kuonera khundu yakunkwiriro.* 15 Obhedhi-Edhomi asankhulwa toera kuonera khundu yakunterero,* anace+ asankhulwa toera kuonera nyumba zinakoyerwa pinthu. 16 Supimi na Osa+ asankhulwa toera kuonera khundu yakumadokero a dzuwa, dhuzi na Nsuwo Ukulu wa Saleketi cifupi na nseu wa kunthunda, nsoka ubodzi wa anyakuonera ukakhala kukhundu inango ya nsoka wa anyakuonera. 17 Khundu yakumabulukiro a dzuwa kukhali na Alevi atanthatu, pontho ntsiku zonsene Alevi anai akhaonera khundu yakunkwiriro, anai akhaonera khundu yakunterero. N’nyumba zakukoyera pinthu+ mukhali anyakuonera awiri cifupi na anyakuonera anango awiri. 18 Ku khonde yakumadokero a dzuwa kukhali Alevi anai cifupi na nseu,+ anango awiri akhali cifupi na khonde. 19 Ineyi ikhali misoka ya anyakuonera misuwo, iwo akhali ana a Kora na ana a Merari.

20 Mwa Alevi, Aiya akhatsalakana mpfuma ya panyumba ya Mulungu wandimomwene na pinthu pidaceneswa.*+ 21 Mwa ana a Ladhani, wakuti akhali m’bodzi wa ana a dzindza ya Jersoni, akhalipo Yeiyeli;+ iye akhali m’bodzi wa atsogoleri a mbumba ya Ladhani. 22 Ana a Yeiyeli akhali Zetamu na m’bale wace akhacemerwa Yoeli. Iwo apaswa basa yakuonera mpfuma ya panyumba ya Yahova.+ 23 Akhalipombo anthu a dzindza ya Amiramu, Izari, Ebhroni na Uzieli,+ 24 Sebhueli mwana wa Jersoni, mwana wa Mose akhali ntsogoleri wa nyumba zinakoyerwa pinthu. 25 Mbwenye abale ace akuti akhali a dzindza ya Eliezeri,+ akhalipo Reabhiya,+ Yesaiya, Yoramu, Zikri na Selomoti. 26 Selomoti unoyu na abale ace basa yawo ikhali kuonera mpfuma za pinthu pidaceneswa+ pyakuti Mambo Dhavidhi,+ atsogoleri a mbumba,+ atsogoleri a anthu 1.000, atsogoleri a anthu 100 na akulu a anyankhondo apipereka toera pikhale ninga miyoni yakucena. 27 Pinthu pinango pidatapata iwo+ kunkhondo,+ iwo apipereka ninga miyoni yakucena toera kutsalakana napyo nyumba ya Yahova. 28 Pakhalimbo pinthu pidapereka mprofeta Samweli,+ Sauli mwana wa Kisi, Abhineri+ mwana wa Neri na Yoabhe+ mwana wa Zeruya+ toera pikhale miyoni yakucena. Pinthu pyonsene pidaperekwa ninga miyoni yakucena pikhatsalakanwa na Selomiti pabodzi na abale ace.

29 Mwa ana a Izari,+ Kenaniya na anace asankhulwa toera kuphata mabasa akunja kwa nyumba ya Mulungu ninga atsogoleri na anyakutonga miseru+ ya Aizraeli.

30 Mwa ana a Ebhroni+ akhalipo Asabhiya na abale ace, onsene akhali amuna 1.700 akunyindirika. Iwo akhali na basa yakuyang’anira Aizraeli kukhundu yakumadokero a dzuwa a Yordani, m’mabasa onsene a Yahova na mabasa a mambo. 31 Mwa ana a Ebhroni, Yeria+ akhali ntsogoleri wa dzindza ya Ebhroni mwakubverana na mbumba yawo. Pa caka 40 ca utongi wa Dhavidhi,+ iwo asaka anthu ku Yazeri+ mu dziko ya Jiliyadhi mbagumana amuna amphambvu na akunyindirika pakati pawo. 32 Abale awo akhalipo amuna 2.700 akunyindirika, akuti akhali atsogoleri a mbumba. Natenepa Mambo Dhavidhi aasankhula toera ayang’anire dzindza ya Rubheni, ya Gadhi na hafu ya dzindza ya Manase, toera atsalakane pinthu pyonsene pya Mulungu wandimomwene na pya mambo.